ՏԵՍԱՆՅՈՒԹ. Ինչ արձագանքներ կան Ֆրանսիայի Սենատի որոշումից հետո, եւ ինչ կոչ է արել Թուրքիան

Պաշտոնական Անկարան անընդունելի է համարել Ֆրանսիայի Սենատի բանաձևը, որը երկրի կառավարությանը կոչ է անում ճանաչել Լեռնային Ղարաբաղի անկախությունը:

Թուրքիայի արտգործնախարարության հրապարակած հայտարարության մեջ նշվում է, որ «այս որոշումը հակասում է միջազգային իրավունքի հիմնարար սկզբունքներին և ի ցույց է դնում ԵԱՀԿ Մինսկի խմբի անդամ երկրի կողմնակալ կեցվածքը»:

Նախօրեին ընդունված Ֆրանսիայի Սենատի բանաձևը նաև դատապարտում է Ադրբեջանի ռազմական ագրեսիան, որն իրականացվել է Թուրքիայի իշխանությունների և օտարերկրյա վարձկանների աջակցությամբ, և կոչ է անում, որպեսզի անհապաղ դուրս բերվեն ադրբեջանական զինված ուժերը և նրանց աջակիցները այն տարածքներից, որոնք վերցվել են սեպտեմբերի 27-ից սկսված պատերազմական գործողությունների արդյունքում:

Թուրքական արտաքին գերատեսչությունը ֆրանսիացի օրենսդիրների այս կոչերը «անլուրջ, ծիծաղելի, կողմնապահ և իրականությունից կտրված մտայնության դրսևորում» է որակել:

«Ոչ մի խելամիտ հիմնավորում չունեցող, ողջամտությունից զուրկ այս որոշումը սահմանափակում է հիմնախնդրի լուծմանը իրապես նպաստելու Ֆրանսիայի հնարավորությունները: Ցանկանում ենք, որպեսզի Ֆրանսիան Հայաստանի և Ադրբեջանի միջև շուրջ 30 տարի շարունակվող հակամարտության այս հանգրվանում, ճիշտ հետևություններ անելով, տարածաշրջանային խաղաղության հաստատման համար կառուցողական մոտեցում որդեգրի: Դրա համար բավարար է առաջնորդվել ներկայիս իրողություններով և ջանքեր գործադրել միջազգային իրավունքին համապատասխան մնայուն լուծման հասնելու ուղղությամբ», – ասված է հայտարարությունում։

Արտգործնախարարությունը վստահեցնում է, որ Թուրքիան այս համատեքստում պատրաստ է աշխատել Ֆրանսիայի հետ:

Հայաստանի վարչապետը «պատմական» է որակել Արցախի անկախության ճանաչման անհրաժեշտության մասին Ֆրանսիայի Սենատի երեկ ընդունած բանաձևը։ «Արցախի միջազգային ճանաչումը մտնում է միջազգային օրակարգ», – իր ֆեյսբուքյան էջում գրել է Նիկոլ Փաշինյանը։

305 կողմ, մեկ դեմ ձայների հարաբերակցությամբ Ֆրանսիայի խորհրդարանի վերին պալատի ընդունած բանաձևը կառավարությանը կոչ է անում ճանաչել Լեռնային Ղարաբաղի անկախությունը՝ տարածաշրջանում տևական խաղաղություն հաստատելու համար։

Խորհրդատվական բնույթ կրող բանաձևի ընդունումը ողջունել է Արցախի արտաքին գործերի նախարարությունը՝ այն ևս պատմական որակելով ու սենատորներին երախտագիտություն հայտնելով։ Արցախի ԱԳՆ-ն հույս է հայտնում, որ Սենատի այս որոշմանը կհաջորդեն նույն բնույթի բանաձևերի ընդունմունը Ֆրանսիայի ազգային ժողովում, նաև աշխարհի տարբեր երկրներում։

Արցախի նախագահ Արայիկ Հարությունյանի կարծիքով էլ՝ այս բանաձևի ընդունումը նոր իրողությունների սկիզբ կհանդիսանա։

Մանրամասները՝ տեսանյութում