ՏԵՍԱՆՅՈՒԹ. Զարդերը գողացել էր տանտիրուհու որդու ընկերուհին. բացահայտում

Հուլիսի 26-ին, ժամը 5.40-ին, ոստիկանություն զանգած Արևաբույր գյուղի բնակչուհին հայտնեց, որ իրենց տնից գողություն են արել։
Ոստիկանության Մասիսի բաժնի օպերատիվ խումբը դեպքի վայրում արձանագրեց, որ հափշտակել են ոսկյա և արծաթյա զարդեր։ Ձեռնարկվեցին անհրաժեշտ միջոցառումներ՝ հանցագործությունը «տաք հետքերով» բացահայտելու ուղղությամբ։ Հետաքրքիրն այն էր, որ տունը տակնուվրա արված չէր, դռան փականը սարքին վիճակում էր: Հերքվեց նաև վարկածը, թե տուն են մտել պատուհանից։

Որոշ ժամանակ անց պարզվեց, որ տանտիրուհու որդին նախորդ օրն ընկերուհու հետ այդ տանն էր եղել։ Օպերատիվ-հետախուզական միջոցառումների արդյունքում ոստիկանները ենթադրեցին, որ գողությունը հնարավոր է կատարած լինի հյուրը։
Ճշտվեց կասկածյալի ինքնությունն ու գտնվելու վայրը։

Հուլիսի 26-ին 23-ամյա աղջիկը հայտնաբերվեց մայրաքաղաքում և, գողությունը կատարելու կասկածանքով, բերման ենթարկվեց ոստիկանության Մասիսի բաժին։
Ոստիկանությունում նա խոստովանեց, որ հարդարվելու նպատակով մտել էր ննջասենյակ և պահարանից գողացել ոսկյա և արծաթյա զարդեր, որոնց մի մասը վաճառել է, մյուսը իր տանն է։
Գողոնի մի մասը հայտնաբերվել է։
Փաստի առթիվ նախապատրաստվում են նյութեր։