«ՕՊԵՐԱՅԻՆ ԹԱՏՐՈՆԸ ՎԵՐԱԾՎԵԼ Է «ԳՐԴՈՆԻ ՏԱՐԱԾՔԻ»»

ՀԵՏԵՎԵՔ ՄԵԶ Telegram-ՈՒՄ

Օպերային երգիչ, Հայաստանի ժողովրդական արտիստ Բարսեղ Թումանյանը, ով ապրում է Ղազախստանի մայրաքաղաք Աստանայում եւ աշխատում է տեղի օպերային թատրոնում, նաեւ Արվեստների համալսարանի պրոֆեսոր է, «Ժողովուրդ» օրաթերթի հետ զրուցել է Հայաստան վերադառնալու, մեր օպերային թատրոնի գործունեության եւ այլ թեմաների շուրջ: Մեր զրուցակիցը կարծիք է հայտնել՝ լավ կառավարվող օպերային թատրոն ունենալու համար անհրաժեշտ է ունենալ քաղաքակիրթ քաղաքացի:

-Պարո՛ն Թումանյան, գիտենք, որ շարունակում եք հաջողություններ գրանցել արտերկրում, իսկ հետաքրքիր է՝ Հայաստանում հանդես գալու ցանկություն ունե՞ք:
-Ցանկություն, իհարկե, կա: Դեռ պետք է խորհրդակցել:
-Օպերային թատրոնի տնօրեն եւ գեղարվեստական ղեկավար Կոնստանտին Օրբելյանից նման առաջարկ ստացե՞լ եք: Կպատմե՞ք այդ մասին:
-Օրբելյանի հետ մտածում ենք իրականացնել մի ծրագիր, որը կոչվում է «Թումանյան եւ ընկերներ», բայց ժամկետների առումով դեռ ոչինչ պարզ չէ: Կարող եմ միայն ասել, որ նախորդ տարի եղավ առաջին համերգը, տեսնենք՝ հետագայում երբ կստացվի համերգ ունենալ:
-Իսկ Դուք հեռվից հետաքրքրվո՞ւմ եք՝ ինչպիսի՞ն է Հայաստանի օպերային թատրոնի վիճակը, ինչպե՞ս է այն կառավարվում: Ի՞նչ բացթողումներ եք տեսնում:
-Ես ունեմ իմ դիրքորոշումը Ազգային օպերային թատրոնի ռազմավարության վերաբերյալ, բայց չունեմ բարոյական իրավունք խորհուրդ տալու կամ գնահատական հնչեցնելու, թե ինչ է արվում կամ ինչպես է արվում: Այդ հարցը միշտ էլ ծառացած է եղել, եւ քանի դեռ օպերային թատրոնին չեն վերաբերում որպես արարող տաճարի կամ մշակութային կոթողի, ոչինչ չի փոխվի: Անձը շատ կարեւոր է, բայց չեմ ցանկանում ոմանց գնահատականներ տալով՝ պատճառաբանել մեր այսօրվա վիճակը: Մինչ Օրբելյանի գալը թատրոնը վերածվել է մի «գրդոնի տարածքի» եւ դեռ այսօր իր տեսքը պահպանում է: Այն էապես փոխելը եւ մշակութային կոթողի վերածելը ո՛չ խորհուրդ տալով, ո՛չ էլ որոշ անձանց փոխարինելով չի ստացվի: Դա շատ լուրջ խնդիր է, եւ ո՛չ ես, ո՛չ էլ որեւէ մեկը դրսից ոչինչ անել չի կարող: Օրբելյանն այսօր լավագույն ընտրությունն է, եւ նրան օգնելով՝ կարելի է մի քիչ շունչ տալ թատրոնին, բայց որքա՞ն դա կտեւի, պարզ չէ:
-Իսկ ի՞նչ է պետք, որպեսզի օպերային թատրոնը վերածվի մշակութային կարեւոր կոթողի, որը կլինի որակի ցուցիչ:
-Որպեսզի ունենանք թատրոն, պետք է ունենանք քաղաքակիրթ հասարակություն: Ո՞վ է ձեւավորելու այդ քննադատ եւ քաղաքակիրթ քաղաքացուն: Այդ հարցի շուրջ մտորումներ եւ առաջարկներ եղել են, բայց «նաղդից լավը չկա»-ի փաստը մեզ բերեց ռաբիսի եւ գողականի մեծարմանը: Դա է մեծարվում, այդտեղից է փողի աղբյուրը, այդտեղ էլ ձգտում են: Ես ունեմ հայ կոչվածի իմ ձեւակերպումը. հայը նա է, ով պաշտում է իր կատարյալ տեսակը կամ իր «կատարելությունը»: Ինչ արժեքներով ձեւավորենք մեր կյանքը, այդ արժեքների տերն էլ կլինենք: Ես ինձ էլ չեմ կարող հայկական օպերայի մաս համարել, քանի որ վանվել եմ մոտ 20 տարի: Իհարկե, համաշխարհային օպերային արվեստի մաս կարող եմ լինել եւ, իհարկե, ներկայացնում եմ Հայաստանը: Բայց մեր օպերային թատրոնի հետ կապված, բացի հրավերներին պատասխանելուց, ավել ոչինչ չեմ կարող անել: Ինչ վերաբերում է Աստանայում իմ գործունեությանը, կարող եմ ասել, որ այստեղ հնարավորությունները մեծ են, գաղափարը բավական հստակ է դրված՝ ինչ է արվում՝ ինչի հասնելու համար:
-Իսկ ո՞րն եք համարում Ձեր առաքելությունը:
-Ես Հայաստանի ժողովրդական արտիստ եմ, եւ իմ առաքելությունը հայ մշակույթը ներկայացնելն է ամենուր, որը եւ անում եմ թե՛ Ղազախստանում, թե՛ Չինաստանում, թե՛ ԱՄՆ-ում:

