Ի՞նչ հագնել Ամանորին, եւ ինչպե՞ս զարդարել տոնածառը

ՀԵՏԵՎԵՔ ՄԵԶ Telegram-ՈՒՄ

Ընդամենը մի քանի օրից Ամանոր է, եւ նորաձեւության ոլորտի գիտակները շտապում են խորհուրդներ տալ` ինչ հագնել Նոր տարվա գիշերը, ինչպես զարդարել տոնածառն ու սեղանը: Տոնն առավել գունեղ եւ ներդաշնակ դարձնելու համար ավելորդ չէ լսել մասնագետների կարծիքը: «Ժողովուրդ»-ը թեմայի շուրջ զրուցել է դիզայներ Արամ Նիկոլյանի հետ:

-Արա՛մ, սկսենք այս օրերին ամենաշատը հնչող հարցից` ի՞նչ հագնել Ամանորի գիշերը:

-Առհասարակ, մեր ժամանակներում ամենակարեւոր բանը ինքնատիպ եւ տարբերվող լինելն է: Ամեն բան այնքան միանման է դարձել… Խորհուրդ կտամ Նոր տարվա գիշերը առանձնահատուկ, տարբերվող լինել, անել այնպես, որ Դուք կրեք հագուստը, ոչ թե հագուստը` Ձեզ։

-Իսկ գունային առումով որոշակի նախապատվություններ կա՞ն:

-Մեր օրերում ամեն գույն նորաձեւ է: Իհարկե, կան թրենդային գույներ` կարմիրը, կանաչը, մանուշակագույնը, որոնք դիզայներներն ավելի հաճախ են օգտագործում իրենց հավաքածուներում: Բայց ես կողմ չեմ այն բանին, որ Նոր տարվա գիշերը հագնում են միայն այդ տարվա խորհրդանիշին առնչվող գույնի, ձեւի զգեստներ, օրինակ` դեղին շան տարում` դեղին, օձի տարում` օձի պրինտով զգեստ եւ այլն: Այդ ամենն այնքան էլ կապ չունի նորաձեւության հետ: Պետք է հագնվել տվյալ միջավայրին համապատասխան: Եթե երեկույթի եք մասնակցելու, կրեք էլեգանտ զգեստ, եթե տանն եք անցկացնելու Ամանորը, ուրախ, գունեղ, թեմատիկ բլուզներ եւ այլն:

-Երբեմն նկատելի է տոնական զգեստների հետ երկարաճիթ կոշիկների համադրությունը: Սա, թերեւս, սխալ մոտեցում է, այո՞:

-Միանշանակ, զգեստի հետ հարկավոր է կրել բարձրակրունկ, դասական կոշիկներ` անկախ եղանակային պայմաններից, իսկ եթե տոնը տանն եք նշելու, բնականաբար, նախապատվությունը տրվում է ավելի թեթեւ մոդելներին:

-Գիտենք, որ տոնածառը Ձեր թուլությունն է, եթե ոչինչ էլ չանեք, այն պետք է առանձնահատուկ լինի: Ինչպե՞ս ստանալ չկրկնվող, յուրահատուկ տոնածառ:

-Այո՛, այդ աքսեսուարը սեղանից շատ եմ կարեւորում: Հատկապես վերջին տարիներին կարող եմ սեղանին քիչ բան դնել, բայց տոնածառը պետք է ինքնատիպ, աչք շոյող լինի: Տոնածառը զարդարելիս խորհուրդ եմ տալիս ինչ-որ թեմատիկ ուղղություն, գունային գամմա ընտրել: Չեմ սիրում, երբ մաքսիմալիզմ են ցուցաբերում եւ այնքան են ընկնում զարդարանքի հետեւից, որ ծառը խաղալիքների, բմբուլների ու ծաղիկների տակից պարզապես չի երեւում:

-Տոնածառի զարդարման ժամանակ որքանո՞վ է կարեւոր սիմետրիային հետեւելը:

-Կոմպոզիցիոն առումով տոնածառի տեսքը պետք է չխախտվի: Ինչպես հագուստի սխալ ընտրության դեպքում մարդը կարող է դեգրադացվել, նույն կերպ էլ սխալ խաղալիքների ընտրության դեպքում` տոնածառը: Պետք է հաշվի առնել, որ տոնածառն ունի հստակ ֆորմա` ներքեւում լայն է, վերեւում արդեն աստիճանաբար նեղանում է, ուստի զարդերը ներքեւում պետք է լինեն խոշոր, իսկ վերեւում աստիճանաբար փոքրանան:

-Կարծես թե ակտուալ են միագույն տոնածառները:

-Դե, դա մոտեցման հարց է, ամեն դեպքում, հարկավոր է ունենալ ակցենտավորված անկյուն: Տարածված է կապույտի ու արծաթագույնի, կարմիրի ու ոսկեգույնի համադրությունը: Իհարկե, կան այլ տարբերակներ եւս, որոնք կարելի է կիրառել, բայց դրանք ամենահեշտ նշածս տարբերակները` գույներն են, ուստի մարդիկ ռիսկ չեն անում էքսպերիմենտներ անել, ավելորդ ջանք ու եռանդ ծախսել:

-Որոշ դիզայներներ խորհուրդ են տալիս տոներին ակտիվորեն կիրառել նաեւ սեւը: Դուք ի՞նչ կասեք:

-Սեւն, առհասարակ, ինձ համար այն գույնն է, որը միշտ նորաձեւ է եւ իր մեջ կրում է մնացած բոլոր գույները: Այն համադրվում է ցանկացած այլ գույնի հետ, եւ դրանով ամեն ինչ ասված է: Այդ իսկ պատճառով սեւին վատ չեմ վերաբերվում, հաճախ կիրառում եմ այն իմ մոդելավորած զգեստներում եւ այլն: Բայց սեւն էլ պետք է մատուցել գրագետ եւ ճիշտ:

-Դուք դեպի հայկական արմատները գնացող դիզայներ եք, հետաքրքիր է` տոնածառի զարդարման հարցում նման մոտեցում չե՞ք ցուցաբերում:

-Մինչ օրս նման փորձ չեմ ունեցել: Եթե մի օր կարողանամ միքսել ավանդականն ու ժամանակակիցը, հետաքրքիր լուծում կստանամ:

Աննա Բաբաջանյան




Լրահոս