ՊԵՏՔ Է ՀԱՄԱԳՈՐԾԱԿՑԵՆ ԱՆԿԱՆՈՆ ՄԻԳՐԱՑԻԱՅԻ ԴԵՄ ՊԱՅՔԱՐԻ ՇՈՒՐՋ

«Ժողովուրդ» օրաթերթը շարունակում է հրապարակել նոյեմբերի 24-ին Բրյուսելում՝ Արեւելյան գործընկերության գագաթնաժողովի ժամանակ ստորագրվելիք ԵՄ-ի հետ նախաստորագրված համապարփակ եւ ընդլայնված գործընկերության համաձայնագիրը:

Միգրացիայի, ապաստանի տրամադրման եւ սահմանների կառավարման հարցերի շուրջ համագործակցությունը
1. Կողմերը վերահաստատում են իրենց տարածքների միջեւ միգրացիոն հոսքերի համատեղ կառավարման կարեւորությունը եւ պետք է հաստատեն համապարփակ երկխոսություն միգրացիայի վերաբերյալ բոլոր հարցերի, այդ թվում՝ օրինական միգրացիայի, անօրինական միգրացիայից միջազգային պաշտպանության եւ դրա դեմ պայքարի, մարդկանց ապօրինի տեղափոխման եւ թրաֆիքինգի շուրջ:
2. Համագործակցությունը պետք է հիմնված լինի Կողմերի միջեւ փոխադարձ խորհրդակցության միջոցով անցկացված հատուկ կարիքների գնահատման վրա եւ պետք է իրականացվի իրենց վերաբերելի գործող օրենսդրություններին համապատասխան: Մասնավորապես այն պետք է ուղղված լինի՝
ա) միգրացիայի հիմքում ընկած պատճառների պարզաբանմանը,
բ) միջազգային պաշտպանության մասով ներպետական օրենսդրության եւ գործելակերպի մշակմանը եւ կիրարկմանը՝ նպատակ ունենալով կատարել 1951 թվականի «Փախստականների կարգավիճակի մասին» Ժնեւի կոնվենցիայի եւ փախստականների կարգավիճակի վերաբերյալ 1967 թվականի արձանագրության եւ այլ այնպիսի վերաբերելի միջազգային փաստաթղթերի դրույթները, ինչպիսին է, օրինակ, Մարդու իրավունքների եվրոպական կոնվենցիան, եւ ապահովել «չվերադարձելիության» սկզբունքի պահպանումը,
գ) ընդունման կանոնների եւ ընդունված անձանց իրավունքների ու կարգավիճակի, օրինական բնակվող, քաղաքացի չհանդիսացող անձանց նկատմամբ արդարացի վերաբերմունքի եւ նրանց ինտեգրման, կրթության եւ վերապատրաստման, ինչպես նաեւ ռասիզմի ու օտարատյացության դեմ ուղղված միջոցառումներին,
դ) անօրինական միգրացիայի, միգրանտների ապօրինի տեղափոխման եւ մարդկանց թրաֆիքինգի դեմ ուղղված արդյունավետ եւ կանխարգելիչ քաղաքականության ստեղծմանը, այդ թվում՝ այն խնդրի լուծմանը, թե ինչպես պետք է պայքարել անօրինական ճանապարհով միգրանտներ ներս բերող եւ թրաֆիքինգ իրականացնող անձանց ցանցի դեմ, եւ թե ինչպես պետք է համապատասխան միջազգային փաստաթղթերի շրջանակներում պաշտպանել այդպիսի թրաֆիքինգի զոհերին,
ե) այնպիսի հարցերին, ինչպիսիք են միգրացիայի կառավարման, փաստաթղթերի անվտանգության, մուտքի արտոնագրի քաղաքականության եւ սահմանների կառավարման, ինչպես նաեւ միգրացիայի տեղեկատվական համակարգերի ոլորտներում կազմակերպումը, վերապատրաստումը, լավագույն փորձը եւ մյուս գործառնական միջոցները:
3.Համագործակցությամբ կարող է նաեւ դյուրացվել զարգացման նպատակով շրջանառու միգրացիան:
Անձանց տեղաշարժը եւ հետընդունումը
1. Հետեւյալ համաձայնագրերով պարտավորություններ ստանձնած Կողմերն ապահովում են հետեւյալի լիարժեք կատարումը՝
ա). Եվրոպական միության եւ Հայաստանի Հանրապետության միջեւ «Առանց թույլտվության բնակվող անձանց հետընդունման մասին» համաձայնագիր (Հետընդունման համաձայնագիր), որն ուժի մեջ է մտել 2014 թվականի հունվարի 1-ին, եւ
