Ոստիկանությունը շարունակում է արտակարգ ռեժիմով ծառայությունը՝ նոր կորոնավիրուսի հնարավոր տարածումը կանխելու նպատակով։ Մայիսի 26-ի վաղ առավոտից հանրապետության ողջ տարածքում վերսկսվեցին ոստիկանության արտաքին ծառայության ստորաբաժանումների գործողությունները՝ Պարետի որոշումների պահանջների կատարումն ապահովելու նպատակով։
Շարունակվում է արդյունավետ վերահսկողությունը կանոնավոր եւ ոչ կանոնավոր ուղեւորափոխադրումներ իրականացնող տրանսպորտային միջոցների գործունեության ընթացքում անհրաժեշտ անվտանգության կանոնների պահպանման նկատմամբ։ Ոստիկանության կարգախմբերը հետեւում են, որ միկրոավտոբուսներով եւ ավտոբուսներով տեղափոխվեն միայն նստելու համար հատկացված տեղերին համապատասխան թվով ուղեւորներ։ Հետեւում են, որ ուղեւորափոխադրող բոլոր տրանսպորտային միջոցների մուտքի մոտ պարտադիր տեղադրված լինեն ալկոհոլային հիմքով ձեռքի ախտահանիչներ, ուղեւորներն ու վարորդը պարտադիր կրեն պաշտպանիչ միջոցներ։ Մայիսի 26-ի ժամը 13-ի դրությամբ հայտնաբերվել է հիշյալ կանոնների խախտումների 4 դեպք։
Պարետի որոշման համաձայն` արգելվում է տաքսի ծառայություն մատուցող տրանսպորտային միջոցներում ուղեւորի` վարորդի կողքին նստելը։ Բացի այդ, տաքսու վարորդները եւ ուղեւորները եւս պարտադիր պետք է կրեն դիմակներ եւ ձեռնոցներ։ Այս ուղղությամբ ոստիկանության արտաքին ստորաբաժանումների ծառայությունը շուրջօրյա է։ Մայիսի 26-ի ժամը 13-ի դրությամբ հայտնաբերվել է հիշյալ կանոնների խախտումների 69 դեպք։
Փողոցներում ծառայություն իրականացնող ոստիկանները ստուգում են հասարակական վայրերում գտնվող քաղաքացիների մոտ դիմակի առկայությունը, ինչը պարտադիր է։ Մայիսի 26-ի ժամը 13-ի դրությամբ հանրային վայրերում հայտնաբերվել է 13 անձ, որոնք հանրային վայրերում դիմակ չեն ունեցել: Պարտադիր է նաեւ միմյանց միջեւ սոցիալական հեռավորության պահպանումը։
Ոստիկանության ծառայողները կանխարգելիչ բնույթի միջոցառումներ են իրականացնում նաեւ բակերում, ինչպես եւ այլ գերատեսչությունների ծառայողների հետ այցելում են ինքնամեկուսացման մեջ գտնվող քաղաքացիների բնակարաններ՝ պարզելու` կան սահմանված կարգը խախտողներ։
Ստուգողական այցելություններ են կատարվել նաեւ առեւտրի եւ հասարակական սննդի բնագավառում գործունեություն ծավալող օբյեկտներ՝ ստուգելու աշխատակիցների եւ հաճախորդների դիմակով լինելու հանգամանքը։ Ստուգումների ընթացքում հացի արտադրամասերից մեկում հայտնաբերվել է մեկ անձ, որը դիմակ չի կրել։ Այդ փաստով կազմվել է արձանագրություն։
Միջոցառումներին մասնակցել են նաեւ այլ նախարարությունների եւ գերատեսչությունների աշխատակիցներ։
Ոստիկանության արտակարգ ռեժիմով ծառայությունը շարունակվում է։ Հարգելի՛ քաղաքացիներ, խստորեն պահպանեք անվտանգության կանոնները. դա բխում է բոլորիս շահերից։
.gif)
