Ֆրանսիայի նախագահ Էմանուել Մակրոնը նամակով դիմել է իր թուրք գործընկեր Ռեջեփ Թայիփ Էրդողանին՝ առաջարկելով զարգացնել հարաբերությունները Փարիզի և Անկարայի միջև:
Այս մասին, ըստ «Sabah»-ի , հայտնել է Թուրքիայի արտգործնախարար Մևլութ Չավուշօղլուն.
«Երկու օր առաջ մենք դրական նամակ ստացանք Մակրոնից, որը պարունակում էր հարաբերությունները կարգավորելու, մեր նախագահի հետ հանդիպելու նրա ցանկությունը», – պատմել է Չավուշօղլուն։
Էրդողանը Մակրոնի նամակին դրական է արձագանքել, ընդգծել է Թուրքիայի ԱԳ նախարարը։
Հիշեցնենք, որ երկու երկրների ղեկավարների հարաբերություններում լարվածությունն առաջացել է այն բանից հետո, երբ 2020 թվականի աշնանը Ֆրանսիայում տեղի ունեցան մի շարք աղմկահարույց հարձակումներ, որոնք տեղական իշխանությունների կողմից գնահատվել էին որպես «իսլամիստների ահաբեկչություններ»: Մասնավորապես, Փարիզում գլխատվեց պատմության դասախոս Սամուել Պատին, ով դասախոսության ժամանակ Մուհամեդ մարգարեի ծաղրանկարներն էր ցույց տվել:
Դրանից հետո Մակրոնն առաջարկել է երկրում խստացնել մզկիթների ֆինանսավորման վերահսկողությունը և հայտարարել, որ երկիրը չի հրաժարվի նման ծաղրանկարների հրապարակումից: Դա վրդովմունք է առաջացրել որոշ մահմեդական երկրներում, մասնավորապես՝ Թուրքիայում։
.gif)
