Մի շարք գյուղերի ցորենի դաշտերը ցրտահարվել են

ՀԵՏԵՎԵՔ ՄԵԶ Telegram-ՈՒՄ

Լոռու մարզի Ստեփանավանի տարածաշրջանի մի շարք գյուղերի բնակիչներ փաստի առաջ են կանգնել. աշնանացան ցորենի դաշտերը ցրտահարվել են գրեթե ամբողջությամբ: Գյուղացիների փոխանցմամբ՝ ցրտահարությունը եղել է դեռեւս դեկտեմբեր ամսին, երբ առատ ձյան տեղումներ եղան ու սաստիկ ցրտեր. «Հեկտարներով ցորեն ցանեցինք, հիմա սաղ բերքը ցրտահարվել է, ստիպված նորից ցանքս ենք անում»,-մեզ հետ զրույցում հայտնեցին գյուղացիները:

Ցրտահարությունից առավել շատ տուժել են Կողես, Մղարթ, Կարմիր Աղեգի գյուղերի ցանքատարածությունները: Կողեսի գյուղապետ Արայիկ Ներսիսյանի խոսքով՝ իրենց համայնքի դաշտերում բերքի 100 տոկոս ոչնչացվածություն գրանցվել է ցանքատարածությունների շուրջ 30 տոկոսում, իսկ մյուս մասը ոչնչացվել է 40-50 տոկոսով: Գյուղապետի տեղեկացմամբ` ստեղծված իրավիճակի մասին իրենք համապատասխան արձանագրություն են կազմել եւ ուղարկել Լոռու մարզպետարան, որտեղից սակայն հայտնել են, որ փոխհատուցում չի նախատեսվի:

Կարմիր Աղեկի գյուղի բնակիչները մտահոգված հայտնեցին, որ իրենք նորից վարկ են վերցրել, որպեսզի կարողանան գարնանացանն իրականացնել, դրանից զատ` ստիպված են լինելու փակել նաեւ նախորդ սերմացուի վարկն ու պարտքերը:
Նմանօրինակ վիճակ է նաեւ մարզի Վարդաբլուր եւ Յաղդան համայնքներում, այստեղ եւս բերքի մեծ մասը վերջնականապես ոչնչացված է, իսկ փոխհատուցման հույս որեւէ գյուղացի չունի. «Ինչ փոխհատուցման մասին կարա խոսք գնա, էդ երբ են փոխհատուցել, որ հիմա էլ փոխհատուցեն»,-մեզ հետ զրույցում դժգոհեց Յաղդան գյուղի բնակիչ Գրիշա պապը, ում ցանքատարածությունները եւս ցրտահարվել են:

«Ժողովուրդ» օրաթերթի հետ զրույցում Կողես գյուղի բնակիչ պարոն Համբարձումը նշեց, որ իրենք աշնանը սերմացու են գնել, տեխնիկա վարձակալել ու շուրջ 80 հեկտար ցորեն ցանել. «Աշնանը մի աշխարհ փող թափեցինք, դաշտերը ցանքս արինք, որ էսօր նորից դնենք, էսքան բանը նորից անենք: Կռծողները մի կողմից են ավիրում մեր ցանքսերը, անորակ սերմացուն՝ մի կողմից, թանկարժեք տեխնիկան՝ մի կողմից, իսկ արդյունքը չստացված բերքն է»,-հոգոց հանելով՝ նշեց նա:

Էդվարդ Արզումանյան
Լոռի




Լրահոս