«ՍԻՐՈ ԹԵՎԵՐ» ՀԵՌՈՒՍՏԱՍԵՐԻԱԼ. ԴԱԴԱՐ ՄԵԿ ՇԱԲԱԹՈՎ

Ինչպես երեկ հայտնի դարձավ, «Սիրո թեւեր» հեռուստասերիալի ցուցադրությունը հետաձգվելու է մեկ շաբաթով, քանի որ դերասաններից մի քանիսը վարակվել են կորոնավիրուս համավարակով:

«Հարգելի՛ հեռուստադիտող, «Սիրո Թեւեր» հեռուստանովելի ցուցադրությունը «ARTN»-ի եթերում մեկ շաբաթով հետաձգվելու է դերասաններից մի քանիսի՝ կորոնավիրուսով հիվանդանալու հետեւանքով: Հայցում ենք ձեր ներողամտությունն ու ակնկալում ձեր ընբռնումն իրավիճակի հետ կապված»,- գրված էր հայտարարության մեջ:

Այս մասին նաեւ իր սոցցանցի էջում հայտնել էր հեռուստասերիալի դերասանուհիներից Սոֆյա Պողոսյանը եւ տեղադրել էր հայտարարության տեսանյութն ու գրել. «Սիրելի՛ հեռուստադիտող, COVID-19-ը մեր սերիալի դերասաններին էլ չշրջանցեց, նաեւ ինձ, ինչի պատճառով «Սիրո թեւեր» -ը  մեկ եռշաբաթ չի ցուցադրվի»:

ArmLur.am-ը բազմաթիվ հեռուստադիտողների խնդրանքով փորձել է պարզել, թե ինչ վիճակում է գտնվում «Սիրո թեւեր» հեռուստասերիալի դերասանական կազմը, ովքեր են վարակվել, եւ երբ այն կրկին կհեռարձակվի։

Հեռուսատասերիալի գլխավոր դերակատար Մուրադ Նադիրյանը ArmLur.am-ի հետ զրույցում մեծ համոզմունքով հայտնեց, որ «Սիրո թեւեր» սերիալը կրկին եթեր կհեռարձակվի մեկ շաբաթից, եւ նշեց, որ դերասաններից ոչ բոլորն են վարակվել կորոնավիրուս համավարակով։

Դերասանը մեզ հետ զրույցում հայտնեց, որ նա եւս պատրաստվում է թեստ հանձնել՝ համոզվելու համար՝ վարակվել է, թե ոչ, քանի որ, ըստ նրա, արդեն երկու օր է, ինչ իրեն լավ չի զգում եւ ունի ջերմություն։

«Կարծում եմ՝  մեր սիրելի հեռուստադիտողներին շատ սպասեցնել չենք տա, միայն կցանկանամ նրանց  խնդրել, որպեսզի շատ ուշադիր լինեն իրենց նկատմամբ, հետեւեն բոլոր հակահամաճարակային կանոններին: Իրականում մենք մտածում էինք, որ վիրուսը նահանջել է, բայց ստացվեց այնպես, որ հերթով բոլորս սկսեցինք վարակվել։ Առողջություն եմ մաղթում բոլորին, սպասե՛ք մեզ նոր ու հետաքրքիր սերիալներով»,- նշում է մեր զրուցակիցը։

Մուրադի փոխանցմամբ՝ դերասանական անձնակազմը  հնարավորինս փորձել է նկարահանման հրապարակում եւ դրանից դուրս պահպանել անվտանգության կանոնները, բայց վիրուսից շրջանցել, այնուամենայնիվ, նրանց չի հաջողվել։

Իսկ, ահա, սիրված դերասանուհի Լուիզա Ղամբարյանը, որը նույնպես խաղում է հեռուստասերիալում, ArmLur.am-ի հետ զրույցում տեղեկացրեց, որ նա նույնպես վարակվածների թվում է եւ, Փառք Աստծու, կարողանում է հաղթահարել համավարակը։

Նշենք, որ Հայաստանում կորոնավիրուսով վարակվելու դեպքերը կտրուկ աճել են։ Մարտի 25-ին՝ ժամը 11:00-ի դրությամբ, նոր կորոնավիրուսով վարակվելու 1257 նոր դեպք է գրանցվել, վարակվածների ընդհանուր թիվը հասել է 187 441 դեպքի:

ԼԻԴԱ ԵՂԻԱԶԱՐՅԱՆ

ՄԵԿՆԱՐԿԵԼ Է «ԵՐԱԺՇՏՈՒԹՅՈՒՆ՝ ՀԱՆՈՒՆ ԱՊԱԳԱՅԻ» ՀԱՄԵՐԳԱՇԱՐԸ

Երեւանի երաժշտական կրթօջախներում մեկնարկել են «Երաժշտություն հանուն ապագայի» կրթաթոշակառուների համերգները:

Անդրանիկ համերգը տեղի է ունեցել Երեւանի Սայաթ-Նովայի անվան երաժշտական դպրոցում, այնուհետեւ պատանի երաժիշտները հանդես են եկել Երեւանի Ռոմանոս Մելիքյանի երաժշտական քոլեջում:

