Սիրված դերասանուհի Ալինա Ավետիսյանը ArmLur.am-ի հետ զրույցում անդրադարձել է «Խաբկանք» հեռուստասերիալում իր կերպարի դրական եւ բացասական կողմերին, ինչպես նաեւ խոսել ենք առաջիկա նորությունների եւ ծրագրերի մասին։
«Վարդի կերպարը խանդոտ մոր՝ սեփականատիրական զգացողությամբ իր երեխաների վրա, այն շատ տարբեր է իմ իրական տեսակից, եւ դա բնական է. ես Ալինան եմ, իսկ նա՝ Վարդը: Ստացված է համարվում այն կերպարը, երբ հեռուստադիտողը քեզ հավատում է, որ իրական կյանքում նույնպես այդպիսին ես: Կերպարի մեջ մտնելու համար նախ պետք է հասկանալ կերպարի հոգեբանությունը, ներաշխարհը: Վերջիվերջո դերասանի մասնագիտությունն այն է, որ կարողանաս արագ կերպարանափոխվել եւ մտնել կերպարի մեջ: Վարդի տեսակը իմ տեսակից շատ հեռու է, մարդկային ցանկացած սպեցիֆիկ արարքները հասկանում եմ, եւ չեմ սիրում խնդրահարույց իրավիճակներ ստեղծել: Վարդի մոտեցման եւ վերաբերմունքի մեջ կան գծեր, որոնք ես ինքս հավանում եմ եւ կարծում եմ, որ կարեւոր եւ հիմնական բնավորության գծեր են: Ես նույնպես կողմ եմ, որ պետք է հարգել եւ պահպանել այն արժեքները, որով բնութագրում են մեզ, եւ ոչ մի կերպ այն չոտնահարվի՝ լինի դա նեղ վիճակ, թե լայն: Կան մարդկային կետեր օրենսգրքում, որոնք երբեք չպետք է ոտնահրավեն, հակառակը, պետք է պահենք եւ պահպանենք: Ես իմ բոլոր հարազատներին հարգում եւ սիրում եմ, պահում եմ նրանց պատվով բարձրության վրա, իսկ իմ գործողությունների մեջ ես անսահմնափակ եմ եւ երբեք չեմ մտածել, որ իմ այս կամ այն արարքի համար իմ հարազատներից մեկն այս ինչ բանը կմտածի կամ քննարկման թեմա կդարձնի»,-ասում է մեր զրուցակիցը:
Դերասանուհու կարծիքով՝ այսօրվա կյանքը թելադրում է իր կանոններն ու մտածելակերպը: Ըստ նրա՝ անվանդույթները ժամանակի ընթացքում ձեւափոխվում են՝ իրենց տեղը զիջելով նոր արժեքների ստեղծմանը. «Ապրել այսօր, հենվել ամբողջովին հին ավանդույթների վրա, դա ուղղակի ուղեղիս մեջ չի տեղավորվում: Ինձ համար կան կետեր, թե՛ կարդկային արժեքներից, թե՛ ավանդույթներից սկսած՝ բոլոր ժամանակնեի համար են, եւ պետք է պահենք սրբության նման: Ես ավելի շատ կողմնակից եմ ոչ թե ազգային ավանդույթներին, այլ մարդկային արժեքների պահպանմանը»:
Ալինա Ավետիսյանը մեզ հետ զրույցում հատկապես իր դժգոհությունն է հայտնում հեռուստատեսությունների որդեգրած քաղաքականության վերաբերյալ:
«Ճիշտն ասած, ես շատ զայրանում եմ այն աշխատելաոճի վրա, որ ձեռնարկել են «TV»-ները. եթե ինչ-որ մի տեղ դու նկարահանվում ես, ապա այլեւս քեզ այլ հեռուստաընկերությունից չեն հրավիրում: Չգիտեմ, թե ինչից է գալիս այդ քաղաքականությունը: Դերասանը իր գործունեության մեջ պետք է լինի ազատ: «TV»-ների այդ ինտրիգային սկզբունքայնությունն ինձ սարսափելի զայրացնում է եւ ավելորդ տարօրինակ լարվածություն առաջացնում: Նման գործունեությունը ճնշում եւ արհեստական պատնեշներ են ստեղծում մեզ՝ դերասաններիս համար: Դրանք շատ ճնշող էժանագին հարցեր են, ես կուզենայի նկարահանվել, ստեղծագործել ե՛ւ այստեղ ե՛ւ այնտեղ»:
ԼԻԴԱ ԵՂԻԱԶԱՐՅԱՆ
ԿՆԵՐԿԱՅԱՑՆԻ ՍԱՐՈՅԱՆԻ «ԹՐԵՅՍԻԻ ՎԱԳՐԸ» ՎԻՊԱԿԸ
Սոս Սարգսյանի անվան համազգային թատրոնը մայիսի 8-ին եւ 19-ին հանդիսատեսին կներկայացնի Վիլյամ Սարոյանի «Թրեյսիի վագրը» հայտնի վիպակի թատերայնացված ընթերցանությունը:
Վիպակը սարոյանական աշխարհազգացողությամբ եւ փոխաբերության շնչով լցված Թոմաս Թրեյսիի եւ Լորա Լյութիի սիրային ոդիսականն է։ Այն յուրաքանչյուրի մեջ ապրող «վագրի»՝ երազանքի, սիրո, հաղթանակի եւ ուժի մասին է։
Դերերում են Անդրանիկ Միքայելյանը, Ժաննա Վելիցյանը, Արման Նավասարդյանը, Կորյուն Բուդուրյանը, Ալեքսանդր Գասպարյանը: Դերասանների հետ աշխատել է Տաթեւ Ղազարյանը:
Թատերայնացված ընթերցանությունը պատրաստում են ռեժիսորն ու պրոֆեսիոնալ դերասանները։ Այն ինքնատիպ ներկայացում է։ Չկան դեկորացիաներ ու զգեստներ, բայց կա երեւակայություն։ Չկա միզանսցեն, բայց կան դերասաններ, որոնք ստեղծում են կերպարի բնավորությունը։ Կա խոսք, որը կենդանանում է դերասանների արտաբերմամբ, կա բեմադրական միտք, որը ռեժիսորը ձգտում է տեղ հասցնել։ Կա յուրահատուկ հանդիսատեսը, որը կարող է արտահայտել իր կարծիքը քննարկման ժամանակ, որը տեղի կունենա ընթերցանությունից անմիջապես հետո։
Վիլյամ Սարոյանը ծնվել է Ֆրեզնոյում՝ (Կալիֆորնիա, ԱՄՆ) Բիթլիսից գաղթած հայ ընտանիքում։
Գրողի ձեւավորման վրա մեծ դեր է խաղացել ինքնակրթությունը, ամերիկյան ու համաշխարհային գրականության ընթերցումը, հարազատ ժողովրդի հոգեւոր մշակույթի, ավանդույթների, պատմության տարրերի ժառանգումը, հայկական շրջապատի ազգային ինքնատիպությունը։
Գրական կյանքի առաջին տասնամյակում Սարոյանը գրել է մի քանի հարյուր պատմվածք, որոնց մեծ մասն ամփոփվել է տասից ավելի ժողովածուներում։ Սարոյանը հատկապես կարճ պատմվածքի, նորավեպի ժանրում ներմուծել է տեղի ու ժամանակի իրողության հետ սերտորեն կապված սոցիալական-հոգեբանական թարմ թեմատիկա, արդիական հնչողություն ունեցող մարդասիրական բարոյական մոտիվներ, պատումի նոր ձեւեր, քնարականությամբ ու հումորով լի հնչերանգներ, բնականություն եւ ճշմարտացիություն, պատկերների ու կերպարների գունագեղություն: Գրողի հայտնի ստեղծագործություններից են «Իմ սիրտը լեռներում է», «Հե՜յ, ո՞վ կա այդտեղ», «Իմ անունը Արամ է»…
