Ինչ անցյալ ունի Ծառուկյանին ազատ թողած դատավորը. հետաքրքիր մանրամասներ

Երևան քաղաքի ընդհանուր իրավասության դատարանի դատավոր Ռոբերտ Պապոյանը վերջին մեկ շաբաթվա ընթացքում բավական հայտնի դարձավ իր կողմից կայացված միանգամից երկու որոշումների շնորհիվ: Նախ դատավոր Պապոյանը ոչ իրավաչափ ճանաչեց ԲՀԿ ներկայացուցիչ Աբրահամ Մանուկյանին ձերբակալելու որոշումը՝ կայացված ԱԱԾ կողմից: Ապա օրեր անց նույն դատավորը, քննելով ԱԱԾ քննչական դեպարտամենտի քննիչի կողմից ԲՀԿ առաջնորդ Գագիկ Ծառուկյանին կալանավորելու միջնորդությունը, մերժեց այն՝ Ծառուկյանին թողնելով ազատության մեջ: Ուշագրավ է այն փաստը, որ երկու բավականին աղմկահարույց և հանրության լայն շրջանակների կողմից ոչ միանշանակ ընդունված որոշումներն անմիջական կապ ունեն Ազգային անվտանգության ծառայության կողմից իրականացված գործողությունների հետ:

Ռ.Պապոյանի պաշտոնական կենսագրությունն ուսումնասիրելիս պարզեցինք, որ նա բավական հարուստ կենսագրություն ունի, իր աշխատանքային կարիերան սկսել է 2001թ-ից՝ աշխատելով Վայոց ձորի մարզի դատախազությունում: Այնուհետև նշված է, որ 2002թ.-ից աշխատել է Կոտայքի մարզի քննչական բաժնում, իսկ 2005 թվականին դարձյալ վերադարձել է Վայոց ձորի մարզի դատախազություն: Պաշտոնական կենսագրության մեջ, բնականաբար, ոչ մի տվալ չկա, թե դատախազության աշխատակից Ռ.Պապոյանը ինչու է տեղափոխվել Ոստիկանության համակարգ և ինչպես է նրան հաջողվել 2005-ին կրկին վերադառնալ դատախազություն, որտեղ աշխատել է մինչև 2011 թվականը, որից հետո նույն մարզում նշանակվել է դատավոր:

Դժվար է պատկերացնել, թե դատախազությունում մեկ տարի աշխատելուց հետո անձը ինչու պետք է կամավոր տեղափոխվեր ոստիկանության համակարգ, քանի որ սովորաբար ոստիկանական համակարգից են ձգտում տեղափոխվել դատախազություն: Մարզում շրջանառվող տեղեկությունների համաձայն՝ 2001թ-ին Վայոց ձորի դատախազությունում աշխատելու ընթացքում Ռոբերտ Պապոյանը փորձել է ներգրավվել մի ուշագրավ գործընթացում:

Մարզի գյուղապետերից մեկի օգտին որոշակի գործողություններ կատարելու համար ինչ-ինչ պահանջներ է ներկայացրել, որից, սակայն գյուղապետը հրաժարվել է: Կարճ ժամանակ անց դեպքի մասին տվյալներ են ստացվել ԱԱԾ-ում ու քանի որ հանցագործություն, ըստ էության, տեղի չէր ունեցել, երիտասարդ դատախազի վարքագծի մասին անմիջապես տեղյակ է պահվել այն ժամանակ ՀՀ գլխավոր դատախազին, ում հանձնարարականով էլ Պապոյանը ազատվել է աշխատանքից:

ArmLur.am-ի տեղեկություններով՝ Պապոյանի գործողությունների մասին քաջատեղյակ է եղել Վայոց ձորի մարզի երկարամյա դատախազ Գրիշա Միքայելյանը, ում գործադրած ջանքերի շնորհիվ էլ 2005 թվականին Պապոյանը դարձյալ վերադարձել է դատախազության համակարգ: Ի դեպ, Գրիշա Միքայելյանն այն նույն դատախազն է, ով 2012թ-ին անցնում էր Արաբկիր և Քանաքեռ Զեյթուն վարչական շրջանների ավագ դատախազ Խաչատուր Բաղդասարյանի դեմ ՀՔԾ-ում քննվող քրեական գործով /դարձյալ կաշառքի գործ/ հենց նույն տարում նրա դեմ կարգապահական վարույթ է հարուցվել, ապա նա հեռացվել է դատախազական համակարգից:

Նման իրավիճակներում նախկինում հայտնված դատավորի կողմից Ծառուկյանի նման խոշոր գործարարի վերաբերյալ առանցքային որոշման կայացումը, մի շարք հարցեր է պարունակում, որը թերեւս պետք է մանրակրկիտ քննարկման առարկա դառնա իրավասու մարմինների կողմից: Իհարկե, գուցե միջնորդության մերժումը ոչ մի ռիսկ էլ չի պարունակում, այլ ընդամենը պարզունակ վրեժխնդրությու՞ն էր ԱԱԾ-ից:

Սոնա Գրիգորյան