Երեկ տեղեկություն տարածվեց, թե Էներգետիկայի եւ բնական պաշարների նախարար Աշոտ Մանուկյանը հրաժարականի դիմում է ներկայացրել: Սակայն նախարարի մամուլի խոսնակ Վասակ Թարփոշյանը նշել էր, թե նախարարն աշխատանքի մեջ է եւ շարունակում է նախկինի պես աշխատել:
Եվ չնայած, ըստ մամուլի խոսնակի, նախարարը շարունակում է նախկինի պես աշխատել, սակայն երեկ ArmLur.am-ի թղթակիցը նկատեց, որ նա բացակայում էր խորհրդարանում, երբ ընթանում էր կառավարություն-Ազգային ժողով հարցուպատասխանը: Ընդ որում, երբ ԱԺ նախագահ Արա Բաբլոյանը թվարկում էր հարցուպատասխանից բացակայող նախարարների անունները, նրա անունն առհասարակ չնշվեց, իսկ մյուս բացակաների դեպքում նշվեց վերջիններիս գործուղման լինելու փաստը:
Սակայն այսօր Աշոտ Մանուկյանը ներկա էր կառավարության նիստին, սակայն լրագրողներն այդպես էլ հնարավորություն չունեցան հարցեր ուղղել նախարարին: Նա սովորույթի համաձայն գերադասեց շենքից հեռանալ հետնամուտքով՝ խուսափելով լրագրողներից:
.gif)
