Երեկ տեղի ունեցավ սահմանադրական փոփոխությունների մասնագիտական հանձնաժողովի լիազոր ներկայացուցչի և Բարգավաճ Հայաստան խմբակցության ներկայացուցիչների հանդիպումը: ԲՀԿ խմբակցության քարտուղար Վահե Էնֆիաջյանը Armlur.am-ի հետ զրույցում նշեց, որ տեղի է ունեցել արդյունավետ և բովանդակային քննարկում:
«Մենք ներկայացրինք նախագծի վերաբերյալ մեր առաջարկություններն ու մտահոգությունները: Քննարկմանը ներկա էին խմբակցության պատգամավորները, իրավագետներ և ոլորտի առաջատար մասնագետներ: Չնայած քննարկումը բավական երկար տևեց՝ մոտ երկու ժամ, սակայն չհասցրինք բոլոր վիճահարույց կետերը քննարկել: Քննարկումը եղել է միայն իրավաբանական և բովանդակային բնույթի, քաղաքական հարցերի քննարկում չի եղել»,- ասաց Էնֆիաջյանը:
Նրա խոսքով` դեռ կան որոշ կետեր, որոնց վերաբերյալ քննարկումները շարունակվում են. «Այս դեպքում կարևորն այն է, որ կա փոխըմբռման պատրաստակամություն»:
Հարցին` հանդիպումը որևէ ազդեցություն ունեցե՞լ է ԲՀԿ-ի պաշտոնական դիրքորոշման վրա, Էնֆիաջյանը պատասխանեց. «Ինչպես նշեցի, քննարկումը եղել է զուտ իրավաբանական և բովանդակային բնույթի, կուսակցության դիրքորոշման վերաբերյալ քննարկում չի եղել: Հավատացնում եմ Ձեզ, որ մեր պաշտոնական դիրքորոշումը չի ուշանա: Սահմանադրությունը լուրջ փաստաթուղթ է, և մենք մինչ մանրակրկիտ չուսումնասիրենք նախագիծը, պաշտոնական հայտարարությամբ հանդես չենք գա: Նախագիծն ուղարկվել է նաև ԲՀԿ տարածքային կառույցներին, մենք սպասում ենք նրանց դիտարկումներին և առաջարկներին, որից հետո համադրելով խմբակցության, տարածքային կառույցների, փորձագետների և սահմանադրագետների տեսակետները, մենք կհայտարարենք մեր դիրքորոշումը»:
Քրիստինա Աղալարյան
.gif)
