Ազգային ժողովում կան տասնյակ պատգամավորներ, ովքեր նիստերի ընթացքում ծպտուն չեն հանում: Նրանք գրեթե երբեք օրենսդրական նախաձեռնություններով հանդես չեն գալիս` լավագույն դեպքում ստորագրելով գործընկերների հեղինակած նախագծերի տակ, հարցեր չեն ուղղում, եթե, իհարկե, խմբակցությունում նրանց ձեռքը գրված հարց չեն տվել՝ վարժ ընթերցելու համար: Փոխարենը այդ մարդիկ աշխատավարձ են ստանում հարկատուներիս հաշվին մոտ հազար դոլարի չափով: «Ժողովուրդ» օրաթերթը զրուցել է ՀՀԿ խմբակցույթունից Արսեն Միխայլովի հետ` փորձելով պարզել մի շարք հարցերի վերաբերյալ նրանց դիրքորոշումը:
-Պարո՛ն Միխայլով, Դուք ԱԺ պատգամավոր եք, բայց առանձնապես ակտիվություն չեք ցուցաբերում: Ի՞նչն է պատճառը:
-Ի՞նչ առումով ակտիվություն չեմ ցուցաբերում, ասե՛ք…
-Ելույթների տեսքով, հարցերի տեսքով: Բացի այդ` Դուք ունե՞ք մասնակցություն որեւէ օրենսդրական նախաձեռնության մեջ:
-Մենք հիմնականում…իհարկե, ունենք մասնակցություն… եւ հանձնաժողովներում: Բայց ինչ վերաբերում է դահլիճում ակտիվությանը, այն հարցերը, որոնք ես գտնում եմ` պետք է ակտիվ լինեմ, ես ակտիվ եմ: Եթե գտնում եմ, որ պետք է հարց բարձրացնեմ, ելույթ ունենամ, ես ունենում եմ ակտիվություն:
-Իսկ մյուս հարցերում, որոնք հասարակական հետաքրքրություն են ներկայացնում, Դուք ակտիվություն չեք ցուցաբերում: Ի՞նչն է պատճառը, կաշկանդվա՞ծ եք:
-Ես չէի ասի…կներեք:
-Այդ դեպքում ինչո՞ւ Ձեր տեսակետը չեք ներկայացնում:
-Իմ տեսակետը միշտ ներկայացրել եմ:
-Պատգամավորի առաքելությունը ո՞րն է խորհրդարանում, ըստ Ձեզ:
-Դուք մի հարցից արդեն մյուսին եք, հա, տեղափոխվում: Հետո կասեմ, կգա ժամանակը:
-Հիմա ժամանա՞կը չէ:
-…որ ակտիվություն ցուցաբերե՞մ:
-Բա ինչո՞ւ ակտիվ չեք, եթե եկել եք խորհրդարան:
-Էդ Ձեզ է թվում, որ ակտիվ չեմ: Շնորհակալությո՛ւն, կներեք:
Մանրամասները` տեսանյութում
Մերի Մարտիրոսյան, Հովսեփ Հովսեփյան
.gif)
