ԻՐԵՆ ԻՋԵՎԱՆԻ ՀԱՄԱՅՆՔԱՊԵՏ ՀՌՉԱԿԱԾԸ՝ ՆՈՒԲԱՐԱՇԵՆԻ ՀՈԳԵԲՈՒԺԱՐԱՆՈՒՄ

Իջեւան քաղաքի բնակիչ, 1988թ. ծնված Արման Մանուկյանին մեղադրանք է առաջադրվել այն բանի համար, որ 2019թ. դեկտեմբերի 10-ին՝ ժամը 09.00-ի սահմաններում, մուտք է գործել Իջեւանի համայնքապետարանի վարչական շենք, բացահայտ անհարգալից վերաբերմունք ցուցաբերել համայնքապետարանի աշխատակիցների նկատմամբ, հայտարարել, որ այլեւս համայնքի ղեկավարն ինքն է, որից հետո ձեռքին եղած լինգով հարվածել է համայնքապետի աշխատասենյակի մուտքի դռանը՝ վնասելով այն եւ այդպիսով խաթարելով համայնքապետարանի բնականոն աշխատանքը։ Ա. Մանուկյանին մեղադրանք է առաջադրվել ՀՀ քրեական օրենսգրքի 258 հոդվածի 2-րդ մասով։ Նրա նկատմամբ խափանման միջոց է ընտրվել  հսկողությանը հանձնելը. նա գտնվում է ՀՀ առողջապահության  նախարարության «Հոգեւոր առողջության պահպանման ազգային կենտրոն» ՊՈԱԿ-ում։ Ա. Մանուկյանը Իջեւանի նախկին համայնքապետի՝ Վարդան Ղալումյանի պաշտոնավարման ժամանակ էլ հանդես է եկել սպառնալիքներով։

2018թ. Ա.  Մանուկյանն  Իջեւանի Անկախության փողոցի թիվ 5 շենքի հարակից տարածքում, առանց համապատասխան քաղաքաշինական փաստաթղթերի եւ թույլտվության, ինքնակամ իրականացրել է բետոնապատման եւ մետաղական ցանկապատի տեղադրման աշխատանքներ: Վարդան Ղալումյանը, հանդիսանալով Իջեւան համայնքի ղեկավար,  Արման Մանուկյանի նկատմամբ օժտված լինելով կարգադրիչ լիազորություններով, իր իրավասության սահմաններում 2018թ. նոյեմբերի 29-ին վարչական վարույթ է հարուցել Ա. Մանուկյանի նկատմամբ եւ իր ենթակայության տակ գտնվող համապատասխան ծառայությանը հանձնարարել է կասեցնել ինքնակամ շինարարական աշխատանքները: Ա. Մանուկյանը, տեղյակ լինելով այդ կարգադրության մասին, 2018թ. նոյեմբերի 29-ին` ժամը 13:30-ի սահմանաներում, գնացել է Իջեւանի համայնքապետարան եւ համայնքի ղեկավար Վ. Ղալումյանի աշխատասենյակում, նրա վերոհիշյալ ծառայողական պարտականությունների հետ կապված, տվել է բռնություն գործադրելու սպառնալիք` ասելով, որ ինքը կկրակի եւ կսպանի` ցանկանալով այդկերպ նրան հարկադրել հրաժարվելու իր լիազորությունների իրականացումից:

Ղեկավարվելով ՏԻՄ օրենքի 37 հոդվածի 5-րդ կետով` Վարդան Ղալումյանը Իջեւանի քաղաքապետարանի քաղաքաշինության բաժնին կարգադրել է կասեցնել Ա. Մանուկյանի կողմից իրականացված ինքնակամ շինարարության աշխատանքները եւ ապահովել դրանց հետեւանքների վերացումը: Իջեւանի քաղաքապետարանը գրավոր դիմել է ոստիկանության Իջեւանի բաժին` քանդման աշխատանքների ընթացքում հասարակական կարգը պահպանելու համար: 2019թ. հուլիսի 9-ին Իջեւանի համայնքապետարանի ենթակայությամբ գործող Իջեւանի կոմունալ ծառայության աշխատողները կատարել են ինքնակամ կառույցի քանդումը: Տավուշի մարզի առաջին ատյանի դատարանի դատավոր Զոյա Զաքինյանը 2019թ. օգոստոսի 30-ին վճռել է Արման Մանուկյանին մեղավոր ճանաչել ՀՀ քրեական օրենսգրքի 316 հոդվածի 1-ին մասով եւ նրան դատապարտել ազատազրկման 2 տարի, 6 ամիս ժամկետով, կիրառել ՀՀ քրեական օրենսգրքի 70 հոդվածը եւ նշանակված պատիժը պայմանականորեն չկիրառել` փորձաշրջան նշանակելով 2 տարի ժամկետով:

Տավուշի մարզի դատախազության դատախազ Վասիլ Սարգսյանը Տավուշի մարզի առաջին ատյանի դատարանի վճռի դեմ Վերաքննիչ բողոք է ներկայացրել, որով միջնորդել է Վերաքննիչ բողոքը ընդունել վարույթ, մասնակիորեն պատժի կրման նպատակահարմարության մասով բեկանել եւ փոփոխել Տավուշի մարզի ընդհանուր իրավասության դատարանի՝ 2019թ. օգոստոսի 30-ի դատավճիռը, ՀՀ քրեական օրենսգրքի 70 հոդվածի կիրառումը համարել անթույլատրելի: 2019թ. նոյեմբերի 15-ին  Վերաքննիչ  դատարանը դատախազության վերաքննիչ բողոքը մերժել  է, պաշտպան  Վ. Ներկարարյանի վերաքննիչ  բողոքը՝ բավարարել, Արման Մանուկյանին  ճանաչել  է անմեղ եւ արդարացրել  է նրա արարքում  հանցակազմի բացակայության պատճառով։ Վճռաբեկ դատարանը մերժել  է դատախազության վճռաբեկ բողոքը վարույթ ընդունել։

ՈՍԿԱՆ ՍԱՐԳՍՅԱՆ

Տավուշ