«Սասնա ծռեր»-ի պաշտպանները գործադուլ հայտարարեցին

Այսօր «Սասնա ծռեր» խմբի 14 անդամների տասից ավելի պաշտպաններ գործադուլ հայտարարեցին:

ArmLur.am-ի հետ զրույցում փաստաբան Հարություն Բաղդասարյանը նշեց, որ երկու փաստաբանների թույլ չտվեցին մուտք գործել դատարանի դահլիճ, ինչից հետո ներկա փաստաբանները գործադուլ սկսեցին.

«Փաստաբաններ Մուշեղ Շուշանյանին և Արայիկ Պապիկյանին մինչ դատական նիստը սկսելը դատական կարգադրիչները թույլ չտվեցին մտնել դատական նիստերի դահլիճ: Մյուս փաստաբանները ասացին, որ քանի որ պաշտպանները դատարանի դահլիճում չեն, նշանակում է դատական նիստը պետք է հետաձգել:

Մենք միջնորդություն ենք ներկայացրել դատական նիստը հետաձգելու մասին, իսկ դատարանը հեռացել է խորհրդակցության՝ գործադուլ հայտարարած փաստաբանների նկատմամբ կարգապահական վարույթ իրականացնելու համար»,- ասաց Հարություն Բաղդասարյանը՝ ընդգծելով, որ այժմ փաստաբանները Ավան և Նոր Նորք վարչական շրջանների ընդհանուր իրավասության դատարանի բակում են. դատական նիստին մասնակցելու համար դատարան են մտել միայն հանրային պաշտպանները:

Նշենք, որ նիստին չեն մասնակցում պաշտպաններ Ինեսսա Պետրոսյանը, Հարություն Բաղդասարյանը, Երվանդ Վարոսյանը, Լուսինե Սահակյանը, Դավիթ Գյուրջյանը, Արա Զաքարյանը, Հրանտ Գեւորգյանը, Մուշեղ Շուշանյանը, Արայիկ Պապիկյանը եւ Տիգրան Հայրապետյանը:

Լուսինե Առաքելյան