Մտահոգվելու բան չունենք, թող թշնամիները մտահոգվեն. Առուշ Առուշանյանը՝ Գորիսում տիրող իրավիճակի մասին

Սյունիքի մարզի Գորիս համայնքի ղեկավար Առուշ Առուշանյանը երեկ հանդես էր եկել կոչով՝ ասելով, թե այսօր այսօր ավելի քան կարևոր է ուժեղ ու միասնական լինել։ «Մենք դեռ խրամատում ենք, մեկ րոպե անգամ չենք թողել մեր սահմանը և շարունակում ենք ամուր կանգնած մնալ։ Բոլորիս միանալու համար անհրաժեշտ է կամավորագրվել՝ դիմելով Գորիսի համայնքապետարան», – նշել էր նա։

Այս ընթացքում հակասական լուրեր են տարածում  Հայաստանի հարավային դարպասներից, և դեռևս պարզ չէ, թե ինչ է կատարվում եւ կատարվելու Սյունիքի մարզի սահմաններին, իսկ Գորիս համայնքի ղեկավարն էլ փաստորեն ինքնապաշտպանության կոչ է անում: Այս եւ այլ հարցերի շուրջ զրուցել ենք Գորիսի քաղաքապետ Առուշ Առուշանյանի հետ:

-Պարո՛ն Առուշանյան, ինչո՞վ էր պայմանավորված Ձեր կամավորագրվելու կոչը:

-Ուղղակի պետք է մեր բանակի կողքը լինել՝ ինչպես մինչեւ հիմա եղել ենք եւ դա պետք է շարունակենք: Աշխարհազոր գորիսեցիները վաղուց են ձեւավորել եւ եղել են պատերազմի ամենաթեժ կետերում՝ Մելիքսեթ Պողոսյանի գլխավորությամբ, սակայն հիմա կա նաեւ մարդկանց փոխարինելու խնդիր, նաեւ դրանով էր պայմանավորված կոչս: Հիմա էլ գորիսեցիները սահմանում են:

-Հիմա Գորիսում ի՞նչ տրամադրվածություն է, քանի որ հակասական լուրեր են տարածվում:

-Նորմալ է իրավիճակը, ոչ մի խնդիր չկա: Ես սովորաբար ամեն օր դիրքերում եմ, մեր գորիսեցիների հետ շփվում եմ, որևէ խնդիր չկա, ամեն ինչ նորմալ է: Սա է իրավիճակը, ունենք այն, ինչ ունենք:

-Որո՞նք են լինելու հետագա քայլերը: Ի՞նչ պետք է անել՝ բնականոն կյանքի անցնելու համար:

-Ունենք այն, ինչ ունենք: Ի՞նչ պետք է անենք, մեր հողը թողնենք, գնա՞նք: Բնականաբար պետք է պահենք ու ինչպես մեր գյուղերը շենանում են , հիմա ավելի ուժեղ սկսենք շենացնել, վե՛րջ: Ոչ մի խնդիր չի կարող լինել, մենք մտահոգվելու բան չունենք, թող թշնամիները մտահոգվեն: Բացի այդ, պետք  է ուժեղանալ եւ հետ վերցնել այն, ինչը մերն է: Սա պետք է լինի յուրաքանչյուր հայի առաքելությունը:

-Հաշվի առնելով, որ Գորիսի մի քանի գյուղեր դարձան սահմանամերձ, ինչպիսի՞ն է տրամադրվածությունը: Կա՞ն բնակիչներ, որոնք որոշել են հեռանալ Գորիսից:

-Ոչ, մարդն իր տանից ո՞ւր թողի, գնա, ոնց թողենք գնանք: Դա ընդհանրապես քննարկման ենթակա չէ: Մենք մեր տները թողնենք, գնա՞նք: Իհարկե, կան գյուղեր, որտեղ հեռավորությունը սահմանից շատ մոտ է: Գրեթե բոլոր գյուղերն էլ սահմանամերձ են` Խնձորեսկ, Հարթաշեն, Որոտան, Շուռնուխ: Գորիսի բոլոր գյուղերն էլ սահմանամերձ են: Մեր գյուղերում մենք նոր նախագծեր ենք իրականացնում բնակիչների համար՝ բազմաբնակարան շենքեր կառուցելու նպատակով, այնպես որ նորմալ իրավիճակ է: Իհարկե, ոչ մի արժանապատիվ հայի համար այս իրավիճակը լավ չէ, չի կարող լավ լինել, բայց ունենք այն, ինչ ունենք:

զրուցեց Նաիրա Հովհաննիսյանը