Մամուլով հաղորդվել էր, որ Հայաստանի Հանրապետության նախագահի նստավայրում, ճակատային շինության հետնաբակում շահագործման է հանձնվել  կառուցված  նոր մասնաշենք: Շինարարական այդ աշխատանքներն ու կահավորումը ֆինանսավորվել են ոչ թե պետական բյուջեից, այլ մասնավոր աղբյուրներից: Ենթադրվում է,  այդ մասնավոր աղբյուրը ՀՀ նախագահի աշխատակազմի ղեկավար Կարեն Կարապետյանն է, որը դրանից առաջ էլ հանդես էր գալիս նախագահականում բարեգործական ձեռնարկներով: Մասնավորապես նրա ֆինանսական փոխհատուցմամբ է, որ  նախագահական բուֆետի ճաշացանկի գները  նախկինի համեմատ իջել են: Այսինքն` Կարեն Կարապետյանը իր գրպանից վճարում է թանկ սննդամթերքի համար, բայց Սերժ Սարգսյանի «խաթեր», էժան գին են հաշվում եւ գանձում նախագահականի աշխատակիցներից, դրա համար էլ այնտեղ բոլորը գոհ ու երջանիկ են:  Նույնիսկ, ինչպես պատկերավոր փոխանցեց  մեր զրուցակիցը, «նախագահականում բոլորը Կարենի հաշվին են  մեռնում կամ ամուսնանում»: