Երևանի քաղաքապետարանում այսօր տեղի ունեցած աշխատանքային խորհրդակցության ընթացքում, անդրադառնալով վարչական տույժերի մասով կազմվող արձանագրություններին՝ քաղաքապետ Տարոն Մարգարյանը աշխատակազմի իրավաբանական վարչության պետին և 12 վարչական շրջանների ղեկավարներին հանձնարարել է այս առումով լինել հետևողական և խստապահանջ՝ հետևելով արձանագրությունների պատշաճ կազմմանը:
«Մեր քաղաքացիների կողմից բազմաթիվ բողոքներ ենք ստանում, որ որոշ աշխատակիցների թերի աշխատանքի պատճառով մեր համաքաղաքացիներն անհարկի խնդիրներ են ունենում: Խոսքը սխալ կազմված վարչական արձանագրությունների մասին է, ինչը, իրոք, գլխացավանք է դառնում այդ մարդկանց համար: Եվ ոչ միայն նրանց համար, այլ նաև մենք ենք դառնում տուժող կողմ, քանի որ սխալ կազմված վարչական արձանագրության դատական կարգով բողոքարկումը ենթադրում է նաև համապատասխան փոխհատուցում: Ըստ այդմ պետք է բացառվեն սխալ կազմված արձանագրությունները: Այս հարցը պահեք հատուկ ուշադրության կենտրոնում: Իսկ ովքեր կթերանան իրենց աշխատանքում, օրենքով սահմանված կարգով կենթարկվեն նաև պատասխանատվության»,- ընդգծել է քաղաքապետը:
Երևանի քաղաքապետարանի տեղեկատվության
և հասարակայնության հետ կապերի վարչություն
.gif)