Հեղինակի «Քո կյանքի ժամերը» պիեսը արժանացել է Պուլիցերի մրցանակի։
7-ՐԴ ՏԵՂԸ
Հայաստանի առաջատար ձյուդոիստ, Եվրոպայի չեմպիոն Ֆերդինանդ Կարապետյանը (73 կգ) մասնակցել է Ռուսաստանի Կազան քաղաքում անցկացվող ձյուդոյի «Մեծ սաղավարտ» շարքի մրցաշարին, որը վարկանիշային է Տոկիոյի Օլիմպիական խաղերի համար: 3 հաղթանակ տանելուց հետո հայ ձյուդոիստը դուրս է եկել քառորդ եզրափակիչ, որտեղ պարտվել է ռուսաստանցի Մախմադբեկ Մախմադբեկովին: Ռուսաստանցի ձյուդոիստը հասել է եզրափակիչ, եւ Կարապետյանը հնարավորություն է ստացել պայքարել բրոնզե մեդալի համար, սակայն սփոփիչ գոտեմարտում պարտվել է բելառուս Վադիմ Շոկային: Ֆերդինանդ Կարապետյանը գրավել է 7-րդ տեղը: Հիշեցնենք, որ Ֆերդինանդ Կարապետյանը Հայաստանի միակ ձյուդոիստն է, որը պահպանում է Տոկիոյի Օլիմպիական խաղերի ուղեգիր նվաճելու շանսերը:
ՆՎԱՃԵԼ Է ՉԵՄՊԻՈՆԻ ԿՈՉՈՒՄԸ
Կանադայի հավաքականը նվաճել է տափօղակով հոկեյի աշխարհի պատանեկան չեմպիոնի կոչումը: Պատանեկան ԱԱ-ի եզրափակիչում կանադացիները 5:3 հաշվով առավելության են հասել Ռուսաստանի թիմի նկատմամբ: ԱՄՆ-ում տեղի ունեցած մրցաշարի ամենաարժեքավոր խաղացող է ճանաչվել Ռուսաստանի հավաքականի հարձակվող Մատվեյ Միչկովը: 16-ամյա հոկեյիստը 7 խաղում հավաքել է 16 միավոր եւ արժանացել նաեւ մրցաշարի լավագույն ռմբարկուի մրցանակին: Կանադայի հավաքականը չորրորդ անգամ է հաղթում պատանեկան աշխարհի առաջնությունում եւ այդ ցուցանիշով գերազանցեց Ռուսաստանին:
ՆԵՐՈՂՈՒԹՅՈՒՆ Է ԽՆԴՐԵԼ
Մադրիդի «Ռեալի» բելգիացի կիսապաշտպան Էդեն Ազարը ներողություն է խնդրել ակումբի երկրպագուներից, որոնց զայրույթն էր առաջացրել Չեմպիոնների լիգայի կիսաեզրափակիչի պատասխան խաղում իր նախկին ակումբ Լոնդոնի «Չելսիից» կրած նվազագույն հաշվով պարտությունից ու մրցաշարից դուրս մնալուց հետո: Հանդիպման վերջում Ազարը բարձր տրամադրությամբ ու ծիծաղելով հաղորդակցվել էր նախկին թիմակիցների հետ, ինչը դուր չի եկել «Ռեալի» ֆանատներին: Նրանք սոցցանցերում ակումբի ղեկավարությանը կոչ էին արել վաճառել բելգիացուն, որն այդ խաղում փոխարինման էր դուրս եկել 89-րդ րոպեին: «Այսօր բազմաթիվ կարծիքներ կարդացի իմ մասին: Չէի ցանկանում նեղացնել «Ռեալի» երկրպագուներին: Ներողություն եմ խնդրում: Միշտ երազել եմ խաղալ «Ռեալում» եւ տեղափոխվել եմ այստեղ, որպեսզի հաղթեմ: Մրցաշրջանը դեռ չի ավարտվել: Հիմա բոլորս պետք է պայքարենք Լա Լիգայում հաղթանակի համար»,- գրել է բելգիացին: Հիշեցնենք, որ Ազարը 2019-ի ամռանը «Չելսիից» «Ռեալ» է տեղափոխվել 115 միլիոն եվրոյի դիմաց:
.gif)
