«Ինտերպոլ»-ը փակել է իր տվյալների բազան Թուրքիայի համար

ՀԵՏԵՎԵՔ ՄԵԶ Telegram-ՈՒՄ

Քրեական ոստիկանության միջազգային կազմակերպությունը՝ «Ինտերպոլ»-ը փակել է իր տվյալների բազան Թուրքիայի համար այն բանից հետո, ինչ պաշտոնական Անկարան փորձել է այնտեղ մուտքագրել միանգամից 60 հազար մարդու անուն, ովքեր մեղադրվում են գյուլենականներին հարելու ու երկրում ռազմական հեղաշրջման փորձ նախաձեռնելու մեջ:

Այս մասին հայտնում է թուրքական Karar պարբերականը: Չնայած թուրքական կողմն արդեն շուրջ մեկ տարի է տարբեր նախաձեռնությունների է դիմում, որպեսզի «Ինտերպոլ»- ը փոխի իր որոշումը, այդուհանդերձ, այդ ջանքերը հաջողությամբ չեն պսակվել: Թուրքական կողմի ներկայացրած 60 հազար անձինք կարողանում ենք ազատորեն տեղաշարժվել Միացյալ Նահանգներում ու եվրոպական երկրներում:

Առանց «Ինտերպոլ»-ի միջամտության՝ այդ անձինք կարող են ազատորեն օգտագործել իրենց անձնագրերը: Պաշտոնական Անկարան երկրում 2016 թվականի հուլիսի 15-ի ռազմական հեղաշրջման փորձ իրականացնելու մեջ մեղադրում է չափավոր իսլամի քարոզիչ Ֆեթուլլահ Գյուլենին և նրա հետևորդներին` գյուլենականներին:

Հեղաշրջման փորձից հետո երկրի իշխանությունները սկսել են Թուրքիայի մասնավոր և պետական ոլորտները գյուլենականներից մաքրելու աշխատանքները:




Լրահոս