Ինչպես Armlur.am-ն արդեն տեղեկացրել է, այսօր նախատեսված էր «Նաիրիտ» գործարանը սննակ ճանաչելու պահանջով ՀԷՑ-ի ներկայացրած հայցի քննությունը: Դատարանում ՀԷՑ-ի ներկայացուցիչներից որևէ մեկը ներկա չէր: Գործարանի ներկայացուցիչ Արմեն Աբովյանը դատարանին միջնորդություն ներկայացրեց դատական նիստը երկարաժամկետ հետաձգել: Դատարանը, հաշվի առնելով կողմերից մեկի բացակայությունը, որոշում կայացրեց դատական նիստը հետաձգել:
Արմեն Աբովյանը դատարանին ներկայացրեց, որ մյուս կողմի հետ բանակցությունները շարունակվում են, հաշտության եզրեր հնարավոր է գտնել: «Բանակցությունները շարունակվում են, այնպես չէ, որ սառեցվել են: Ներկայացվել են մի շարք առաջարկություններ: Մեր բանակցային գործընթացի արդյուքնում հնարավոր կլինի պարզաբանել կողմերի ունեցած փոխադարձ պարտավորությունները: Ստեղծվում են հնարավորություններ, որպեսզի կարողանանք մարել այլ ընկերությունների հանդեպ ունեցած ֆինանսական պարտավորությունները»,- ներկայացրեց փաստաբանը: Հաջորդ դատական նիստը տեղի կունենա նոյեմբերի 18-ին ժամը 14:15-ին:
Փաստաբան Արմեն Աբովյանը դատական նիստից հետո, հրաժարվեց լրագրողների հարցերին պատասխանել` պատճառաբանելով, որ ինքը չի ցանկանում, որ իրեն տեսանկարահանեն. «Հարցեր ունեք, տվեք, բայց ինձ մի նկարեք»:
Այնուամենայնիվ, լրագրողներին հաջողվեց մի քանի հարցեր ուղղել նրան: Աբովյանը լրագրողներին ասաց, որ գործարանը սնանկ ճանաչելը դեռ չի նշանակում այն լուծարել: Փաստաբանը լավատես է, որ այս ընթացքում Կառավարությունը կկարողանա միջոցներ գտնել, մարել պարտքերը և գործարանը վերագործարկել: Մինչդեռ հավաքված նաիրիտցիները հակառակ կարծիքի էին: «Հնարավոր կլինի համաձայնություն ձեռք բերել, գործարանը վերագործարկել և շահույթի հաշվին պարտքերը մարել: Հնարավոր է ներսի ուժերով, մի ուրիշ բան ծնվի ստեղծվի, որը մարդիկ կարողանան օգտագործել և բոլոր խնդիրները լուծվի: Քաղաքական կամք դրսևորվում է»,- ասաց գործարանի ներկայացուցիչը:
Մանրամասները` Armlur.am-ի տեսանյութում:
.gif)
