Հայ գերիների ու տեղահանված անձանց հարցի քննարկումը քվեարկությամբ երեկ ներառվեց Եվրախորհրդի Խորհրդարանական վեհաժողովի (ԵԽԽՎ) լիագումար նիստի օրակարգում։ Հարցն ընդունվել է ձայների 93 «կողմ», 21 «դեմ» և 18 «ձեռնպահ» հարաբերակցությամբ։ Հայ գերիների հարցը քննարկվելու է այսօր:
Հարցին, ինչպես և սպասվում էր, դեմ են քվեարկել Ադրբեջանի ու Թուրքիայի պատվիրակները, նաև Ռուսաստանի 5 պատգամավորներ՝ Իրինա Ռոդնինան, Նիկոլայ Ռժակը, Յուրի Օլենիկովը, Սերգեյ Պախոմովն ու Լեոնիդ Սլուցկին։ Դեմ են քվեարկել նաև մեկական պատգամավորներ Սերբիայից ու Հունգարիայից։ Իսկ Ռուսաստանից 7 պատգամավոր էլ ձեռնպահ է քվեարկել:
Ռուսաստանի պատվիրակների այսպիսի քվեարկությունը շահարկումների առիթ էր հանդիսացել, որ ՀՀ-ի ռազմավարական դաշնակցի ներկայացուցիչները դեմ են քվեարկում այդպիսի հարցին: Սակայն նկատենք, որ այդ քվեարկությունը վերաբերում է ոչ միայն այդ հարցին. փաթեթում ներառված է եղել վեց հարց, որից մեկն էլ եղել է գերիների հարցի քննարկումը, սակայն այդ նույն փաթեթում ներառված էր հարց նաեւ Ալեքսեյ Նավալնիի մասով, որն էլ պատճառ է դարձել նման քվեարկության համար:
.gif)
