Նոր քրեական գործ է հարուցվել «օրենքով գող» Օշականցի Գեւորիկի՝ Գեւորգ Մելիքյանի դեմ: ArmLur.am-ին հայտնի դարձավ, որ Գեւորգ Մելիքյանը փետրվարի 22-ից հետո, շարունակելով պահպանել քրեական աստիճանակարգության բարձրագույն կարգավիճակը, քրեական ենթամշակույթ կրող խմբավորման սահմանված և ճանաչված վարքագծի կանոնների համաձայն համարվելով հեղինակություն, կատարել է քրեական ենթամշակույթ կրող խմբավորման հետապնդման նպատակների իրականացմանն ուղղված գործողություններ:
Մասնավորապես, ըստ մեզ հասած լուրերի Գեւորգ Մելիքյանը ստանձնել է լուծել իր մտերիմ, կենցաղում հայտնի «Բոքսի ապեր» մականվամբ անձի խնդիրը: Այսպիսով «Բոքսի ապեր»-ը դիմել է Օշականցի Գևորիկին, որ օգնի իրեն: Բանն այն է, որ նրան պատկանող Արմավիրի մարզի Սարդարապատ գյուղի 21-րդ փողոցի թիվ 3/1 հասցեում գտնվող «Շին գրուպ» ՍՊԸ շինանյութի խանութ սրահից տարբեր անձիք տարատեսակ շինարարական ապրանքներ և գյուղատնտեսական տեխնիկա են վերցրել ու պարտք մնացած գումարները չեն վճարել, եւ ինքը խնդրել է Գեւորգ Մելիքյանին, որպեսզի կարողանա նրա միջոցով այդ գումարները հետ ստանա:
Արդյունքում, 2020թ. մայիսի 29-ին Օշականցի Գևորիկը հանդիպման է կանչել վեճի կողմ հանդիսացող անձանց ու իր հեղինակությունն ու քրեական աստիճանակարգության բարձրագույն կարգավիճակից բխող հնարավորություններն օգտագործելով, լուծել է մասնավոր, այն է՝ գումարի վերադարձման հարցին առնչվող վեճը՝ պարտապանների համար սահմանելով կոնկրետ ժամկետներ շինարարական ապրանքները կամ դրանց համարժեք գումարները վերադարձնելու համար, ինչի արդյունքում 2020թ. մայիսի 30-ին և 31-ին պարտապանները պարտատիրոջն են վերադարձրել շինարարական ապրանքների մի մասը, որից վերջինս որպես փայաբաժին Գ.Մելիքյանին է փոխանցել մի քանի անուն գյուղատնտեսական տեխնիկա, որն էլ վերջինս ստացել է որպես անօրինական օգուտ:
Նշենք, որ Օշականցի Գեւորիկը դեռես 2020 թվականի օգոստոսի 28-ին ԱԱԾ քննչական դեպարտամենտում հարուցված քրեական գործի շրջանակում «Օշականցի Գևորիկե մականվամբ Գևորգ Մելիքյանի նկատմամբ խափանման միջոց է ընտրվել կալանավորումը: Եվ ահա այս գործով ԱԱԾ-ն հայտարարել է նախաքննության ավարտ եւ հիմա էլ նոր բացահայտում է իրականացվել Գեւորգ Մելիքյանի գործողությունների մասով:
.gif)