Ընտրությունը պատահական չի եղել. 11-17 տարեկան պատանի կրթաթոշակառուներ Դավիթ Բոյաջյանը (ջութակ), Ասյա Անիսիմովան (ջութակ), Հայկ Հեքեքյանը (հոբոյ), Տիգրան Գասպարյանը (հոբոյ), Դավիթ Տոնոյանը (ֆագոտ), Սաթենիկ Գալստյանը (գալարափող), Միհրան Առաքելյանը (շեփոր), Սամվել Դավթյանը (տրոմբոն), Գուր Սարգսյանը (դաշնամուր) Հայաստանի լավագույն երաժշտական կրթօջախների սաներ են: Երեկոների ընթացքում նրանք կատարել են Ք. Սեն-Սանսի, Վ. Մոցարտի, Ռ. Ֆարնաբիի, Գ?Ֆարնաբիի, Ժ. Ռամոյի, Հ. Վենյավսկու, Է. Բոցցայի, Է. Լալոյի, Վ. Ուսպենսկու, Ռ.Շումանի, Յ.Հայդնի, Դ. Պոպպերի, Ֆ. Լիստի, Ս. Ռախմանինովի, Ժ. Արբանի ստեղծագործությունները: Համերգների ավարտին կրթաթոշակառուները միասին ներկայացրել են Արամ Խաչատրյանի «Այշեի պարը» Գայանե բալետից, որը հատուկ նրանց համար գործիքավորել է երիտասարդ կոմպոզիտոր Վահագն Վարդանյանը: ՀՀ արվեստի վաստակավոր գործիչ, կոմպոզիտոր Էդուարդ Հայրապետյանի գնահատմամբ՝ տաղանդավոր երեխաների բացահայտումն ու նրանց ցուցաբերված աջակցությունը շատ կարեւոր քայլ է, որն իրականացնում է «Երաժշտություն հանուն ապագայի» հիմնադրամը՝ Հայաստանի պետական սիմֆոնիկ նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանի նախաձեռնությամբ:

Հիմնադրամի ստեղծման գաղափարն ուղղված է Հայաստանի պատանի երաժիշտ կատարողների ստեղծագործական զարգացմանն ու խթանմանը, եւ հենց այս մասին իր խոսքում նշել է խմբավար, մանկավարժ, Երեւանի Կոմիտասի անվան կոնսերվատորիայի պրոֆեսոր,  «Հայաստանի փոքրիկ երգիչներ» երգչախմբի գեղարվեստական ղեկավար ու գլխավոր դիրիժոր, Սայաթ-Նովայի անվան երաժշտական դպրոցի տնօրեն Տիգրան Հեքեքյանը:

ԿԻՍԱՊԱՇՏՊԱՆԸ ՄԱՀԱՑԵԼ Է

Իտալական «Լացիոյի» երիտասարդական թիմի կիսապաշտպան Դանիել Գերինին մահացել է ավտովթարի հետեւանքով. hաղորդում է ակումբի մամուլի ծառայությունը: Դժբախտ պատահարը տեղի է ունեցել Հռոմում: 19-ամյա իտալացին եղել է Smart For Four մեքենայի ուղեւորների թվում: Մյուս 2 ուղեւորները ստացել են ծանր վնասվածքներ: Դանիել Գերինին «Լացիոյի» ակադեմիայի սան է, իսկ 2016-ին տեղափոխվել էր «Տորինո», այնուհետեւ խաղացել նաեւ «Ֆիորենտինայի» պատանեկան թիմերում: Նախորդ տարի նա վարձավճարով տեղափոխվել էր «Սպալ», իսկ հունվարին վերադարձել էր «Լացիո»՝ կնքելով 3 տարվա պայմանագիր:

ՌԵԿՈՐԴԸ ԿՐԿՆԵԼ Է

Ֆուտբոլի աշխարհի փոխչեմպիոն, Խորվաթիայի հավաքականի կիսապաշտպան Լուկա Մոդրիչը, աշխարհի առաջնության ընտրական փուլի առաջին տուրում խաղալով Սլովենիայի թիմի դեմ, 134-րդ հանդիպումն է անցկացրել ազգային թիմում: 35-ամյա ֆուտբոլիստը կրկնել է Խորվաթիայի հավաքականի պատմության մեջ ամենաշատ հանդիպում անցկացրած Դարիո Սրնայի ռեկորդը: Մոդրիչը 2006 թվականից է հանդես գալիս Խորվաթիայի հավաքականում, որի կազմում խփել է 16 գոլ: Հիշեցնենք, որ այդ խաղում խորվաթները նվազագույն հաշվով պարտվել էին հյուրընկալվելիս:

ՀԱՅՏԱՑՈՒՑԱԿ

Ֆուտբոլի Հայաստանի ազգային հավաքականի իսպանացի գլխավոր մարզիչ Խոակին Կապառոսը ներկայացրել է թիմի հայտացուցակը Լիխտենշտեյնի դեմ աշխարհի առաջնության ընտրական փուլի J խմբի առաջին տուրի հանդիպման համար: Մրցավայր մեկնած ֆուտբոլիստներից հայտացուցակում չեն ընդգրկվել Գեւորգ Ղազարյանը («Լամիա»), Հակոբ Հակոբյանը («Ուրարտու»), Ժոաո Ժորդի Մոնրոյ Արարատը («Նոա») եւ Վբեյմար Անգուլոն («Արարատ-Արմենիա»). hաղորդում է ՀՖՖ մամուլի ծառայությունը: Լիխտենշտեյն-Հայաստան հանդիպումը տեղի կունենա մարտի 25-ին Վադուցի «Ռեյնպարկ» ստադիոնում եւ կմեկնարկի Երեւանի ժամանակով 23:45-ին: Հանդիպումը կսպասարկեն ավստրիացի մրցավարներ՝ 36-ամյա Յուլիան Վեինբերգերի գլխավորությամբ: Հիշեցնենք, որ Հայաստանի եւ Լիխտենշտեյնի հավաքականները հանդիպել են չորս անգամ, բոլորը՝ վերջին տարիներին: 4 խաղերում հայկական թիմը տարել է 2 հաղթանակ, եւս 2 հանդիպում ավարտվել է ոչ-ոքի: Ընդ որում, Հայաստանի հավաքականը Լիխտենշտեյնին չի կարողացել հաղթել հյուրընկալվելիս: