Սեպտեմբերի 25-29-ը Ուկրաինայի մայրաքաղաք Կիևում կայացավ Արևելյան գործընկերության երկրների միջազգային համաժողովը: Համաժողովին մասնակցում էին շուրջ 150 երիտասարդներ Հայաստանից, ՈՒկրաինայից, Վրաստանից, Մոլդովայից, Ադրբեջանից և Բելառուսից: Հայաստանի երիտասարդության ազգային խորհուրդը համաժողովում ներկայացնում էր Աննա Մկրտչյանը:
Համաժողովի մեկնարկին մասնակիցները հանդիպում ունեցան ՈՒկրաինայում Գերմանիայի դեսպանի և ՈՒկրաինայի Երիտասարդության և սպորտի նախարարի հետ: Այնուհետև առանձին խմբերով քննարկումներ եղան երկրում որոշումների ընդունման գործում երիտասարդության դերի, երիտասարդների ընտրական և քաղաքական գործունեության բարելավման, կոնֆլիկտային իրավիճակներից երիտասարդական հասարակական կազմակերպությունների միջազգային համագործակցության միջոցով խուսափման, քաղաքացիական հասարակությունների զարգացման և մի քանի այլ թեմաների շուրջ:
Համաժողովի բուն հատվածի ավարտին տեղի ունեցավ Արևելյան գործընկերության երկրների ազգային երիտասարդական խորհուրդների խորհրդաժողով, որի ժամանակ մշակվեց միջազգային համագործակցության վերաբերյալ բանաձև:
Հաջորդիվ մասնակիցների համար անցկացվեցին եռօրյա վերապատրաստման դասընթացներ «Երիտասարդության միջազգային համագործակցության արդյունավետության մենեջմենթը» թեմայով:
Դասընթացների ընթացքում կատարվեց համաժողովի համագումարային բանաձևի վերլուծությունը, և երիտասարդները բաժանվեցին համաժողովի ընթացքում քննարկված հիմնական թեմաներով խմբերի:
Դասընթացների առաջին 2 օրերի ընթացքում մասնակիցները ներկա գտնվեցին մի քանի դասախոսությունների` միջազգային երիտասարդական նախագծերի ֆինանսավորման հնարավորությունների, միջազգային նախագծերի հաջողության գաղտնիքների, դրանց հետ կապված ռիսկերի և առանձնահատկությունների և միջազգային թիմի ձևավորման թեմաներով:
Ծրագրի ավարտին առանձին խմբերի կողմից ներկայացվեցին առաջարկված նախագծերը, ամփոփվեցին արդյունքները, որոշվեցին հետագա անելիքները և մշակվեց մեխանիզմ` կապված մասնակիցների հետագա հաղորդակցության համար:
.gif)
