Թուրքիան սիրիացի գրոհայինների է ուղարկում Ադրբեջան` աջակցելու Բաքվին հայերի դեմ սկսված բախումներում: Reuters–ն իր հոդվածում այդպիսի եզրակացություն է ներկայացնում: Ավելին, հաղորդում է, որ այդ մասին գործակալությանն ասել են հենց իրենք՝ Ադրբեջան ուղևորվող զինյալները:
Reuters-ը խոսել նրանցից երկուսի հետ, ովքեր անանուն մնալու պայմանով պնդել են` գնում են հանուն փողի: «Ես չէի ուզում, բայց գումարի կարիք ունեմ», – ասել է վարձկաններից մեկը և խոստովանել, որ իրեն խոստացել են ամսական 1500 դոլար, ինչը հսկայական գումար է ծայրահեղ աղքատության մեջ գտնվող Սիրիայի համար: Իսկ մեկն էլ ասել է, որ ըստ իր տեղեկությունների, մոտ 1000 սիրիացի է մեկնելու Ադրբեջան, մյուսն ասել է` 700-1000:
Սակայն Ադրբեջանի նախագահի օգնական Հիքմեթ Հաջիևը «լիակատար անհեթեթություն» է որակել սիրիացի վարձկաններին ներգրավելու մասին հարցը եւ հայտարարել, թե իրենց զինված ուժերը պետք եղածից ավելի զինվոր ու պահեստազոր ունեն:
Սակայն այս գործակալության հոդվածին հաջորդեց բրիտանական The Guardian-ի հոդվածը: Իսկ հոդվածի հեղինակն էլ պարբերականի ստամբուլյան թղթակիցն է, և նշել է, թե զրուցել էսիրացի երեք գրոհայինների հետ, ովքեր խոստովանել են, որ պայմանագիր են ստորագրել թուրքական մի մասնավոր ընկերության հետ` Ադրբեջանում որպես սահմանապահ աշխատելու համար:
The Guardian-ի հոդվածում էլ նշվում է, որ իրենց ասել են՝ կռիվներին չեք մասնակցելու, միայն աջակցելու եք պահպանությանը որոշ տարածքներում եւ իրենց ամսական 7-10 հազար թուրքական լիրա` 700-1000 դոլար աշխատավարձ են խոստացել՝ նավթի և գազի ենթակառուցվածքների պահպանության համար:
Պաշտոնական Անկարան եւս կտրականապես հերքել է այս մասին հաղորդումները: Պաշտպանության նախարարության ներկայացուցիչը The Guardian-ին ասել է. – «Մենք ադրբեջանական բանակին օգնում ենք միայն խորհրդատվությամբ և վերապատրաստմամբ: Թուրքիայի պաշտպանության նախարարությունը չի զբաղվում զինվորականների հավաքագրմամբ կամ տեղափոխմամբ աշխարհի որևէ անկյուն»:
.gif)