բ) Եվրոպական միության եւ Հայաստանի Հանրապետության միջեւ «Մուտքի արտոնագրերի տրամադրումը դյուրացնելու մասին» համաձայնագիր (Մուտքի արտոնագրերի դյուրացման համաձայնագիր), որն ուժի մեջ է մտել 2014 թվականի հունվարի 1-ին:
2. Կողմերը պետք է շարունակեն խթանել մուտքի արտոնագրերի դյուրացման համաձայնագրի միջոցով քաղաքացիների շարժունակությունը եւ համապատասխան ժամանակահատվածում քննարկեն մուտքի արտոնագրի ազատականացման շուրջ երկխոսություն սկսելու հարցը՝ պայմանով, որ արդյունավետ կառավարվող եւ անվտանգ շարժունակության վերաբերյալ պայմանները գործեն: Նրանք պետք է համագործակցեն անկանոն միգրացիայի դեմ պայքարի շուրջ, այդ թվում՝ հետընդունման համաձայնագիրը կիրառելու, ինչպես նաեւ սահմանների կառավարման քաղաքականությունը եւ իրավական ու գործառնական շրջանակները խթանելու միջոցով:
Կազմակերպված հանցավորության եւ կոռուպցիայի դեմ պայքարը
1. Կողմերը պետք է համագործակցեն քրեական եւ ապօրինի գործողությունների դեմ պայքարի եւ դրանց կանխարգելման շուրջ՝ ներառյալ անդրազգային կազմակերպված գործողությունները կամ այլ հանցագործություններ, ինչպես օրինակ՝
ա) միգրանտների ապօրինի ներմուծում եւ մարդկանց թրաֆիքինգ,
բ) հրազենի, այդ թվում՝ ՓՏԶԹԶ-ների ապօրինի տեղափոխում եւ առեւտուր,
գ) արգելված թմրանյութերի ապօրինի տեղափոխում եւ առեւտուր,
դ) ապրանքների ապօրինի տեղափոխում եւ առեւտուր,
ե) տնտեսական եւ ֆինանսական ապօրինի գործողություններ, ինչպես, օրինակ, կեղծում, հարկային խարդախություն եւ պետական գնումների հետ կապված խարդախություն,
զ) միջազգային դոնորների կողմից ֆինանսավորվող ծրագրերի միջոցների յուրացում,
է) ակտիվ եւ պասիվ կոռուպցիա՝ եւ՛ մասնավոր, եւ՛ պետական ոլորտներում,
ը) փաստաթղթերի կեղծում եւ կեղծ հայտարարությունների տարածում, եւ
թ) կիբեռհանցագործություն:
2. Կողմերը պետք է ամրապնդեն իրավապահ մարմինների շրջանում երկկողմ, տարածաշրջանային եւ միջազգային համագործակցությունը՝ ներառյալ Եվրոպական միության իրավապահ ոլորտում համագործակցության գործակալության (Եվրոպոլի) եւ Հայաստանի Հանրապետության համապատասխան մարմինների միջեւ համագործակցության հնարավոր զարգացումը: Կողմերը պարտավորություն են ստանձնել արդյունավետորեն ներդնելու համապատասխան միջազգային ստանդարտները, մասնավորապես այն ստանդարտները, որոնք ամրագրված են ՄԱԿ-ի 2000 թվականի «Անդրազգային կազմակերպված հանցավորության դեմ» կոնվենցիայում եւ դրա երեք արձանագրություններում: Կողմերը պետք է համագործակցեն ՄԱԿ-ի 2003 թվականի «Կոռուպցիայի դեմ» կոնվենցիային, Եվրոպայի խորհրդի կոռուպցիայի դեմ պայքարի երկրների խմբի եւ ՏՀԶԿ-ի առաջարկություններին համապատասխան՝ կոռուպցիայի կանխարգելման եւ դրա դեմ պայքարի, գույքի հայտարարագրման ոլորտում թափանցիկության ապահովման, խախտումների մասին տեղեկացնող անձանց պաշտպանության եւ իրավաբանական անձանց վերջնական շահառուների վերաբերյալ տեղեկությունների հրապարակման շուրջ:

