BBC-ի ռուսական ծառայությունը հետաքննություն է անցկացրել համացանցում հայտնված մի տեսանյութի առնչությամբ, որտեղ երևում է, թե ինչպես են ադրբեջանցի զինծառայողները գնդակահարում երկու հայի:
Նախ ռուսական ծառայությունը նկատում է, որ հայկական կողմը նույնականացրել է մահացածներին եւ նշել, որ նրանք են 1947 թվականին ծնված Բենիկ Հակոբյանն ու 1995 թվականին ծնված Յուրի Ադամյանը:
«Կադրում լսվում է տղամարդու ակցենտով խոսքը, որը նրանց ասում է բարձրացնել ձեռքերը եւ քայլել: Նա նաեւ ադրբեջաներեն դիմում է իր զինակիցներին եւ խնդրում չծեծել գերիներին: Երիտասարդ գերին՝ Յուրի Ադամյանը, հանում է հագուստը, ապա բարձրացնում ձեռքերը եւ դուրս գալիս կադրից: Բեն Հակոբյանի հագին եւս զինվորական վերնազգեստ է: Տեսանյութում երևում է, թե ինչպես են զինվորները նրան քարշ տալիս գետնին, իսկ վերջինս էլ ցավից տնքում է: Երկրորդ տեսանյութում էլ երևում է նրանց գնդակահարելու կադրերը: Կադրերից երևում է, որ նրանց ձեռքերը կապված են, ուսերին Հայաստանի եւ Լեռնային Ղարաբաղի դրոշներն են», – նշում է լրատվական ծառայությունը:
Ապա ծառայությունը հոդվածում շարունակում է. «Նրանք նստած են աստիճաններին, ապա կադրում լսվում է. «նշան բռնել ճակատներին», հնչում է կրակոց, եւ մարմինները վայր են ընկնում գետնին»:
BBC-ն հաստատում է, որ կադրում հնչող տղամարդու ձայնում նկատվում է ադրբեջանական ակցենտ, որը կարող էր ունենալ հենց բնիկ, այնտեղ ծնված անձը: Բացի այդ, նրանք հաստատում են, որ առաջին եւ երկրորդ տեսանյութերի հայ մարդիկ նույնն են:
Ապա լրատվական ծառայությունը նշում է, թե որն է համարվում ռազմական հանցագործություն եւ նկատում, որ Ժնեւյան կոնվենցիաներին միացած է նաեւ Ադրբեջանը:
Ավելին, BBC-ն ուսումնասիրել է տեսանյութերը եւ պարզել, որ այս տեսանյութերը նկարահանված են Հադրութում՝ ամենաթեժ մարտերի վայրում: Նշվում է, որ տեսանյութերը համացանցերում հայտնվել են հոկտեմբերի 15-ին:
BBC-ն այս տեսանյութերը ցուցադրել է նաեւ բրիտանացի նախկին ռազմական հետախույզի, որը համաձայնվել է մեկնաբանել այն, սակայն պայմանով, որ կմնա անանուն: Եվ նա հաստատել է, որ սա իսկական սպանություն է:
.gif)
