ԱԺ-ի կողմից Սահմանադրական դատարանը լուծարելու որոշման մեջ ՍԴ-ն հակասահմանադրական ոչինչ չի տեսել. հայտնի է որոշումը

Մայիսի 3-ին Սահմանադրական դատարանի պաշտոնական կայքում տեղադրվել է ապրիլի 29-ին կայացրած ԱԴՈ-1590 որոշումը՝ ՀՀ ԱԺ պատգամավորների ընդհանուր թվի առռնվազն 1/5-ի դիմումի հիման վրա՝ «Ազգային Ժողովի կանոնակարգ» սահմանադրական օրենքի 86-րդ հոդվածի 2-րդ և 7-րդ մասերի, 5-րդ հոդվածի 2-րդ մասի 4.2-րդ կետի՝ Սահմանադրությանը համապատասխանության հարցը որոշելու վերաբերյալ գործով:  Խոսքը վերաբերում է Սահմանադրական փոփոխությունների նախագծին, որով առաջարկվում էր պաշտոնից ազատել արդեն 12 տարի պաշտոնավարած ՍԴ դատավորներին, նաև պաշտոնից ազատել ՍԴ նախագահին: Ինչպես հայտնի է,  իրավաբանների մեծ մասը բարձրացնում էին այն հարցը, թե այս փոփոխությունները հակասահմանադրական են, իսկ խորհրդարանական ընդդիմադիրն ուժերն էլ 2020թ․ հունիսի 26-ին դիմում էին ներկայացրել ՍԴ:

Եվ ահա, Սահմանադրական դատարանի որոշման մեջ արձանագրված է, որ Սահմանադրական փոփոխությունները, որով ՍԴ 3 անդամի լիազորությունները համարվում է ավարտված, իսկ 4 անդամի պաշտոնավարման ժամկետը կրճատվել է, ՍԴ 7 անդամներից բացի, որևէ այլ անձի չեն վերաբերել և որևէ այլ անձի համար ուղղակի իրավական հետևանք չեն առաջացրել, արձանագրել է, որ կատարված փոփոխությունները որևէ կերպ չեն միջամտել և փոփոխել Սահմանադրության անփոփոխելի դրույթների և այն դրույթների բովանդակությունը, որոնք ենթակա են փոփոխության բացառապես հանրաքվեով:

Ըստ ՍԴ-ի՝ Սահմանադրության 2020թ․ փոփոխությունները համակարգային իմաստով հանգեցրել են ՍԴ-ում պաշտոնավարող բոլոր դատավորների հավասար ժամկետով ու կարգավիճակով պաշտոնավարելուն, որ այդ փոփոխություններով «ԱԺ-ն ամբողջությամբ սպառել է Սահմանադրական դատարանի մինչև 2018 թվականի ապրիլի 9-ը նշանակված և պաշտոնավարող անդամների և նախագահի պաշտոնավարման ժամկետների նկատմամբ իր սահմանադրական լիազորությունը՝ Սահմանադրական դատարանի դատավորների և Սահմանադրական դատարանի նախագահի պաշտոնավարման ժամկետների կարգավորումը տեղափոխելով բացառապես Սահմանադրության 166-րդ հոդվածով նախատեսված առավել կայուն սահմանադրական իրավադրույթների գործողության տիրույթ, որոնք կարող են փոփոխվել բացառապես Հայաստանի Հանրապետության ժողովրդի կողմից»:

Արդյունքում՝ ՍԴ-ն որոշել է, որ «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 4.2-րդ կետը, 86-րդ հոդվածի 2-րդ և 7-րդ մասերը համապատասխանում են Սահմանադրությանը, այլ կերպ ասած՝ իշխող ուժի գործողություններում ոչ մի հակասահմանադրական տարր չկա:

Միևնույն ժամանակ, Սահմանադրական դատարանի 5 դատավոր՝ Վահե Գրիգորյանը, Հրայր Թովմասյանը, Արայիկ Թունյանը, Աշոտ Խաչատրյանն ու Արևիկ Պետրոյանը, այս որոշման վերաբերյալ ներկայացնելու են հատուկ կարծիքներ:

Ն.Հ.