Հիմա ավելի հանգիստ եմ ինձ զգում. Իռեն Ուլիխանովան՝ ամառային հանգստի եւ հետաձգված ծրագրերի մասին

Շատերի համար ամառային հանգիստը տարվա ընթացքում ամենասպասվածն է, երբ կարող ես վայելել ծովափնյա հանգիստը կիզիչ արեւի տակ, լիաթոք կտրվել առօրյա եւ աշխատանքային հոգսերից: Բայց այս տարի աշխարահն ուրիշ պլաններ էր նախատեսել մարդկության համար` համաշխարհային համաճարակ, որը ճեղքեց յուրաքանչյուր պատնեշ եւ փոխեց նախապես գծված բոլոր ծրագրերի ընթացքը:

Այնուամենայնիվ, «Ժողովուրդ» օրաթերթը, շարունակելով ամառային հանգստին վերաբերող շարքը, այս անգամ զրուցել է Ամերիկայի Միացյալ Նահանգներում բնակություն հաստատած պարուհի Իռեն Ուլիխանովայի հետ:

Պարուհին մեզ հետ զրույցում պատմել է նախընտրելի հանգստի ձեւի, վայրի մասին, ինչպես նաեւ անդրադարձել է համաճարակի բռնկման պատճառով խափանված ծրագրերին:

-Իռե՛ն, այս տարի կորոնավիրուսային համաճարակով պայմանավորված շատերի ամառային հանգստի հետ կապված ծրագրերը խափանվել են։ Մինչ կորոնավիրուսը ի՞նչ պլաններ ունեիք՝ կապված հանգստի հետ:

– Իրականում, այս կորոնավիրուս համավարակը պարալիզացրել եւ խառնել է ամեն ինչ, եթե ոչ բոլորի, ապա շատերիս կյանքը: Ես ապրիլի 4-ին պետք է ունենայի մենահամերգ` Irendance studio-ի տարեկան հաշվետու համերգը, սակայն համավարակի հետեւանքով այն չկայացավ, եւ առաջին ամենամեծ պլանների խափանումը հենց դա եղավ: Այնուհետեւ հուլիսի 21-ին ընտանիքով պետք է գայինք Հայաստան, դա էլ երկրորդ ամենացավալի խափանումն էր:

-Իսկ արդեն հասցրե՞լ եք հանգստանալ։

– Եթե հաշվի առնենք, որ անդադար աշխատելը՝ օրվա 12-15 ժամը, եւ համեմատենք ստիպված տանը մնալու հետ` վստահ կարող եմ ասել, որ այս հինգ ամիսների ընթացքում ուժերս շատ ավելի վերականգնվել են եւ շատ ավելի հանգիստ եմ հիմա ինձ զգում, բայց ես իմ աշխատանքային «վազքն» եմ սիրում:

-Ինչպիսի՞ հանգիստ եք նախընտրում՝ պասիվ, թե՞ ակտիվ։

– Ես ակտիվ հանգստի սիրահար եմ, երբեք չեմ կարող մեկ օրից ավել պասիվ հանգիստ ունենալ:

-Կա՞ երկիր կամ վայր, որ անկախ ամեն ինչից միշտ նախընտրում եք լինել։

– Եղել եմ տարբեր երկրներում, շատ եմ սիրում շրջագայել, բայց, երբ հարցը մի տեղ գնալու մասին է, ես իմ տնից, իմ հայրենի հող ու ջրից, իմ Հայաստանից առավել ոչինչ չեմ տեսնում: Բոլոր ճանապարհները տանում են դեպի Հայաստան:

-Ամառային հանգստի մեկնելիս կա՞ մի իր, որ պարտադիր լինում է Ձեր ճամպրուկում։

– Հեռախոսի «зарядочник» եւ շարժական «акумулятор», քանի որ հեռախոսս աշխատում է օրը 24 ժամ , միշտ ձեռքիս է, միշտ կապի մեջ եմ, բայց երկար խոսել չեմ սիրում, միշտ լիցքավորվելու կարիք ունի այն…

-Իռե‘ն, իսկ սթրեսից դուրս գալու համար, ի՞նչն եք հատկապես կարեւորում հանգստի մեջ։

-Ես սթրեսի մեջ չեմ ընկնում՝ շնորհիվ իմ հրաշքներ գործող մասնագիտության, իմ ճամպրուկում միշտ կա էլեկտրական «кофеварка» եւ «հայկական ավանդական» սեւ սուրճ:

-Բացի ֆիզիկական հանգստից էլ ի՞նչն է Ձեզ հանգստացնում, թեթեւացնում։

– Կորոնավիրուսյան ժամանակահատվածի ընթացքում բացահայտեցի նաեւ, որ հեռուստացույցով հետաքրքիր հաղորդումներ դիտելն ինձ համար հաճելի է դարձել:

– Իսկ ինչպե՞ս եք որոշում, թե ամառային հանգիստը որտե՞ղ եւ ո՞ւմ հետ եք անցկացնելու։

– Տեղը հավերժ որոշված է` Հայաստան, իսկ թե ում հետ` կախված է եկողներից…

Զրուցեց Լիդա Եղիազարյանը