ՉԱՐԱՃՃԻ, ԽԵԼՈՔ ՈՒ ՀԱՄԵՍՏ

Տարիներ շարունակ ուսուցչի տոնը նշվում էր հոկտեմբերի առաջին կիրակի օրը, բայց այս տարի Ազգային Ժողովը միաձայն առաջին ընթերցմամբ ընդունեց ՀՀ օրենքում լրացում կատարելու մասին օրինագիծը, որի համաձայն` այսուհետ պաշտոնական տոնացույցում ուսուցչի օրը կնշվի հոկտեմբերի 5-ին:Իրենց դպրոցի, ուսուցիչների եւ դպրոցական տարիների մասին «Ժողովուրդ» օրաթերթին պատմեցին երգչուհիներ ՆՈՒՆԵ ԵՍԱՅԱՆՆ ու ԱՐՄԻՆԿԱՆ, ինչպես նաեւ փոքրիկ Անուշիկ Բադեյանը, ով սովորում է Վարդենիսի  N2 դպրոցի 2 ա դասարանում: Փոքրիկի խոսքերից կարելի էր ենթադրել, որ նա սիրով է գնում դպրոց. «Դպրոցում շատ լավ է, մենք դասամիջոցին խաղում ենք: Լինում է, որ դասի ժամանակ մեր ուսուցիչները դասը խաղերով են անցկացնում, որ մեզ հետաքրքիր լինի: Ես որ գնում եմ դպրոց, պետք ա պարտադիր դասերս սովորած լինեմ: Երկու դասատու ունեմ, երկուսին էլ սիրում եմ: Մեկը մեզ մայրենի ու մաթեմատիկա է դասավանդում` ընկեր Կարապետյանը, մյուսն էլ ռուսերեն` ընկեր Մելքոնյանը: Մեր դասատուները մեզ հետ ընկերական են: Սիրում եմ դպրոցն ու իմ դասարանցիներին»: Այսպես է փոքրիկ Անուշիկն ընկալում իր ուսուցիչներին ու դպրոցը: Հիմա տեսնենք, թե իրենց դպրոցական տարիներից ինչպիսի հուշեր ունեն մեզ հայտնի մարդիկ:  ՆՈՒՆԵ ԵՍԱՅԱՆ-Շատ լավ եմ հիշում իմ դպրոցական տարիները: Բոլոր ուսուցիչներիս էլ սիրում էի: Իսկ առարկաներից նախընտրում էի մաթեմատիկան ու ֆիզիկան: Ճշգրիտ առարկաներ էի սիրում, դա երեւի իմ բնավորությունից է, հիմա էլ պետք է ամեն ինչ իր տեղում լինի, հաշվարկված:Ես չարաճճի, խելոք ու համեստ աշակերտ եմ եղել: Հակասական բան ստացվեց, բայց այդպես է: Երբ դասարանում էի, պարտաճանաչ աշակերտուհի էի, իսկ դասամիջոցին լրիվ հակառակ պատկերն էր:Վառ հիշողություններ դպրոցից շատ ունեմ. հիշում եմ տարեվերջի մեր միջոցառումները, որտեղ մենք նվագախմբով համերգներ էինք տալիս: Այ՛ հիմա, որ հիշում եմ, ծիծաղելի է մի տեսակ:Ուսուցիչները մեր կյանքում մեծ դերակատարություն են ունեցել: Կար ուսուցիչ, որ իսկապես մոր նման էր, կար այնպիսին, որ միայն իր հագուկապով մեր մեջ էթիկայի կանոններ էր դաստիարակում: Մաղթանք: Թող մեր ուսուցիչներն ունենան շատ խելացի աշակերտներ եւ լավ աշխատավարձ:ԱՐՄԻՆԿԱ-Սովորել եմ Սիամանթոյի անվան N162 դպրոցում եւ ակտիվ դպրոցական տարիներ եմ ունեցել: Սիրել եմ դպրոցս, ուսուցիչներին, ովքեր, իսկապես, շատ լավն էին: Երբ ասում են, որ դպրոցը երեխայի երկրորդ ընտանիքն է, ինչ-որ տեղ համաձայն եմ դրա հետ, քանի որ օրվա մի մասը երեխան այնտեղ է անցկացնում: Շատ կարեւոր են ուսուցիչ-երեխա հարաբերությունները, հատկապես առաջին տարիներին: Եթե ուսուցչի շնորհիվ երեխան սիրեց դպրոցը, ուրեմն նա կոչումով մանկավարժ է: Ես, բարեբախտաբար, էնպիսի ուսուցիչներ եմ ունեցել, որ իրենց շնորհիվ կրկնակի ավելի շատ եմ սիրել դպրոցը: Ուսուցիչներից շատ խորհուրդներ են եղել, որոնք ինձ մինչ այսօր էլ օգտակար են: Մայրս էլ երկար տարիներ դասվար էր, չնայած ինձ դաս չի տվել: Առարկաներից ամենաշատը սիրել եմ հայոց լեզու եւ գրականություն, ռուսաց լեզու եւ գրականություն:  Եթե խոսենք ուսուցչի տոնի մասին, ապա դա աննկարագրելի տոնական արարողություն էր մեր դպրոցում: Առավոտվանից սկսվում էր տոնը: Հետաքրքիր մի բան էլ կար մեր դպրոցում: Լավագույն աշակերտներն այդ օրն իրենք էին անցկացնում իրենց դասարանի որեւէ դասաժամ: Մաղթանք: Առաջին հերթին կմաղթեմ ծով համբերություն, ամենակարեւորը` սիրեն այն մասնագիտությունը, որ իրենք ընտրել են: Սիրեն երեխաներին, որ կարողանան ճիշտ վերաբերել նրանց: Քաջ առողջություն մեր մանկավարժներին: Դա կարեւոր մասնագիտություն է, եւ որ երկրում էլ որ ուսուցիչը լինի, նա պետք է գնահատված լինի ոչ միայն իր աշակերտների, այլեւ պետության կողմից:ԵՎԱ ՌՈՒԲԻՆՅԱՆ