Շարունակելի…

ԳՐԱՎԸ ՉԻ ՎԵՐԱԴԱՐՁՎԻ
Իջեւան քաղաքում տեղակայված Տավուշի մարզի թիվ 38 տարածքային ընտրական հանձնաժողովի նախագահ Աիդա Սարգսյանից «Ժողովուրդ» օրաթերթը տեղեկացավ, որ նոյեմբերի 5-ին կայացած ՏԻՄ ընտրությունների կապակցությամբ այդ հանձնաժողովում բողոքներ չեն ստացվել:
Նոյեմբերյան քաղաքում տեղակայված թիվ 37 տարածքային ընտրական հանձնաժողովի նախագահ Գագիկ Աբովյանն էլ հայտնեց, որ Աչաջուր համայնքի ղեկավարի թեկնածու, ՀՀԿ անդամ Տաթեւ Գասպարյանը տարածքային ընտրական հանձնաժողով ներկայացրած բողոքում խնդրել է Աչաջրի ընտրական 2 տեղամասերից մեկում` 37/03-ում քվեների վերահաշվարկ կատարել: Նա դա պատճառաբանել է նրանով, որ ընտրությունների ժամանակ օգտագործված տեխնիկական սարքի ցույց տված ընտրողների քանակը 1-ով պակաս է եղել այդ սարքի թողարկած կտրոնների թվից: Գ. Աբովյանի տեղեկացմամբ՝ տարածքային ընտրական հանձնաժողովը նոյեմբերի 6-ին որոշել է այդ տեղամասում քվեների վերահաշվարկ կատարել: Սակայն այդ վերահաշվարկը դժվար թե անդրադառնա Աչաջրում քվեարկության արդյունքների վրա, քանի որ համայնքի ղեկավարի թեկնածուների ստացած քվեների տարբերությունը մեծ է:
Աչաջուր համայնքի ղեկավարի ընտրություններում անհատ ձեռներեց, ՀՀԿ անդամ 1978թ. ծնված Կարեն Ղալթախչյանը ստացել է 952 ձայն, 2013 թվականից Աչաջուր համայնքը ղեկավարող, ՀՀԿ անդամ, 1957թ. ծնված Կամո Ղալթախչյանը` 623, 1996-1999թթ. Աչաջուր համայնքը ղեկավարած, ՀՀԿ անդամ, 1967թ. ծնված Տաթեւ Գասպարյանը` 557, Աչաջուր համայնքի ավագանու անդամ, ՀՅԴ անդամ, 1985թ. ծնված Սեւադա Ղուկասյանը` 114 ձայն: Անվավեր քվեաթերթիկների թիվը կազմել է 38: Սեւադա Ղուկասյանն իր մուծած 150 հազար դրամ ընտրական գրավը ետ ստանալու համար պետք է ստանար քվեարկությանը մասնակցած ընտրողների թվի 5 տոկոսի չափով քվեներ, Աչաջրում քվեարկությանը մասնակցել է 2284 ընտրող, որի 5 տոկոսը կազմում է 114.2: Սեւադա Ղուկասյանը քվեարկության արդյունքում ստացել է 114 քվե, նրան ընդամենը 0.2 տոկոս քվե չհերիքեց իր մուծած ընտրական գրավը ետ ստանալու համար: Սակայն Ս. Ղուկասյանը ձայների վերահաշվարկ կատարելու համար չի դիմել թիվ 37 տարածքային ընտրական հանձնաժողով: Նոյեմբերի 7-ին՝ ժամը 14-ին, Նոյեմբերյան քաղաքում՝ թիվ 37 տարածքային ընտրական հանձնաժողովում, կսկսվի Աչաջրի 37/03 տեղամասում քվեների վերահաշվարկ, որը, սակայն, ազդեցություն չի ունենա ընտրությունների արդյունքների վրա:

ՈՍԿԱՆ ՍԱՐԳՍՅԱՆ
Տավուշ

ԿԽՍՏԱՑՎԻ ՀՈԳԵՄԵՏ ԴԵՂԵՐԻ ԴՈՒՐՍ ԳՐՄԱՆ ԿԱՐԳԸ
Առաջիկայում կխստացվեն թմրամիջոցների, հոգեմետ նյութեր պարունակող դեղերի, անվճար եւ արտոնյալ կարգով հատկացվող դեղերի գրման, բացթողնման եւ հաշվառման կարգերը: «Ժողովուրդ» օրաթերթը տեղեկացավ, որ Հայաստանի Հանրապետության առողջապահության նախարարությունը մտադիր է մեկ միասնական փաստաթղթով կարգավորել ՀՀ տարածքում դեղերի դեղատոմսերի շրջանառությունը՝ հստակ սահմանելով ՀՀ-ում թմրամիջոցների, հոգեմետ նյութեր պարունակող դեղերի, անվճար եւ արտոնյալ կարգով հատկացվող դեղերի գրման, բացթողնման եւ հաշվառման կարգերը, դեղատոմսերի ձեւերը` համապատասխանեցնելով գործող օրենսդրությանը:
Պատճառն այն է, որ այդ գործառույթները գործող կարգերում կա՛մ նկարագրված են թերի, կա՛մ բացակայում են: Նշենք, որ այս նախագծով դեղատոմսը մնալու է դեղատանը հետագայում վերահսկողություն եւ մշտադիտարկում իրականացնելու նպատակով: Ըստ նախագծի` թմրամիջոցներ եւ հոգեմետ նյութեր պարունակող դեղեր կարող են գրել բժշկական օգնություն եւ սպասարկում իրականացնող հաստատությունների ընտանեկան բժիշկները, ինչպես նաեւ պացիենտին բուժող բժիշկները` անկախ մասնագիտությունից:

ԳՈՒՄԱՐ` ՍԱՐՔԱՎՈՐՈՒՄՆԵՐԻ ՀԱՄԱՐ
ՀՀ բնապահպանության նախարարության բնապահպանության եւ ընդերքի տեսչական մարմնին կհատկացվի 1 մլն 13 հազար 500 դրամ: «Ժողովուրդ» օրաթերթին հայտնի դարձավ, որ նշված գումարով տեսչական միավորումը վարչական սարքավորումներ է գնելու: Օրինակ՝ հատկացված գումարից 300 հզ. դրամը ծախսվելու է մեքենաների սարքավորումների համար: