ՈՒՇԱԳՐԱՎ ԶԱՐԳԱՑՈՒՄՆԵՐ՝ «ՕՐԵՆՔՈՎ ԳՈՂ» ԱՐՍԵՆ ՄԿՐՏՉՅԱՆԻ ԳՈՐԾՈՎ

ArmLur.am-ին հասած տեղեկությունների համաձայն՝ «օրենքով գող» Արսեն Մկրտչյանի` Արսեն Երեւանսկու նկատմամբ հարուցված քրեական գործով կալանավորվել է Գեղարքունիքի մարզի Գեղամասար խոշորացված համայնքի ղեկավար Հակոբ Ավետյանը:

Նշենք, որ Գեղամասար խոշորացված համայնքայն իր մեջ ներառում է Սոթք, Ազատ, Ավազան, Արեգունի, Արփունք, Գեղամաբակ, Գեղամասար, Դարանակ, Կախակն, Կութ, Կուտական, Նորաբակ, եւ Փոքր Մասրիկ գյուղերը:

Իսկ հիմա՝ ամեն ինչի մասին սկզբից:

Ինչպես հայտնի է, այս տարվա մայիսի 21-ին քրեական աստիճանակարգության բարձրագույն կարգավիճակ ունեցող անձի կողմից, քրեական ենթամշակույթ կրող խմբավորում ստեղծելու եւ ղեկավարելու հիմնավոր կասկածանքով, ԱԱԾ քննչական դեպարտամենտ էր բերման ենթարկվել, իսկ ավելի ուշ կալանավորվել «օրենքով գող» Արսեն Երեւանսկի մականունով Արսեն Մկրտչյանը: Ըստ ԱԱԾ-ի՝ Արսեն Մկրտչյանը քրեական ենթամշակույթ կրող խմբավորմանը մասնակցելու կամ դրա հետապնդած նպատակների իրականացմանը ներգրավված լինելու կամ քրեական ենթամշակույթ կրող խմբավորման հավաքներ կազմակերպելու կամ դրանց մասնակցելու կասկածանքով՝ Բասար մականունով Արմեն Մելքոնյանի հետ կազմակերպել են քրեական ենթամշակույթ կրող խմբավորման հավաքներ: ԱԱԾ-ն տեղեկացրեց, որ դրանց մասնակցելու կասկածանքով բերման են ենթարկվել 8 անձ: Վերոնշյալ անձանց բնակարաններում եւ ավտոմեքենաներում կատարվել են ընդհանուր թվով 22 խուզարկություններ, որոնց արդյունքում հայտնաբերվել եւ առգրավվել են առանձնապես խոշոր չափերի գումարներ, թմրամիջոց, ինչպես նաեւ քրեական գործի համար նշանակություն ունեցող այլ առարկաներ: Նախաքննական մարմնի կողմից բերման ենթարկված անձանցից 7-ը ՀՀ քրեական դատավարության օրենսգրքով սահմանված հիմքերի առկայության պայմաններում ձերբակալվել են, իսկ 3-ի նկատմամբ խափանման միջոց է կիրառվել ստորագրությունը՝ չհեռանալու մասին: Նշենք, որ այս գործով «օրենքով գող» Արսեն Երեւանսկին չի ընդունում իրեն առաջադրված մեղադրանքը, եւ օրերս նրան առողջական խնդիրների պատճառով տեղափոխվել են դատապարտյալների հիվանդանոց: Ու մինչ բժիշկները զբաղված են Արսեն Երեւանսկու առողջական խնդիրները լուծելով, սույն քրեական գործով ArmLur.am-ին մանրամասներ են հայտնի դարձել:

Համայնքի ղեկավարը՝ ճաղերի հետեւում

Մասնավորապես, կալանավորված անձանց մեջ է Գեղարքունիքի մարզի Գեղամասար խոշորացված համայնքի ղեկավար Հակոբ Ավետյանը: Իսկ ինչպե՞ս է նա ներքաշվել գողականների հավաքների մեջ, եւ, առհասարակ, ինչի՞ համար է կալանավորվել: Այսպիսով, մեզ հասած տեղեկությունների համաձայն՝ Գեղամասար համայնքի ղեկավար Հակոբ Ավետյանը ֆինանսական խնդիրներ է ունեցել կոնկրետ անձանց հետ: Ըստ մարզում տարածված լուրերի՝ Գեղամասար համայնքի ղեկավար Հակոբ Ավետյանը բազմաթիվ մարդկանց գումար է պարտք, եւ մարդիկ չեն կարողացել հետ ստանալ իրենց գումարները: Նրանք օգնության են կանչել գողականներին, որպեսզի իրենց հասանելիք գումարները ստանան: Ահա այստեղ էլ գործը հասել է դիվան բաշուն. «օրենքով գող» Արսեն Երեւանսկին միջնորդավորված կամ ուղիղ եղանակով Հակոբ Ավետյանից պահանջել է վճարել մարդկանց գումարները, եւ այդ ողջ խոսակցությունները Ազգային անվտանգության ծառայության կողմից գաղտնալսվել են: Հենց այդ պատճառով էլ Ազգային անվտանգության ծառայությունը հենց գյուղապետարանի շենքից կալանավորել է Գեղամասար համայնքի ղեկավար Հակոբ Ավետյանին: Ավելին, մեզ հասած լուրերի համաձայն՝ Հակոբ Ավետյանին ԱԱԾ-ն առաջարկել է պատմել ողջ եղելությունը` խոստանալով այդ դեպքում խրախուսել, սակայն Գեղամասար համայնքի ղեկավար Հակոբ Ավետյանը ցանկալի ցուցմունք չի տվել ԱԱԾ քնիչներին եւ դրա պատճառով մնացել է կալանքի տակ:

Օրինակելի պաշտոնյան`

պարտքերի մեջ

Բայց չմոռանանք ամենակարեւորի մասին. իսկ ինչո՞վ հայտնի դարձավ Գեղամասար համայնքի ղեկավարը, եւ հիմա որտե՞ղ է հայտնվել: Դեռես 2018 թվականի նոյեմբերի 19-ին ՀՀ վարչապետ Նիկոլ Փաշինյանը աշխատանքային այցով գնացել էր Գեղարքունիքի մարզ եւ Մարզպետարանի նիստերի դահլիճում մարզի համայնքների ղեկավարների ու մարզի այլ պաշտոնյաների հետ հանդիպման ժամանակ, որպես սեփական քրտինքով, զրոյից մինչեւ բարեկեցության հասնելու օրինակ, ներկայացրել էր Գեղարքունիքի մարզի Գեղամասար համայնքի ղեկավար Հակոբ Ավետյանին: «Երբ խոսք է գնում բարեկեցության հասնելու մասին, շատերը մտածում են, թե դրան կարելի է հասնել այն ժամանակ, երբ երկիրը դառնա բարեկեցիկ: Մինչդեռ մարդիկ պետք է իրենց աշխատանքով բարեկեցություն ապահովեն թե՛ իրենց, թե՛ երկրի համար: Ես ուզում եմ բերել Գեղամասար համայնքի ղեկավարի օրինակը: Նա բնակվում է Սոթք գյուղում, որտեղ համատարած աղքատություն է նկատվում, բոլոր տները գտնվում են անշուք վիճակում, իսկ, ահա, այնտեղ աչքի է զարնում մի շքեղ առանձնատուն, որի սեփականատերը բարեկեցության է հասել զրոյից՝ սեփական քրտինքով վաստակ ստեղծելով: Մենք պետք է, որպես պետություն, քաջալերենք նման մարդկանց աշխատանքը: Իսկ հիմա ուզում եմ, որ նա ներկայանա ձեզ եւ պատմի, թե ինչ ջանքերի գնով է ստեղծել իր վաստակը»,- նշել էր ՀՀ վարչապետի պաշտոնակատար Նիկոլ Փաշինյանը:  Եվ, ահա, այս խոսքերից երկու տարի անց պարզվում է՝ համայնքի ղեկավարը, ըստ ուժայինների տեղեկությունների, պարտքերի մեջ է, չի վերադարձրել անգամ գյուղատնտեսական աշխատանք կատարած որոշ մարդկանց գումարները, «օրենքով գողերի» հետ ֆինանսական հարցերի շուրջ ներքին «ռազբորկաների» մեջ է եւ այլն: Ընդ որում, ուժայինները պարզել են, որ այս ամենը նոր չեն: Եւ հարց է առաջանում՝ ՀՀ վարչապետ Նիկոլ Փաշինյանին ո՞վ է խաբել, ինչու՞, ի՞նչ նկրտումներով են Գեղամասար համայնքի ղեկավարին ՀՀ վարչապետի մոտ մատուցել որպես օրինակելի պաշտոնյա` զերոյից արդյունքների հասած: Թերեւս ԱԱԾ-ն այս հարցի պատասխանն էլ կգտնի, բայց արձանագրենք, որ քրեական ենթամշակույթի կոնկրետ դրսեւորումներով այժմ համայնքի ղեկավար կա կալանավորված: Նրա եւ գողական տարրերի մեջ եղել են կապավոր-միջնորդներ, որոնց դերակատարության մասին կխոսենք հաջորդիվ:

 ՔՆԱՐ ՄԱՆՈՒԿՅԱՆ

ԲԱԽՎԵԼ Է ԱՎՏՈՄԵՔԵՆԱՆԵՐԻՆ

ՀՀ արտակարգ իրավիճակների նախարարություն ահազանգ է ստացվել, որ Երեւանի Սասունցի Դավթի փողոցի վերջնամասում տեղի է ունեցել ավտովթար, բախվել են ավտոմեքենաներ. առկա է եղել գազի արտահոսք։ Դեպքի վայր է մեկնել ԱԻՆ ՓԾ Երեւան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ։ Պարզվել է, որ «Hyundai Elantra» մակնիշի ավտոմեքենան բախվել է կայանած «Renault Logan», «Kia Optima», «Toyota» եւ «Mercedes GLK350» մակնիշների ավտոմեքենաներին, ինչի հետեւանքով «Renault Logan» մակնիշի ավտոմեքենան կողաշրջվել է. վերջինից տեղի է ունեցել գազի արտահոսք։ Մինչ փրկարարների՝ կանչի վայր հասնելը Խորեն Ս.ն հոսպիտալացվել է «Էրեբունի» ԲԿ-ում։ Փրկարարները հոսանքազրկել են «Renault Logan» մակնիշի ավտոմեքենան եւ փակել գազի բալոնի փականը:

ԴԻՄԱԿ ՉԿՐԵԼՈՒ ՊԱՏՃԱՌՈՎ

«Սասնա ծռերի» գործով ամբաստանյալ Պավլիկ Մանուկյանը Երեւանի ընդհանուր իրավասության դատարանի՝ Շենգավիթի նստավայրի հարակից այգուց բերման է ենթարկել՝ դիմակը չկրելու պատճառով։ Այս մասին երեկ «Սասնա ծռերի» գործով դատական նիստին հայտնեց նիստը նախագահող դատավոր Մեսրոպ Մակյանը։ «Պավել Մանուկյանը դատարանի շենքից դուրս գալով եւ հարակից այգում քայլելու ընթացքում դիմակ չկրելու պատճառով արժանացել է ծառայություն իրականացնող ոստիկանների դիտողությանը։ Նա չի կատարել ոստիկանների պահանջը եւ բերման է ենթարկվել Ոստիկանության բաժին»,- հայտնել է դատավորը։ Գործով ամբաստանյալի բացակայության պատճառով դատական նիստը հետաձգվել է։

ՄԵՂԱԴՐԱՆՔ Է ԱՌԱՋԱԴՐՎԵԼ

2020թ. հունիսի 3-ին «Էրեբունի» բժշկական կենտրոնից ՀՀ ոստիկանության Էրեբունու բաժին հաղորդում է ստացվել, որ «ձախ գոտկային շրջանի կտրած-ծակած վերք» ախտորոշմամբ բուժօգնության է դիմել Արարատի մարզի 23-ամյա բնակիչը։ Պարզվել է, որ 2020թ. հունիսի 3-ին Երեւանի Խաղաղ Դոնի փողոցում գործող ավտովերանորոգման կետի մոտ անձնական փոխհարաբերությունների շուրջ ծագած վիճաբանության ընթացքում Երեւանի 27-ամյա բնակիչն իր մոտ եղած դանակով հարվածել է Արարատի մարզի բնակչի մարմնին՝ ձախ գոտկային շրջանում պատճառելով մարմնական վնասվածք։ Դեպքի առթիվ ՀՀ ոստիկանության Էրեբունու բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով, որի նախաքննությունն իրականացվում է ՀՀ քննչական կոմիտեի Երեւան քաղաքի քննչական վարչության Էրեբունի եւ Նուբարաշեն վարչական շրջանների քննչական բաժնում: Հայտնաբերվել եւ առգրավվել է հանցագործության գործիք հանդիսացած դանակը, որը ճանաչման է ներկայացվել 27-ամյա երիտասարդին: Վերջինս հայտարարել է, որ նշված դանակով է հարվածել եւ մարմնական վնասվածք պատճառել Արարատի մարզի բնակչին: Երեւան քաղաքի 27-ամյա բնակչին մեղադրանք է առաջադրվել. նրա նկատմամբ որպես խափանման միջոց է ընտրվել ստորագրությունը՝ չհեռանալու մասին:

ԾԱՆՐ Է

«Շտապօգնության բժիշկների եւ հիվանդանոցում կատարված գործողությունների շնորհիվ Մանվել Գրիգորյանի առողջական վիճակն այժմ գնահատվում է ծանր, բայց հարաբերական կայուն»: Այս մասին ասել է «Նաիրի» բկ-ի տնօրեն Անատոլի Գնունին: Նա գտնվում է վերակենդանացման բաժանմունքում, գիտակցությունը տեղում է, շնչառությունը՝ ինքնուրույն: Հիշեցնենք, որ պաշտպանները երեկ հայտնել էին, որ Մանվել Գրիգորյանի վիճակը կտրուկ վատացել է, եւ նա շտապօգնության մեքենայով տեղափոխվել է «Նաիրի» բժշկական կենտրոն:

Մանվել Գրիգորյանը Երեւան քաղաքի ընդհանուր իրավասության դատարանի որոշմամբ հունվարի 15-ին ազատ արձակվեց: Մինչ այդ դատախազության նախաձեռնությամբ արտահերթ նիստ էր հրավիրվել, որի պատճառը Գրիգորյանի առողջական վիճակի վատթարացման վերաբերյալ նոր տեղեկություններն էին: Այժմ նրա նկատմամբ որպես խափանման միջոց է ընտրված չհեռանալու մասին ստորագրությունը: