ԼՈՒՐ ԿԱԴՐ

Լուսանկարը` համացանցից

Փաստորեն վերելակից օգտվելու համար նախ պետք է ուշադիր կարդալ այս գրությունն ու ծանոթանալ նշված կետերին: Այստեղ կարեւորը զգոնությունն ու գույները շչփոթելու կարողությունն է, թե չէ ճակատագրական կլինի…: Մեր երկրի վերելակային «քաղաքականության» հերթական սեւ հումորը…

ՀԱՐՑ. Խնդրում եմ ասեք` սոցիալական փաթեթից օգտվող քաղաքացիների համար դժվարամատչելի հետազոտություններն ի՞նչ կարգով են տեղի ունենում: Դրանք անվճա՞ր են կատարվում, թե՞ պետք է որոշակի գումար վճարել:

Սիլվա Տոնոյան (59 տարեկան, պատմաբան)

ՊԱՏԱՍԽԱՆ. Տեղեկացնում ենք, որ Հայաստանի Հանրապետության կառավարության 27.03.2014 թվականի թիվ 375-ն որոշման համաձայն` արտահիվանդանոցային պայմաններում իրականացվող առանձին հատուկ եւ դժվարամատչելի հետազոտությունների մասով գործում է համավճար: (Հիմք` ՀՀ կառավարության 27 մարտի 2014 թվականի թիվ 375-ն որոշում):

Հայաստանի Հանրապետության առողջապահության նախարարություն

«ԺՈՂՈՎՈՒՐԴ». Ավելացնենք, որ անհետաձգելի հիվանդանոցային բժշկական օգնություն պահանջող դեպքերում շահառուները կարող են ծրագրի շրջանակներում բժշկական օգնություն ու սպասարկում ստանալ շտապ օգնության ծառայության ուղեգրով:

ՀԱՐՑ. Ես ուզում եմ իմանալ` եթե անձը ստանում է արտոնյալ պայմաններով կենսաթոշակ, ապա ո՞ր դեպքում կարող է դիմել` վերահաշվարկ կատարելու համար: Եվ խնդրում եմ նշել նաեւ մասնակի կենսաթոշակի վերահաշվարկի մասին:

Լաուրա Ֆեռոյան (61 տարեկան, տնային տնտեսուհի)

ՊԱՏԱՍԽԱՆ. Լ. Ֆեռոյանի հարցին ի պատասխան` տեղեկացնում ենք, որ արտոնյալ պայմաններով նշանակված կենսաթոշակը վերահաշվարկվում է, եթե փոխվել են հիմնական կենսաթոշակի չափը կամ աշխատանքային ստաժի մեկ տարվա արժեքը, ներկայացվել է մինչեւ կենսաթոշակ նշանակելը ընկած ժամանակահատվածի վերաբերյալ լրացուցիչ փաստաթղթեր կամ լրացել է տարիքային աշխատանքային կենսաթոշակի իրավունք տվող տարիքը:
Ինչ վերաբերում է մասնակի կենսաթոշակի վերահաշվարկին, ապա հայտնում ենք, որ այս դեպքում վերահաշվարկ տեղի է ունենում, եթե փոխվել են հիմնական կենսաթոշակի չափը կամ աշխատանքային ստաժի մեկ տարվա արժեքը, ներկայացվել է մինչեւ կենսաթոշակ նշանակելը ընկած ժամանակահատվածի վերաբերյալ լրացուցիչ փաստաթղթեր կամ լրացել է տարիքային աշխատանքային կենսաթոշակի իրավունք տվող տարիքը:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Նշենք, որ արտոնյալ պայմաններով կենսաթոշակ նշանակվում է 55 տարին լրացած անձին այն դեպքում, եթե նա ունի առնվազն 25 օրացուցային տարվա աշխատանքային ստաժ, որից առնվազն 15 օրացուցային տարին աշխատել է առանձնապես վնասակար, առանձնապես ծանր պայմաններում եւ այդ ժամանակահատվածում լրիվ աշխատանքային օրը կատարել արտոնյալ կենսաթոշակի իրավունք տվող աշխատանք: Արտոնյալ պայմաններով կենսաթոշակը նշանակվում է մինչեւ տարիքային աշխատանքային կենսաթոշակի իրավունք տվող տարիքը լրանալը: