ՏԵՍԱՆՅՈՒԹ. Ովքեր են ամենաշատը բացակայել Ազգային ժողովի նիստերից. իմքայլականները չեն զիջում

Ինչպես հայտնի է, ԱԺ պատգամավոր­ներից պահումներ են կատարվում ԱԺ լիա­գումար, արտահերթ եւ հանձնաժողովների նիստերից անհարգելի բացակայելու համար։  Ընդ որում, նիստերից անհարգելի բացակայություն ունեցող պատգամավորների աշխատավարձից պահումները հաշվարկվում են ամսական պաշտոնային դրույքաչափին համապատասխան: ՀՀ ԱԺ նախագահի աշխատավարձի դրույքաչափի հաշվարկման գործակիցը 18 է, այսինքն՝ ԱԺ նախագահի ամսական աշխատավարձը կազմում է 1 մլն 190 հազար 520 դրամ: Ազգային ժողովի նախագահի տեղակալների աշխատավարձի դրույքաչափի հաշվարկման գործակիցը 14 է, աշխատավարձը կազմում է 925 հազար 960 դրամ: Պատգամավորների աշխատավարձի դրույքաչափի հաշվարկման գործակիցը 10 է, հետեւաբար՝ նրանց ամսական աշխատավարձը կազմում է 661 հազար 400 դրամ:

Սակայն Ազգային ժողովի մշտական հանձնաժողովի նախագահի աշխատավարձը կազմում է 793 հազար 680 դրամ, իսկ   մշտական հանձնաժողովի նախագահի տեղակալի աշխատավարձը կազմում է 694 հազար 470 դրամ: Այսինքն, նիստերից անհարգելի բացակայությունների դեպքում պահումների չափերը ևս տարբեր են՝ կապված պատգամավորի պաշտոնից՝ շարքային է, հանձնաժողովի նախագահ, նախագահի տեղալալ և այդպես շարունակ: Շարքային պատգամավորի մեկ բացակայության համար պահվող գումարի չափը մոտ  32 հազարն է:

Այսպիսով «Ժողովուրդ» օրաթերթն Ազգային ժողովի աշխատակազմից հարցման միջոցով ստացել է 2020 թվականի հունվարից մինչև հունիսի 1-ը տեղի ունեցած Ազգային ժողովի հերթական, արտահերթ, հատուկ նիստերից պատգամավորների բացակայությունների վերաբերյալ տեղեկանքները:

Նախ նշենք, որ ԱԺ կանոնակարգ օրենքի համաձայն,  պատգամավորների բացակայությունը համարվում է հարգելի, եթե նա.

Հայաստանի Հանրապետության աշխատանքային օրենսգրքով նախատեսված՝ հարգելի պատճառով նրա բացակայելուց հետո՝ մեկ շաբաթվա ընթացքում, Աշխատակազմի ղեկավարին ներկայացվում է համապատասխան փաստաթուղթ

նա Ազգային ժողովի կողմից ուղարկվել է գործուղման.

նա ձերբակալվել է, կամ նրա նկատմամբ որպես խափանման միջոց կիրառվել է կալանքը, և նա չի դատապարտվել ազատազրկման, կամ նրա նկատմամբ կայացվել է քրեական հետապնդումը դադարեցնելու որոշում.

նա զբաղեցնում է պատգամավորի կարգավիճակով պայմանավորված պաշտոն, և բացակայությունը պայմանավորված է իր պաշտոնական պարտականությունների կատարմամբ:

Այսպիսով, Ազգային ժողովի նիստերից անհարգելի պատճառով ամենաշատը բացակայած պատգամավորներն են՝

Արամ Խաչատրյան՝ 8 բացակա («Իմ քայլը» խմբակցություն),

Մանե Թանդիլյան՝ 8 բացակա («Լուսավոր Հայաստան» խմբակցություն),

Սիփան Փաշինյան՝ 7 բացակա («Իմ քայլը» խմբակցություն)

Սոնա Ղազարյան՝ 7 բացակա («Իմ քայլը» խմբակցություն)

Էդուարդ Բաբայան՝ 6 բացակա («Բարգավաճ Հայաստան» խմնբակցություն)

Վարդան Ղուկասյան՝ 5 բացակա (ԲՀԿ)

Մերի Գալստյան՝ 5 բացակա («Իմ քայլը» խմբակցություն)

Հրանտ Մադաթյան՝ 5 բացակա (ԲՀԿ)

Լենա Նազարյան՝ 4 բացակա («Իմ քայլը» խմբակցություն)

Բացակա ունեցող մյուս պատգամավորները նիստերից բացակայել են 4-ից պակաս անգամ. կան նաև պատգամավորներ, որոնք առհասարակ բացակայություն չեն ունեցել: Սակայն նկատենք, որ խորհրդարանում մեծ թիվ են կազմում նաև անհարգելի բացակայող պատգամավորները: Ընդ որում, նրանք ինչպես իշխող խմբակցությունից են, այդպես էլ ընդդիմադիր ուժերից:

Հավելենք, որ ԱԺ կանոնակարգ-օրենքի համաձայն, յուրաքանչյուր օրացուցային կիսամյակի ընթացքում քվեարկությունների առնվազն կեսից անհարգելի բացակայելու դեպքում պատգամավորի լիազորությունները կարող են դադարեցվել:

Մանրամասները՝ տեսանյութում

Նաիրա Հովհաննիսյան