Զրուցեց ԱՆՆԱ ԲԱԲԱՋԱՆՅԱՆԸ

 

 

 

«ԻՆՉՈ՞Ւ ԵՔ ՀԱՅՀՈՅՈՒՄ ԱՄԱՆՈՐԻՆ, ՎԱ՞Տ Է, ՈՐ ԵԿԵԼ Է»
Նախկին «Վիտամին» ակումբի անդամ, «Քարե դարդ» հեռուստատեսային նախագծից հայտնի դերասան, հումորիստ Վաչեն այս տարի Ամանորի գիշերը կանցկացնի Հայաստանում. «Եթե աշխատանքի չլինեմ, Նոր տարվա գիշերը կլինեմ տանը. դա կլինի հազվագյուտ մի բան վերջին տարիների ընթացքում, քանի որ նախկինում Ամանորը կա՛մ անցկացրել եմ արտերկրում, կա՛մ եղել եմ հայրենիքում, բայց աշխատանքի վայրում»,- ասաց հումորիստը:
Վաչեն նշեց, որ դեռ փոքր տարիքից սիրել է Ամանորը եւ մինչեւ հիմա էլ սիրում է ընտանեկան այդ տոնը. «Չեմ ընդունում, երբ մարդիկ դժգոհում են, տրամադրությունները գցում են, որ տոները մոտենում են, անգամ սկսում են հայհոյել: Ինչո՞ւ եք վատ խոսքեր ասում Ամանորին, վա՞տ է արել, որ եկել է»,-կես-կատակ-կես-լուրջ նկատեց մեր զրուցակիցը:
Վաչեն, ի դեպ, խոստովանեց, որ ավանդական ուտեստների սիրահար է. «Հետեւում եմ, որ սեղանին բոլոր ավանդական ուտեստները դրված լինեն: Եղել են տարիներ, որ սեղանին բուդ չենք դրել, տրամադրությունս ընկել է: Բուդը, հնդկահավը պարտադիր են, եթե կարողանանք Վրաստանից էլ գոճի բերել, ավելի լավ»,-կատակեց դերասանը:
Հարցին, թե որն է այն իրը, որը նա ասոցացնում է Ամանորի հետ, Վաչեն պատասխանեց. «Մենք ունենք տոնածառի հին խաղալիքների հավաքածու, դրանց շարքում կա խորհրդային տարիներից մնացած մի տնակ, երբ դա տեսնում եմ, տրամադրությունս անմիջապես բարձրանում է, ասոցացնում եմ Նոր տարվա, իմ մանկության հետ»:
Նաեւ հետաքրքրվեցինք՝ ո՞րն է հումորիստի սիրելի ամանորյա ֆիլմը. «Երբեք չեմ հոգնի դիտել «Ճակատագրի հեգնանք կամ բաղնիքդ անուշ» ֆիլմը, ինչպես նաեւ «Տանը միայնակ» կատակերգությունը»,-նշեց Վաչեն:
Քանի որ այս տարի Վաչեի դստեր առաջին Ամանորն է, տոնը դերասանի համար առանձնակի նշանակություն է ձեռք բերել. «Իմ ուրախությունն արդեն իր ուրախությունն է: Կուզենամ ամեն կերպ հիշարժան դարձնել երեխայիս տոնը»,-անկեղծացավ դերասանը՝ հավելելով, որ տոնը նախ նշում է ընտանիքով, ապա գնում է պապիկի տուն՝ շարունակելու այն, իսկ հետո արդեն ընկերական միջավայրում տրվում է խրախճանքին:
Վաչեն խոստովանեց, որ ինչպես ամեն տարի, այս տարի եւս ունի նվիրական ցանկություն, սակայն չի բարձրաձայնի դրա մասին, որպեսզի այն կատարվի. «Իսկ, առհասարակ, ինձ համար ամենակարեւորն այն է, որ երկրում խաղաղություն եւ ստաբիլություն լինի, այլապես մեր աշխատանքը, որը անմիջականորեն կապված է հումորի հետ, չի երեւում ո՛չ մեր, ո՛չ էլ ժողովրդի աչքին: Թող 2018-ը բոլորիս մոտ ապահովի բարձր տրամադրություն»,-եզրափակեց նա:

ԱՆԻ ԱՆՏՈՆՅԱՆ




Լրահոս