Armlur.am-ին հայտնի դարձավ, որ իսպանական Ալիկանտե քաղաքում ապրիլի 12-ին անհայտ անձինք վնասել են հայկական խաչքարը:
Խաչքարը տեղադրվել է 7 տարի առաջ` 2008 թ-ի հունվարի 18-ին քաղաքապետարանի, հայկական միության և հովանավոր Թևոս Սաֆարյանի աջակցությամբ, և նման բան տեղի է ունենում առաջին անգամ: Armlur.am-ին հայտնի դարձավ, որ այս ամենը հաջորդել է ցեղասպանության վերաբերյալ մի քանի միջոցառումների: Այսպես, ապրիլի 8-ին ռադիոյով հարցազրույց է ներկայացվել Հայոց ցեղասպանության մասին, ապրիլի 9-ին Հռոմի պապի պատարագից հետո ներկայացվել է Խավիեր Մորետի «La memoria de Ararat» գիրքը, իսկ ապրիլի 18-ին կկայանա Ցեղասպանության զոհերի հիշատակին նվիրված ևս մեկ պատարագ:
ՀՀ սփյուռքի նախարարության մամուլի եւ հասարակայնության հետ կապերի վարչությունը ևս տեղեկացնում է տեղի ունեցածի մասին: Նախարարությունը հայտնում է որ տեղի հայ համայնքը դիմել է քաղաքի համապատասխան մարմիններին (քաղաքային իշխանություններ, ոստիկանություն), որպեսզի խաչքարը վերականգնվի, իսկ հանցագործությունը կատարած անձինք հայտնաբերվեն և օրենքի ողջ խստությամբ ենթարկվեն պատասխանատվության:
Այժմ իշխանությունները միջոցներ են ձեռնարկում համայնքի կողմից կազմակերպվող ապրիլյան բոլոր միջոցառումների անվտանգությունն ապահովելու, ինչպես նաև խաչքարը հետագա վնասումից զերծ պահելու նպատակով:
.gif)
