ՏԵՍԱՆՅՈՒԹ. «Տուն չեմ մտնում, սիրտս մղկտում է». Ֆիրդուսի կառուցապատման ծրագիրը ձախողված է

Երեւանի Ֆիրդուս շուկայի տարածքը, որը գերակա շահ ճանաչվեց դեռեւս 2007 թվականին օտարվեց մի ընկերության, որը խոստացել էր այդ նույն տարածքում բազմաբնակարան շենք կառուցել եւ դրանք հատկացնել այդտեղ ապրող բնակիչներին: Բայց արդեն մի քանի տարի է, ինչ այս խոստումները չեն իրականանում, անգամ քանդման աշխատանքները չեն սկսվել: Իսկ այն բնակիչները, որոնք քանդման աշխատանքների պատճառով իրենց բնակարանները պետք է իրացնեն, հայտնվել են անորոշ վիճակում. սպասում են կառավարության առաջարկին: Իսկ կառավարությունից դանդաղում են:

Ի դեպ, կան բնակիչներ, որոնք իրենց բնակարանները իրացրել են, բայց ցածր գներով: Օրինակ, ֆիրդուսցի 81-ամյա Գագաս պապիկը, որը ծնվել եւ մեծացել է 33-րդ թաղամասում, իր հայրական տունն արդեն օտարել է՝ քառակուսի մետրը մոտ 1100 դոլարով, այն դեպքում, երբ այդ ժամանակահատվածում կենտրոնում բնակարանների քառակուսի մետրի կադաստրային արժեքը գերազանցել է 1100 դոլարը: Բայց չի դժգոհում, ասում է՝ ստացած գումարով կարողացել է 92 քմ բնակարան ձեռք բերել:

Տունը գնել է, բայց միեւնույն է՝ չի կտրվում հարազատ թաղամասից: Իրացրած բնակարանի բանալիներն ամուր պահում է գրպանում, ամեն օր գալիս է Ֆիրդուս եւ հանդիպում նախկին հարեւանների հետ: Բայց ամեն օր տուն չի մտնում, ասում է՝ սիրտս մղկտում է:

Ի դեպ, տեղեկացնենք, որ ապրիլի 7-ին ՀՀ փոխվարչապետ Տիգրան Ավինյանի գլխավորությամբ տեղի է ունեցել Երեւանի 33-րդ թաղամասի (Ֆիրդուսի) կառուցապատման ծրագրի շրջանակներում իրականացվող աշխատանքները համակարգող աշխատանքային խմբի նիստը:

Տիգրան Ավինյանը հայտարարել է, որ 33-րդ թաղամասի կառուցապատման գործընթացն առաջ է գնում՝ նախ նկատի ունենալով նախագծային աշխատանքների իրականացման գործընթացում ՇՄԱԳ-ի դրական եզրակացության ստացումը, ապա նշել է, որ այս տարի պետք է տրվի կառուցապատման ծրագրի մեկնարկը:

Թե երբ կսկսվեն կառուցապատման աշխատանքները, հստակ ժամկետներ չկան: Անգամ հայտնի չէ, թե երբ են իրացվելու մյուս բնակիչների տները: Այս պահի դրությամբ փաստենք, որ Երեւանի 33-րդ թաղամասի՝ Ֆիրդուսի կառուցապատման ծրագիրը ձախողված է:

Սյունէ Համբարձումյան, Հովսեփ Հովսեփյան

Մանրամասները՝ տեսանյութում