ՀՀ կառավարությունն այսօր հավանություն է տվել ՊԵԿ-ի կողմից ներկայացված այլընտրանքային հարկային ստուգումների համակարգի ներդրման առաջարկին: Այդ առաջարկը, ըստ Գագիկ Խաչատրյանի, կբարելավի ներդրումային միջավայրը և զերծ կպահի ներդրողներին հարկային ռիսկերից:
Armlur.am լրատվականը տնտեսագետ, ՀԱԿ անդամ Վահագն Խաչատրյանից հետաքրքրվեց` արդյոք հարկային այդ համակարգի ներդրմամբ պետք է բարելավել ներդրումային միջավայրը: Տնտեսագետն ասաց, որ ներկայիս կառավարության գործողությունները չպետք է մեկնաբանել, քանի որ դրանք իրականության հետ և տնտեսությունը բարելավելու հետ կապ չունեն:
«Ներդրումային միջավայրը բարելավելու համար ընդհանուր քաղաքականությունը պետք է փոխվի: Պետք է ներդրողները համոզված լինեն, որ Հայաստանում չկա կոռուպցիա, հովանավորչություն,որ դատական համակարգը գործում է: Ներդրողին օրենսդրական նման փոփոխությունները ոչինչ չեն տա, ավելին, սրանք ոչինչ չասող երևույթներ են»,-ասաց ՀԱԿ անդամը` հավելելով, որ կա հեռախոսազանգի իշխանություն, որի դեպքում հնարավոր չէ ներդրումային միջավայրը բարելավել:
-Պրն Խաչատրյան, արդեն երկրորդ անգամ ՀՀ վարչապետ Հովիկ Աբրահամյանը խոսում է փոքր և միջին բիզնեսը զարգացնելու մասին, արդյոք նորանշանակ վարչապետն ունի նման ցանկությո՞ւն, թե դրանք ուղղակի հայտարարություններ են:
-Ես չեմ ցանկանում մեկնաբանել որևէ հայտարարություն, որովհետև ներկայիս իշխանության ոչ մի հայտարարություն կապ չունի իրականության հետ: Շատ կարճ ժամանակ անց կհամոզվեք, որ Հայաստանում չկա ոչ փոքր, ոչ էլ միջին բիզնես: Առանց համակարգի ամբողջական փոփոխության, չի լինելու որևէ փոփոխություն:
-Այսինքն` իշխանափոխության դեպքո՞ւմ է միայն հնարավոր տնտեսական խնդիրները լուծել:
-Հայաստանում տնտեսական խնդիր չկա: Կա միայն քաղաքական խնդիր: Տնտեսական հարցերի լուծումը քաղաքական դաշտում է: Կլինեն քաղաքական փոփոխություններ, կլինեն նաև տնտեսական փոփոխություններ:
Սոնա Դավթյան
.gif)
