Մինչ ՀՀ հատուկ քննչական ծառայությունը շարունակում է քննել Սարի թաղում բռնություն գործադրած անձերի որոնումները, հուլիսի 29-ի գործողությունների գլխավոր դերակատարները ազատ շրջում են:
Ինչպես հայտնի է, ՀՀ ոստիկանապետ Վլադիմիր Գասպարյանի թիկնազորի ղեկավար Արշակ Հակոբյանը Սարի թաղում իրականացված ջարդի ու կրակոցների դերակատարներից է, եւ օրվա տեսանյութերում հստակ երեւում է նրա մասնակցությունը:
Սակայն մինչ օրս Արշակ Հակոբյանը չի հայտնվել ՀՀ հատուկ քննչական ծառայության ուշադրության կենտրոնում. համենայնդեպս մեր հարցումներին ի պատասխան քննչական այդ մարմնից որեւէ տեղեկություն չեն հաղորդում:
Ի՞նչ քայլեր են ձեռնարկվում իրավապահ համակարգի կողմից սույն անձանց պատասխանատվության կանչելու ուղղությամբ:
Իրավապահները հավաստիացնում են, որ նշված տեսանյութերը, լրագրողական բոլոր հոդվածները ՀՀ հատուկ քննչական ծառայության կողմից ուսումնասիրվում են: Ուշադրության կենտրոնում են բոլոր այն անձինք, որոնք բռնություն են գործադրել քաղաքացիների եւ լրագրողների նկատմամբ, խոչընդոտել նրանց մասնագիտական գործունեությանը:
Թե ինչ աշխատանքներ են տարվում, դժվար է ասել, բայց փաստ է, որ Արշակ Հակոբյանն ազատ շրջում է եւ մասնակցում ոստիկանության հրապարակային միջոցառումներին: Սեպտեմբերի 28-ին նա եղել է ոստիկանության կրթահամալիրում, որտեղ տեղի է ունեցել ոգեկոչման արարողություն՝ նվիրված այս տարվա հուլիսին պարեկապահակային գնդի վրա զինված հարձակման ժամանակ ծառայողական պարտականությունները կատարելիս զոհված ոստիկանության ծառայողների հիշատակին:
Ինչպես հայտնի է՝ 2016թ. հուլիսի 29-ի լույս 30-ի գիշերը Սարի թաղում լրագրողների նկատմամբ բռնություններ կիրառելու հետ կապված հրապարակվեցին աղմկալի լուսանկարներ, թե ինչպես էին ՀՀ ոստիկանապետ Վլադիմիր Գասպարյանի թիկնազորի պետ Արշակ Հակոբյանը, թիկնազորի անդամ Գագիկ Զոհրաբյանը (նասկի), քրեական հեղինակություն Սարգիս Հախանումյանի՝ Տլեի եղբայրը՝ Դավիթ Հախանումյանը, ՀՀ փոխոստիկանապետ Լևոն Երանոսյանի եղբորորդին, Տիգրան Մելոյանը եւ մյուս՝ թիկնապահ հիշեցնող կերպարներն ու քրեական տարրերը ակտիվորեն ներգրավված:
Մինչ օրս անհայտ է՝ լուսանկարներում երեւացողներից ովքե՞ր են ենթարկվել կամ ենթարկվելու պատասխանատվության:
.gif)
