2016 թ. ապրիլի 12-ին ղարաբաղա-ադրբեջանական շփման գծում ռազմական գործողությունների հետևանքով պայմանագրային զինծառայող, խաղաղապահ, ավագ սերժանտ Դավիթ Համբարձումովը ստացել է գլխուղեղի ծանր հրազենային վնասվածք, ունի աջակողմյան թուլություն:
Դավիթը առաջին կարգի հաշմանդամ է, ստանում է 97 հազար դրամ հաշմանդամության կենսաթոշակ:
ArmLur.am-ի հետ զրույցում Դավիթը դժվարացավ պատմել, թե ինչպես է վիրավորվել միայն նշեց, որ վիրավորվել է գիշերը՝ Թալիշի դիրքերում. «Մեր ուղղությամբ անընդհատ կրակում էին, ու տենց կրակի տակ ընկա և գլխուղեղի հատվածում հրազենային վիրավորում ստացա»:
Դավիթ Համբարձումովին մարտի դաշտում առաջին բուժօգնություն ցույց են տվել ընկերները, որից հետո տեղափոխել են Մարտակերտ, ապա Ստեփանակերտի Զինվորական կլինիկա, որտեղ շտապ ենթարկվել է վիրահատության: Այնուհետև վիճակը կայունանալուց հետո տեղափոխել են Երևանի Կենտրոնական զինվորական կլինիկական հոսպիտալ:
«Ինձ պատմում են, որ Մուրացանի հոսպիտալում 20 օր կոմայի մեջ եմ եղել, որից հետո տեղափոխվել եմ Կարմիր խաչի վերականգնողական կենտրոն: Գլխուղեղիս ոսկորը քանի որ հեռացված էր, վիրահատության միջոցով գլխուղեղի ոսկորին փոխարինող «տիտանային թիթեղ» են տեղադրել»,- ասաց նա:
Մեր զրուցակիցը նաև նշեց, որ առողջական խնդիրներ կան հենաշարժողական համակարգի հետ կապված. «Չեմ կարողանում ինքնուրույն քայլել, տեղաշարժվել»:
Հավելենք, որ Դավիթը ամուսնացած է, ունի երկու երեխա: Ընտանիքի ամբողջ կարիքները հոգում է իր կենսաթոշակով:
Լիդա Եղիազարյան
.gif)
