ՀՀ վարչապետ Հովիկ Աբրահամյանը շնորհավորական ուղերձ է հղել Գիտելիքի և դպրության օրվա առթիվ, որում ասված է.
«Սիրելի՛ աշակերտներ, ուսուցիչներ և ծնողներ,
Հարգելի՛ ուսանողներ և դասախոսներ
Ջերմորեն շնորհավորում եմ ձեզ Գիտելիքի և դպրության օրվա առթիվ:
Հայ ժողովուրդն ուսումնատենչ ժողովուրդ է և իր պատմության բոլոր շրջափուլերում աչքի է ընկել կրթության և դպրոցի հանդեպ հատուկ վերաբերմունքով՝ այն համարելով ազգի գոյատևման հիմնական գրավականներից մեկը:
Կրթական համակարգը հասարակության և պետության հենարանն է, և վերջինիս կայացումը Հայաստանի Հանրապետության օրակարգի հիմնախնդիրներից մեկն է: Հայաստանի Հանրապետության կառավարությունը մշտապես պահելու է իր ուշադրության կենտրոնում կրթական ոլորտի հետագա կատարելագործումը և շարունակական բարեփոխումները՝ առաջնահերթ համարելով գիտելիքով զինված և կրթված հասարակություն ունենալու անհրաժեշտությունը:
Կրկին շնորհավորելով բոլորիդ այս լուսավոր տոնի առթիվ՝ մաղթում եմ ձեզ երջանկություն, անսպառ եռանդ և նորանոր հաջողություններ»:
.gif)
