Կալիֆորնիայի Սենատի ընդունած բանաձևը  նշանակալի ազդակ է. խմբագրական

ՀԵՏԵՎԵՔ ՄԵԶ Telegram-ՈՒՄ

Սեպտեմբերի 2-ին կայանալիք  Լեռնային Ղարաբաղի Հանրապետության անկախության 23- րդ տարեդարձի նախաշեմին ԱՄՆ-ի Կալիֆորնիա նահանգի սենատը նախօրեին ընդունել է Լեռնային Ղարաբաղի անկախությունը ճանաչող  բանաձև:  Պատգամավոր Մայք Գեթոյի նախաձեռնած բանաձևում ասվում  է, որ Կալիֆորնիան  աջակցում է Ղարաբաղի` անկախ և ժողովրդավար ապրելու  ձգտմանը և կոչ է անում ԱՄՆ-ի Կոնգրեսին  և նախագահին` սատարել ԼՂՀ ինքնորոշմանն ու ժողովրդավարական ճանապարհով ձեռք բերված անկախությանը: Այսպիսով` Կալիֆորնիան դարձավ ԱՄՆ թվով հինգերորդ նահանգը, որը  ճանաչում է Ղարաբաղի անկախությունը:

Իհարկե, այս բանաձևը, ինչպես և նախորդ  չորս նահանգների ընդունած փաստաթղթերը, որևէ իրավական  նշանակություն չեն կարող ունենալ ԱՄՆ պաշտոնական դիրքորոշման  փոփոխության հարցում, սակայն որոշակի դրական քաղաքական ֆոն, դրանք, այդուհանդերձ, ստեղծում են, ինչի կարևորությունը, թերևս, չարժե թերագնահատել: Ընդունված բանաձևն արդեն իսկ ողջունել են ԼՂՀ և ՀՀ իշխանությունները: Եվ ուշագրավ է, որ  ՀՀ ԱԳ նախարարն իր հայտարարությունում այս բանաձևը գնահատել է որպես Ադրբեջանի կողմից ՀՀ և եռանախագահների` հիմնախնդիրը կարգավորելու ջանքերը խոչընդոտելու  պատասխան` ընդգծելով, որ համանման բանաձևերը ճանապարհ  կհարթեն դեպի ԼՂՀ միջազգային ճանաչում: Արդյոք դա այդպես է, արդյոք ԱՄՆ հայաշատ այս նահանգի Սենատի քվեարկությունը առավելապես հենց տեղի հայկական համայնքի գործադրած ջանքերի արդյունքը չէ:

Այս հարցի պատասխանը միանշանակ չէ, սակայն ի հակառակ ադրբեջանական քարոզչամեքենայի բարձրացրած հիստերիայի, թե այս բանաձևը ՙգնվել  է ԱՄՆ  ազդեցիկ հայկական սփյուռքի կողմից՚, հարկ է նկատել, որ այդ դեպքում, թերևս, Կալիֆորնիան պետք է լիներ առաջին նահանգը, որը ճանաչում էր ԼՂՀ անկախությունը: Մինչդեռ, ինչպես արդեն նշվեց, ավելի վաղ` 2012 -2013թթ-ին, դա արել են ամենևին էլ ոչ հայաշատ Լուիզիանա, Մեն, Մասսաչուսեթս և Ռոդ Այլենդ նահանգները:

Ամեն դեպքում`  պարզ է  մեկ բան. ինչպես այս, այնպես էլ ԱՄՆ մնացած չորս և Ավստրալիայի ամենամեծ` Նյու Սաութ Ուելս նահանգի` ավելի վաղ ընդունած բանաձևերը պաշտոնական Երևանի դիվանագիտական ջանքերի արդյունքը չեն: Եվ, թերևս, հենց այս պատճառով էլ   ՀՀ արտգործնախարարությունը որևէ կերպ, քարոզչական նպատակներով  չի օգտագործում այս  բոլոր նահանգների ճանաչումները: Ինչևէ. սա դրական և նշանակալի ազդակ է, որի բացասական արդյունքները, հուսանք, չեն հանգեցնի ռուս-ադրբեջանական ռազմավարական գործընկերության է՛լ ավելի ամրապնդմանը:




Լրահոս