Մի քանի սցենարներ են մշակվում. ինչ որոշում կկայացվի «Ելք»-ում

Երեկ մինչեւ ուշ երեկո շարունակվում էր ԱԺ «Ելք» խմբակցության նիստը: Իսկ քննարկումների թեման դաշինքի կողմից Սերժ Սարգսյանի վերարտադրության դեմ պայքարի ձեւաչափի մասին որոշումն էր: Սակայն մի քանի ժամ տեւած քննարկման արդյունքում «Ելք»-ի ներկայացուցիչներն այդպես էլ ընդհանուր եզրահանգման չեն եկել, եւ որոշվել է քննարկումները շարունակել: Ըստ մեր տեղեկությունների` «Ելք» խմբակցության մի մասը` ԱԺ «Ելք» խմբակցության ղեկավար Նիկոլ Փաշինյանի գլխավորությամբ, կողմնակից է եղել փողոցային պայքար սկսելուն, ինչդեռ Էդմոն Մարուքյանն իր կողմնակիցների հետ դեմ է եղել` համարելով այն անհեռանկարային, ոչինչ չտվող: Թեմայի շուրջ «Ժողովուրդ» օրաթերթը զրուցել է ԱԺ «Ելք» խմբակցության քարտուղար Գեւորգ Գորգիսյանի հետ:

-Պարո՛ն Գորգիսյան, ինչո՞ւ այդպես էլ որեւէ որոշում չկայացվեց:

-Անհրաժեշտ է ամեն ինչ ճիշտ հաշվարկել, որպեսզի որոշումն էլ լինի այդպիսին:

-Ձեր դաշինքի տարբեր ներկայացուցիչներ չեն հերքում, որ կան տարաձայնություններ, թե Սերժ Սարգսյանի վերարտադրության դեմ ուղղված պայքարն ինչ ձեւով ընթանա: Հիմա, ի վերջո, ըստ Ձեզ` հասնելո՞ւ եք ընդհանուր հայտարարի:

-Դե, մեզ մոտ շատ հարցերի շուրջ կա բազմակարծություն, եւ դա նորմալ է: Մենք միշտ քննարկումներով մինչեւ հիմա եկել ենք կոնսենսուսի: Կարծում եմ` այս պարագայում էլ կհաջողենք:

-Դուք ինքներդ պայքարի հարցում ո՞ր ճանապարհի կողմնակից եք:

-Քանի որ ամեն ինչ դեռ քննարկման փուլում է, հիմա որեւէ բան չեմ կարող բարձրաձայնել:

-Կոնկրետ Ձեր տեսակետը…

-Ժամանակը կգա, ես իմ տեսակետը դաշինքի նիստում կարտահայտեմ, արտահայտել եմ, արտահայտում եմ:

-Իսկ հնարավո՞ր է` դաշինքի միայն մի մասը պայքարի Սերժ Սարգսյանի վարչապետության դեմ:

-Ասում եմ` երբ կլինի որոշում, կերեւա: Հիմա մի քանի սցենարներ քննարկվում են: Փաստարկները ծանրութեթեւ ենք անում:

-Այն, որ բավական երկար տեւեց քննարկումը, խոսում է այն մասին, որ իսկապես շա՞տ են տարաձայնությունները:

-Դա վկայում է այն մասին, որ մենք լուրջ ենք մոտենում խնդրին եւ մեր ցանկացած քայլի: Սա առաջին դեպքը չի, որ մենք երկար քննարկումներ ենք ունենում: Ուղղակի այս հարցի շուրջ հասարակության, լրագրողների հետաքրքրությունը չափից շատ մեծ է` երեւի հարցի կարեւորությունից ելնելով:

-Նիկոլ Փաշինյանն այս հարցում փողոցային պայքարի կողմնակից է, իսկ Էդմոն Մարուքյանը կարծում է, որ Սերժ Սարգսյանի վերարտադրության դեմ պայքարելու ժամանակն անցել է: Ստացվում է` դաշինքի երկու առանցքային ներկայացուցիչներ տարբեր դիրքորոշումներ ունեն:

-Այդ դիրքորոշումներն ավելի հիմնավոր են, բազմակողմանի եւ բազմաթիվ են:

-Իսկ գուցե՞ դաշինքի որոշ ներկայացուցիչների հանդեպ ճնշում կա, որ վերջնական եզրահանգման դեռ չեք հասել:

-Բացարձակ: Մեր դեմ որեւէ ճնշում չեն կարող գործադրել, որովհետեւ մենք չունենք այն թույլ կետերը, որտեղ կարող են ճնշել: Որեւէ հարցով մեզ վրա ճնշում չի եղել: Չեմ հասկանում` ինչ ճնշման մասին է խոսքը:

-Եթե ընտրվի փողոցային պայքարի ճանապարհը, ըստ Ձեզ` «Ելք» դաշինքին կհաջողվի՞ հավաքել մարդկանց մեծ զանգված: Չէ՞ որ դաշինքի նախորդ` թանկացումների դեմ ուղղված հավաքին մեծ չէր մարդկանց թիվը:

-Երբ կունենանք որոշում, այն կլինի հիմնավորված եւ կտա բոլոր հարցերի պատասխանը:

զրուցեց Մերի Մարտիրոսյանը