Եվրախորհրդարանի պատգամավոր, ՀՀ-ԵՄ բարեկամական խմբի ղեկավար Լուկաս Ֆուրլասը «Ժողովուրդ» օրաթերթի հետ զրույցում կարծիք հայտնեց, թե Լեռնային Ղարաբաղում ապագայի շուրջ իրենց անհանգստությունը շարունակվում է, քանի որ անկայունությունը կարող է ունենալ անկանխատեսելի հետեւանքներ:
-Պարո՛ն Ֆուրլաս, Արցախում 44 օր տեւիած պատերազմից եւ եռակողմ հայտարարությունից հետո երկու ամսից ավելի ժամանակ է անցել: Ի՞նչ կարող եք ասել Ղարաբաղի շուրջ ստեղծված իրավիճակի մասին:
-Քանի դեռ իրավիճակը տարածաշրջանում մնում է անմխիթար, եւ հակամարտությունները շարունակվում են, քաղաքացիները չեն կարող վերադառնալ նորմալ վիճակի եւ շարունակել իրենց կյանքը սահուն եւ խաղաղ: Լեռնային Ղարաբաղում ապագայի հանդեպ մեր անհանգստությունը շարունակվում է, քանի որ անկայունությունը, որն ստեղծվում է ամբողջ Հարավային Կովկասում, կարող է ունենալ անկանխատեսելի հետևանքներ: Մենք նկատի ունենք, որ քաղաքացիական բնակչությունը ստիպված է գոյատեւել ահաբեկչության եւ անորոշության պայմաններում: Մենք խորապես մտահոգված ենք այն հայերով, ովքեր մնում են այս տարածքում եւ ենթարկվում են բռնության եւ զանգվածային հետապնդումների: Հուսով եմ, որ այս ամենը հնարավորինս շուտ կավարտվի:
– Այդ դեպքում, ստեղծված իրավիճակում ո՞րն եք առաջնահերթ համարում:
-Հիմնական գերակայությունը չի կարող լինել այլ բան, քան կցված հրադադարի պահպանումն ու պատշաճ վերահսկումը: Խաղաղ եւ արդյունավետ լուծում գտնելն իդեալական սցենար է այն սկզբունքների եւ արժեքների համար, որոնք պաշտպանում է ԵՄ-ն: Մենք կողմ չենք բռնությանը եւ զենքի սպառնալիքի տակ դրա կիրառմանը: Լեռնային Ղարաբաղի բնակչությունը պետք է իրեն ապահով զգա եւ երկխոսություն վարի բոլոր ներգրավվածների հետ `ամբողջ տարածաշրջանում խաղաղություն եւ կայունություն ապահովելու համար: Ես ուզում եմ պարզ լինել: Դրան հասնելու միակ ճանապարհը դիվանագիտությունն է: Առաջին հնարավորության դեպքում նախատեսում եմ այցելել տարածք, քանի որ համաճարակային պայմաններն այս պահին դա թույլ չեն տալիս: Ես իմ պարտքն եմ համարում պարզել, թե ինչ է տեղի ունենում այնտեղ:
–Հայաստանն ունի ռազմագերիներ, որոնց Ադրբեջանը հրաժարվում է տալ: Ի՞նչ անել այս դեպքում:
– Ես շատ մտահոգված եմ այս խնդրով: Այդ է պատճառը, որ, ի վերջո, ես Եվրահանձնաժողովին բարձրաձայնել եմ ռազմագերիներին տեղակայելու, նրանց իրավունքները երաշխավորելու եւ նրանց վերադարձնելու պարտավորության մասին: Նման նախաձեռնություննեը կարող են ճնշում լինել Ադրբեջանի կառավարության վրա, որը կոչված է պատասխանելու դրանց: Հանձնաժողովին ուղղված հարցերը ճնշման լծակ են, եւ մենք այն պետք է օգտագործենք: Տեսե՛ք, մենք բոլորս պետք է ձեռնարկենք յուրաքանչյուրն իր տեսակով շարունակական դեէսկալացիայի, ռազմական գործողությունների վերջնական դադարեցման եւ հրադադարի ռեժիմի շարունակական նախաձեռնություններ: Մենք պետք է անընդհատ կրկնենք բանակցությունները, որի նպատակը, ինչպես նախկինում ասացի, հակամարտության քաղաքական եւ դիվանագիտական լուծման միակ նպատակն էր: ԵՄ-ն շահագրգռված է ակտիվացնելու հումանիտար հիմնախնդրի արդյունավետ եւ համապարփակ լուծմանն ուղղված համատեղ ջանքերը: Այնուամենայնիվ, ես չեմ կարող չնկատել, որ քանի դեռ հակամարտությունները շարունակվում են, նման հարցերի լուծումներ գտնելն ավելի է բարդանում:
–Թուրքիան եւ Ադրբեջանը կրկին զորավարժություններ են անցկացնելու եւ այս անգամ Հայաստանի սահմանի մոտ: Սա կարո՞ղ ենք որպես սպառնալիք ընկալել:
-Գաղտնիք չէ, որ երկու կողմերի մոտ էլ կա վստահության պակաս: Ինչ վերաբերում է Թուրքիային, ապա դրա նպատակը պարզ է: Որպեսզի Էրդողանը սպասարկի իր սեփական շահերը եւ մնա իշխանության մեջ, նա չի հապաղում խաղալ հազարավոր մարդկանց կյանքի հետ: Երկու երկրների, ինչպես Թուրքիայի, այնպես էլ Ադրբեջանի ղեկավարների հարաբերությունները շատ սերտ են, քանի որ նրանք բռնապետներ են, որոնք ճնշում են իրենց իսկ ժողովուրդներին: Դա փոխկախվածության կեղտոտ հարաբերություն է ՝ իշխանությունը պահպանելու համար: Սա այլեւս չի հանդուրժվում:
Զրուցեց Նաիրա Հովհաննիսյանը
.gif)
