ArmLur.am-ը զրուցել է ԱԺ «Իմ քայլը» խմբակցության պատգամավորներ Արուսյակ Ջուլհակյանի եւ Սուրեն Գրիգորյանի հետ՝ պարզելու համար, թե ինչ դիրքորոշում ունեն Սահմանադրական դատարանի եւ Վճռաբեկ դատարանի միավորման եւ Գերագույն դատարան ստեղծելու վերաբերյալ:
ԱԺ «Իմ քայլը»խմբակցության պատգամավոր Արուսյակ Ջուլհակյան
-Ե՞րբ եք պատրաստվում քննարկել այս հարցը Աժ պետական իրավական հարցերի մշտական հանձնաժողովում, որպեսզի հասկանալի լինի, թե ինչ դիրքորոշում ունեք Դուք:
-Այս պահին չունենք ոչ մի տեղեկություն: Համենայնդեպս, ես եւ իմ գործընկերը մանրամասն տեղեկատվություն չունենք՝ այդ մոդելի հետ կապված, թե կոնկրետ ինչ ու ինչպես քննարկել, հետեւաբար կարծիք չեմ կարող հայտնել:
-Որպես իրավաբան՝ չե՞ք կարող Ձեր կարծիքը արտահայտել՝ արդյոք Հայաստանում Սահմանադրական դատարանն ու Վճռաբեկ դատարան միավորվեն:
-Ես այդտեղ խնդիր չեմ տեսնում, բայց պետք է հասկանալ, թե որն է դրա հիմնավորումը, թե ավելի մանրամասն ինչպես են այդ մոդելը պատկերանցում այն անձինք, որոնք հիմա քննարկման են դրել այդ հարցը: Այստեղ է խնդիրը, եւ այստեղ կարող է լինել համաձայնություն կամ անհամաձայնություն: Եվ քանի որ այլ մանրամասների անձամբ ես տեղյակ չեմ, ավելի մանրամասն չեմ կարող կարծիք հայտնել: Երբ ավելի մանրամասն կիմանանք, թե ինչ մոդել է իրենից ենթադրում, եւ այդ մոդելի տակ հանձնաժողովի անդամներն ինչ նկատի ունեն եւ ինչ հիմանվորումներ են դնում, այդ ժամանակ ավելի հանգամանալից կխոսեմ:
-Իսկ Սահմանադրական դատարանի ճգնաժամը կլուծվի՞ միայն այդ տարբերակով:
-Սահմանադրական դատարանի ճգնաժամի հետ դա կապ չունի: Դա մոդել է, փոփոխություն է, եւ դա բավականին լուրջ ռեֆորմ է, որի մանրամասներին ծանոթանալուց հետո միայն կարող եմ կարծիք հայտնել, թե արդյոք մեր երկրի համար դա որքանով է արդյունավետ, այդ ռեֆորմն ինչ հարց կարող է լուծել կամ չլուծել:
-Տիկի՛ն Ջուլհակյան, ինչո՞ւ չի լուծվում նաեւ Սահմանադրական դատարանի դատավորի թեկնածուի հարցը: Կառավարությունը թեկնածու առաջադրեց ու մերժվեց: Ինչո՞ւ այդ հարցին լուծում չի տրվում:
-Այդ հարցը քննարկման փուլում է, եւ ժամանակին այդ լուծումը, բնականաբար, կտրվի: Սահմանադիր մարմինները, այդ թվում նաեւ՝ կառավարությունը, ունեն դեռ ժամանակ թեկնածու առաջադրելու, որի մեջ տեղավորվելով՝ այդ առաջադրումը կարվի:
-Էդգար Շաթիրյանի հետ հանդիպմանը ներկա եղե՞լ եք: Ի՞նչ դիրքորոշում ունեք՝ իր թեկնածության հետ կապված:
-Ես որեւէ դիրքորոշում որեւէ թեկնածուի հետ կապված այս պահին չեմ կարող հայտնել, հատկապես որ Շաթիրյանը դեռ հաստատված թեկնածու չէ: Երբ հաստատվի նրա թեկնածությունը, նոր կսկսեմ մտորել նրա թեկնածության շուրջ, բայց վստահ չեմ, որ հրապարակային կարտահայտեմ իմ կարծիքը մինչեւ քվեարկությունը, որովհետեւ քվեարկությունը գաղտնի է:
-Խունդկարյան եւ Վաղարշյան թեկնածուների հետ կապված անձամբ Դուք ի՞նչ դիրքորոշում ունեք:
-Նույնը. քվերակությունը գաղտնի է, եւ իմ դիրքորոշումը կներկայացնեմ գաղտնի քվեարկության միջոցով:
ԱԺ «Իմ քայլը» խմբակցության պատգամավոր Սուրեն Գրիգորյան
-Ե՞րբ եք պատրաստվում քննարկել այս հարցը Աժ պետական-իրավական հարցերի մշտական հանձնաժողովում, որպեսզի հասկանալի լինի, թե ինչ դիրքորոշում ունեք Դուք:
-Մենք միայն տեղյակ ենք, որ ընդհանուր այդ հարցը քննարկվելու է:
-Դուք դե՞մ եք, թե՞ կողմ: Տեղեկություններ կան, որ Ձեր թիմում դժգոհություններ կան՝ Գերագույն դատարանի ստեղծման հետ կապված:
-Մեր թիմում չկա դժգոհություն: Մեր թիմում կարող լինել տարբեր կարծիքներ, ու դրանք եղել են նաեւ հանձնաժողովում, որի մի շարք անդամներ ասացին, որ ընդունվել է այդ որոշումը 8-7 ձայների հարաբերակցությամբ: Գաղափարական առումով դա դեռ վերջնական որոշում չէ: Այդ հարցը դրվելու է հանրային քննարկման:
-Ե՞րբ եք պատրաստվում քննարկել այս հարցը Ձեր հանձնաժողովում:
-Այս պահին չունենք նման տեղեկություն:
Վարդենիսի համայնքապետարանից հայտնել էին, որ համայնքում կորոնավիրուսի համավարակի նոր բռնկում է սկսվել, եւ կոչ էին արել համաքաղաքացիներին պահպանել հակահամաճարակային անվտանգության բոլոր կանոնները:
Armlur.am-ը զրուցել է Վարդենիսի պոլիկլինիկայի բժիշկ Լիլիթ Գասոյանի հետ՝ պարզելու համար, թե ինչ իրավիճակ է այնտեղ այս պահին, քանի որ վերահսկողությունն իրականացվում է պոլիկլինիկայի կողմից: Հիշեցնենք նաեւ, որ բժիշկը դեռեւս ապրիլին վարակվել էր կորոնավիրուսով, ու նրա դրական թեստից հետո հայտնի դարձավ, որ Վարդենիսում կորոնավիրուսի մեծ օջախ կա:
-Տիկի՛ն Գասոյան, ըստ Վարդենիսի համայնքապետարանի՝ վարակի նոր օջախ է բռնկվում: Խնդրում եմ, կասե՞ք՝ ինչ իրավիճակ է, արդյոք կրկին վարակակիրների թիվը շատանում է քաղաքում:
-Շաբաթվա կտրվածքով որ նայում էինք, հուլիսին ունենում էինք 22-26 հիվանդ, բայց կոնկրետ այս պահին 4 հիվանդ ունեմ:
-Այսինքն՝ հիվանդների թիվը չի՞ ավելացել:
-Շաբաթվա կտրվածքով կարող եմ ասել, որ գնալով պակասում է հիվանդենրի թիվը:
-Բայց Վարդենիսի համայնքապետարանից տեղեկացրել են, որ վիրուսի նոր բռնկում կա:
-Չէ, ուղղակի ամսվա ընթացքում թաղում էր եղել Վարդենիսում, այդ ժամանակահատվածում 15 հոգի հիվանդացան, բայց իրենց արդեն էվակուացրել ենք, բուժումը կազմակերպել ենք, մոբիլիզացրել ենք, ու ներկա պահին չկա նման բան: Բոլորին հետազոտել ենք, դրականներին էլ բուժումը կազմակերպեցինք: Թաղում էր եղել, մասնակցել էին ու վարակվել էին 15 հոգի, թե չէ ուրիշ բան չկա:
-Նշվում է, որ տարբեր ընտանիքներում բռնկում է վարակի. այս պահին էլ իրավիճակը գնալով վատանո՞ւմ է:
-Չէ, չէ, ինձ կոնկրետ որ դիմեն, պետք է դիմեին, չկա նման բան, չեն դիմել, բռնկման մասին բան չկա, ես կրկնում եմ, որ շաբաթվա կտրվածքով նախկինում ունենում էինք 20-26, հիմա այս պահին 4 հոգի ունենք, սրանք փաստեր են, որոնք ես ներկայացնում եմ: Վարդենիսը եւ կից համայնքներին հետեւում է պոլիկլինիկան, մենք նաեւ ունենք 6 ամբուլատորիա, որի գործընթացը մենք ենք կազմակերպում:
-Իսկ Վարդենիսի բժիշկների շրջանում վարակակիրները շա՞տ են, կա՞ն հիվանդներ:
-Այս պահին հիվանդների շրջանում չունենք, բոլորը վերահսկողության տակ է:
Նյութերը՝ ՍՈՆԱ ԳՐԻԳՈՐՅԱՆԻ
ԽՈՐՀՐԴԻ ՆԻՍՏ
ԵՊՀ գիտական խորհրդի նիստերի դահլիճում օգոստոսի 25-ին՝ ժամը 11։00-ին, տեղի է ունենալու ԵՊՀ հոգաբարձուների խորհրդի նիստ՝ օրակարգային երեք հարցով։ Նոր կազմով հոգաբարձուների խորհրդի անդրանիկ նիստի օրակարգային առաջին հարցով նախատեսված է «Երեւանի պետական համալսարան» հիմնադրամի հոգաբարձուների խորհրդի նախագահի, իսկ երկրորդ հարցով՝ քարտուղարի ընտրությունը։ Օրակարգային երրորդ հարցի ընթացքում Հոգաբարձուների խորհուրդը քննարկելու է «Երեւանի պետական համալսարան» հիմնադրամի եւ «Երեւանի պետական համալսարան» հիմնադրամի Իջեւանի մասնաճյուղի տնօրենի մրցույթների գործընթացները։
ԱԶԱՏՎԵԼ ԵՎ ՆՇԱՆԱԿՎԵԼ Է
ArmLur.am-ը երեկ հայտնել էր, որ ՀՀ գլխավոր դատախազի տեղակալ Դավիթ Մելքոնյանն ազատվել է զբաղեցված պաշտոնից: Ավելի ուշ ՀՀ գլխավոր դատախազությունն այս առնչությամբ պաշտոնական հաղորդագրություն է տարածել. «ՀՀ ԵՊՀ իրավաբանական ֆակուլտետում նոր աշխատանքի անցնելու եւ գիտամանկավարժական առավել ներգրավված գործունեությամբ զբաղվելու կապակցությամբ, իր անձնական դիմումի հիման վրա, ՀՀ գլխավոր դատախազի հրամանով, երեկ զբաղեցրած պաշտոնից ազատվել է ՀՀ գլխավոր դատախազի տեղակալ, արդարադատության երրորդ դասի պետական խորհրդական Դավիթ Մելքոնյանը»:
Թեեւ ՀՀ վարչապետ Նիկոլ Փաշինյանը մեկ անգամ չէ, որ հայտարարել է. «Խնամի-ծանոթ-բարեկամ սկզբունքով առաջնորդվելը պրոբլեմ է առաջացնում»: Ոչ միայն վարչապետը, այլ նաեւ իշխանության շատ այլ ներկայացուցիչներ էլ հայտարարել են, որ թավշյա հեղափոխությունից հետո իրենք ուշադրություն չեն դարձնում բարեկամական կապերին եւ հատկապես աշխատանքի հարցում երբեք չեն առաջնորդվում այդ կապերով: Դեռ ամիսներ առաջ գրել էինք Գլխավոր դատախազության ներսում առկա ծանոթ-բարեկամական կապերի մասին: Այստեղ տարածված բարեկամության տեսակը քավոր-սանիկությունն է, որի մասին այս տարվա մայիսի 10-ին հայտարարել էր ՀՀ գլխավոր դատախազ Արթուր Դավթյանը` ասելով, որ դատախազական համակարգում կան մարդիկ, որոնց հետ սանիկ-քավոր հարաբերություններ ունի։ Ու պարզվում է` դատախազը կարեւորագույն գործերով հույսը դնում է հենց իր սանիկների վրա, եւ դեռ ավելին՝ նրանց նոր պաշտոնների է նշանակում: Եվ, ահա, օրերս ՀՀ գլխավոր դատախազի սանիկ Կարեն Գաբրիելյանը ազատվեց Շիրակի մարզի դատախազի պաշտոնից եւ նոր պաշտոն ստացավ ՀՀ գլխավոր դատախազությունում: Երեկ էլ աշխատանքից ազատման դիմում էր գրել Դավիթ Մելքոնյանը, եւ նրա փոխարեն ՀՀ գլխավոր դատախազի տեղակալ նշանակվեց Երեւան քաղաքի դատախազ Գեւորգ Բաղդասարյանը: Ի դեպ, Գեւորգ Բաղդասարյանը «Մարտի 1»-ի գործով սահմանադրական կարգը տապալելու համար մեղադրվող Ռոբերտ Քոչարյանին մեղադրող դատախազներից մեկն է: Ստացվում է, որ ՀՀ գլխավոր դատախազ Արթուր Դավթյանը շարունակում է իրեն շրջապատել մտերիմ ու հավատարիմ դատախազներով:
.gif)
