ԼՈՒՐ ԿԱԴՐ

Լուսանկարն արվել է Մաշտոցի պողոտայում

Թեեւ Ամանորը վաղուց արդեն անցյալում է, սակայն Մաշտոցի պողոտայում տեղադրված այս գովազդային վահանակի հեղինակները պատրաստակամ են Ձմեռ պապի եւ Ձյունանուշի ծառայություններ մատուցելու հարցում… տարվա բոլոր եղանակներին J:

ՀԱՐՑ. Ես ունեմ ավտոլվացման կետ: Ուզում եմ իմանալ` արդյո՞ք պարտավոր եմ ավտոլվացման գործունեություն իրականացնելու համար արտոնագրային վճար մուծել:

Մելիք Հարությունյան (38 տարեկան)

ՊԱՏԱՍԽԱՆ. Տեղեկացնում ենք, որ 14.09.2012թ. N 25 ««Արտոնագրային վճարների մասին» Հայաստանի Հանրապետության օրենքի» կիրառման որոշ հարցերի վերաբերյալ» պաշտոնական պարզաբանման 20-րդ կետի դրույթներով` ավտոտեխսպասարկման կայանների (կետերի) միջոցով ավտոտրանսպորտային միջոցների տեխնիկական սպասարկումը դասակարգվում է Հայաստանի Հանրապետության էկոնոմիկայի նախարարի` 03.06.2009 թվականի «ՀՀ դասակարգիչ հաստատելու մասին» N372-Ն հրամանով հաստատված տնտեuական գործունեության տեuակների ՀՀ դաuակարգչի 45.20.1 ծածկագրին:
Այդ ծածկագիրն իր մեջ ներառում է ավտոմեքենաների մեխանիկական եւ էլեկտրական սարքավորանքի, թափքի, ներարկման համակարգի, շարժիչի տեխնիկական սպասարկումը եւ նորոգումը, ավտոմեքենաների լվացումը, փայլեցումը եւ այլն:

Հայաստանի Հանրապետության պետական եկամուտների կոմիտե

«ԺՈՂՈՎՈՒՐԴ». Նշենք, որ «Արտոնագրային վճարների մասին» Հայաստանի Հանրապետության օրենքի 2-րդ հոդվածի դրույթներով` արտոնագրային վճարը գործունեություն իրականացնող ֆիզիկական անձի համար եկամտահարկին եւ իրավաբանական անձի համար շահութահարկին եւ ավելացված արժեքի հարկին փոխարինող պետական բյուջե մուծվող պարտադիր եւ անհատույց վճար է:

ՀԱՐՑ. Խնդրում եմ ասեք` ընտանեկան կարգավիճակի մասին տեղեկանք ձեռք բերելու համար ո՞ւմ կարող եմ դիմել: Խնդրում եմ ներկայացնել նաեւ պահանջվող փաստաթղթերի ցանկը:

Տաթեւ Իսրայելյան (48 տարեկան, տնային տնտեսուհի)

ՊԱՏԱՍԽԱՆ. Տ. Իսրայելյանի հարցին ի պատասխան` տեղեկացնում ենք, որ ընտանեկան կարգավիճակի մասին տեղեկանքը տրամադրվում է Հայաստանի Հանրապետության արդարադատության նախարարության կողմից: Տեղեկանքը ստորագրվում է Հայաստանի Հանրապետության ԱՆ քաղաքացիական կացության ակտերի գրանցման գործակալության պետի կողմից եւ կնքվում գործակալության եռալեզու կնիքով:
Անհրաժեշտ է ներկայացնել`
– հայերեն, (ձեւ N 1); հայերեն-անգլերեն (ձեւ N 2) կամ հայերեն-ռուսերեն (ձեւ N 2):
Նշենք, որ մեկ դիմումի շրջանակներում տրամադրվում է մեկ տեղեկանք: Տրամադրվող տեղեկանքի տարբերակը ընտրվում է դիմումատուի կողմից: Տեղեկանքը տրամադրվում է դիմում ներկայացնելուց հետո` 7-րդ աշխատանքային օրը: Հայաստանի Հանրապետության բնակչության պետական ռեգիստրում հաշվառված ՀՀ-ում մշտական բնակության վայր չունեցող ՀՀ քաղաքացիների վերաբերյալ տեղեկանքը տրամադրվում է 10-րդ աշխատանքային օրը: Տեղեկանքի տրամադրման համար գանձվում են հետեւյալ պետական տուրքերն ու արտաբյուջետային վճարումները` 7 աշխատանքային օրը հայերեն լեզվով տեղեկանք տրամադրելու դեպքում` 1.000 ՀՀ դրամ; Հայաստանի Հանրապետության բնակչության պետական ռեգիստրում հաշվառված ՀՀ մշտական բնակության վայր չունեցող ՀՀ քաղաքացիների վերաբերյալ հայերեն լեզվով տեղեկանք տրամադրելու դեպքում` 16.000 դրամ:

Հայաստանի Հանրապետության արդարադատության նախարարություն

«ԺՈՂՈՎՈՒՐԴ». Նշենք, որ տեղեկանքի կորստյան դեպքում անհրաժեշտ է օրենսդրությամբ սահմանված կարգով ներկայացնել նոր դիմում: