Մենք իրավունք ունենք խմբագրել գերու նամակները. Կարմիր խաչ

Օրերս հայտնել էինք, որ հակառակորդի պահպանության գոտու տակ գտնվող ՀՀ շարքային զինծառայող Հակոբ Ինջիղուլյանը նամակ էր ուղարկել հարազատներին, որի միջից Կարմիր խաչը տողեր էր ջնջել:

Այս առիթով Armlur.am-ը փորձեց պարզաբանում ստանալ ԿԽՄԿ-ից, որի հասարակայնության և լրատվության հետ կապերի պատասխանատու Զառա Ամատունին մեզ հայտնեց, որ ԿԽՄԿ-ն հանդիսանում է չեզոք և անկողմնակալ միջնորդ երկու կողմերի` Ադրբեջանի և Հայաստանի միջև, և իր ծառայություններն է մատուցում ռազմագերու հայտնվելու դեպքում:

«Ռազմագերու իրավունքների մեջ է մտնում նամակներ ստանալն ու ուղարկելը: Այդ նամակների միջոցով ռազմագերին կապ է պահում իր ընտանիքի անդամների հետ:

Սակայն նամակները երբևէ չպետք է պարունակեն որևէ ինֆորմացիա անձնականից դուրս: Եթե լինում են նման դեպքեր, Կարմիր խաչի 3-րդ կոնվենցիայի 71-րդ հոդվածը թույլ է տալիս խմբագրել ռազմագերու նամակները: Հակառակ դեպքում՝ կվնասվի Կարմիր խաչի ֆունկցիան` որպես անաչառ ու թափանցիկ աշխատող կողմի»,- պարզաբանեց Ամատունին:

Վերջինս տեղեկացրեց նաև, որ նամակը գրելու պահին գերու մոտ մշտապես ներկա են լինում պատվիրակներ, ովքեր, պահանջվող ենթատեքստից դուրս ինֆորմացիա նկատելու դեպքում, պահանջում են նամակը նորից գրել առանց վերոնշյալի:

Ինջիղուլյանի դեպքում, սակայն, պատվիրակը ռուսախոս է եղել և նամակն, ըստ այդմ, խմբագրվել է Հայաստանում:

«Եթե մենք չպահպանենք անկողմնակալությունը, հետագայում կկորցնենք իշխանությունների վստահությունը, և այլևս նամակագրություն չի ապահովվի: Եվ մենք մեր առջև խնդիր չունենք դրված, որ գերին ինչ-որ ինֆորմավցիաներ հայտնի, մեր աշխատանքները զուտ մարդասիրական են: Նշեմ է նաև, որ իշխանություններն իրավունք ունեն տեսնելու այդ նամակները, իսկ այն բանից հետո, երբ մենք խմբագրում ենք այն, անպայման դրա մասին գերին տեղեկացվում է»,- շարունակելով խոսքը` նշեց, որ Կարմիր խաչի աշխատակիցը:

Հիշեցնենք, որ 2013 թվականի օգոստոսի 7-ի լույս 8-ի գիշերը՝ ժամը 03:00-ի սահմաններում, ծառայություն իրականացնելու ժամանակ, ըստ նախնական տեղեկությունների, տեղանքում չկողմնորոշվելու հետևանքով, 1991-ին ծնված շարքային զինծառայող Հակոբ Ինջիղուլյանը, հատելով հայ-ադրբեջանական շփման գիծը, հայտնվել է հակառակորդի պահպանության տակ գտնվող տարածքում։

Տաթև Հարութունյան