Շիրակի մարզի Գոգհովիտ գյուղի 47-ամյա բնակիչ, նախկինում դատված Արմեն Շահբազյանը մոտ 16 տարի առաջ` 1998 թվականի սեպտեմբերին, հայրական տանը սպանել է իր ծանոթներից մեկին՝ Դիանային:
Ոստիկանության լրատվական ծառայությունից Armlur.am-ին հայտնում են, որ տարիներ անց Շահբազյանը ներկայացել է ինքնախոստովանական ցուցմունքով և հայտնել, որ պատժից խուսափելու համար դիակը թաղել է իր տանը հարակից շինության պատի տակ:
Ոստիկանության աշխատակիցները, Շահբազյանի մատնացույց արած վայրը զննելով, հայտնաբերել են դիակի ոսկորները:
Armlur.am-ը, սակայն, տեղեկացավ, որ Արմեն Շահբազյանին ազատազրկում չի սպառնում` վաղեմության ժամկետների առկայության և անզգուշությամբ և ոչ կանխամտածված սպանություն կատարելու պատճառաբանությամբ:
Մեզ հետ զրույցում Գոգհովիտ համայնքի ղեկավար Արտուշ Մանուկյանը տեղեկացրեց, որ Արմեն Շահբազյանն այս պահին զբաղվում է գյուղատնտեսությամբ, ապրում է կնոջ և երեխաների հետ:
«Դեպքի ժամանակ արդեն Արմենն ամուսնացած է եղել, երեխաներ է ունեցել: Շատ պատահաբար է եղել սպանությունը. գումարային հարցեր են քննարկել, ապտակել է Դիանային ու պատահաբար սպանել»,- պատմեց գյուղապետը:
Վերջինս մեզ տեղեկացրեց նաև, որ սպանված կինը բնակվել է Արթիկ քաղաքում, սակայն ոչ մի տեղ գրանցված չի եղել: Նախկինում նա դատվել է` երեխաների թրաֆիքինգով և առուվաճառքով զբաղվելու մեղադրանքով:
Դեպքի օրը Դիանան Շահբազյանի բաջանաղի գրպանից գումար էր գողացել, ինչի պատճառով էլ սկսվել է վիճաբանությունը՝ ավարտվելով սպանությամբ:
.gif)
