ՀՀԿ խմբակցության քարտուղար Հովհաննես Սահակյանը, armlur.am-ի հետ զրույցում անդրադառնալով ՀՀ նախկին նախագահ Ռոբերտ Քոչարյանի հարցազրույցին, որում նախկին նախագահը դեմ է արտահայտվել սահմանադրական բարեփոխումներին ու քննադատել Սերժ Սարգսյանին, ասաց, որ հասարակությունը զարգանում է, հետևաբար պետք է փոփոխության ենթարկվի օրենսդրական դաշտը: «Եթե նայում եք մեր երկրի պրակտիկան, ապա տասը տարին մեկ փոխվում է մեր սահմանադրությունը»,- ասաց Սահակյանը:
Ինչ վերաբերում է Քոչարյանի մատնանշած երեք հանգամանքներին` ժողովրդավարական նորմերին նրա անհամապատասխանության վերաբերյալ կոնսենսուսային գիտակցությունը, փոփոխությունների անհրաժեշտության հասարակական սպասումները և ԵԽ առջև ստանձնած պարտավորությունները, ՀՀԿ խմբակցության քարտուղարի խոսքով` հասարակական պահանջը որևէ մեկը չի որոշում, դա կարող է որոշվել հասարակական քննարկումներով. «Չեմ կարծում, որ որևէ մեկն այս պահին ունի նման վերլուծություն»:
Անդրադառնալով Սերժ Սարգսյանի հասցեին հնչեցված` «երկրի ճակատագրով անկեղծ մտահոգությունը չտարբերեց իշխանությունների գործունեության ողբալի արդյունքների վրա չարախնդալուց» արտահայտությանը, Սահակյանի խոսքով` մենք ապրում ենք մի ժամանակաշրջանում, երբ ընկալելի քննադատությունը կարևոր է ու պարտադիր, բայց ոչ երբեք չարախնդալը:
-Իսկ համաձա՞յն եք 2-րդ նախագահի այն դիտարկմանը, որ Հովիկ Աբրահամյանը որպես վարչապետ ծանր ժառանգություն է ստացել:
-Այն, որ անելիքները շատ են հատկապես այս լուրջ ժամանակահատվածում, փաստ է: Այն, որ պատասխանատվությունը բավական մեծ է, դա էլ է միանշանակ: Մենք դաշտը նայում ենք օբյեկտիվորեն. նայում ենք դրսի մարտահրավերները, նայում ենք մեր տնտեսության վիճակը, չենք նայում ներքաղաքական ինչ-ինչ իրավիճակներից ելնելով:
Սոնա Դավթյան
.gif)
