Շոտլանդացի գիտնականները հաջողությամբ փորձարկել են դեղամիջոց, որն ունակ է ոչնչացնել քաղցկեղի բջիջները՝ առանց վնասելու առողջ հյուսվածքները, գրում է «ՌԻԱ Նովոստի» լրատվականը՝ վկայակոչելով Evening Standard թերթին:
«Էդինբուրգի համալսարանի գիտնականները համատեղել են SeNBD քաղցկեղ սպանող փոքրիկ մոլեկուլը սննդային քիմիական բաղադրության հետ՝ չարորակ բջիջներին ստիպելու համար «կուլ տալ» այն: Ըստ Էդինբուրգի համալսարանի՝ SeNBD-ի համադրությունը սննդային քիմիական բաղադրության հետ դառնում է «իդեալական որս վնասակար բջիջների համար»։
Նշվում է, որ SeNBD մոլեկուլը լուսազգայուն միջոց է. այն ոչնչացնում է բջիջները միայն լույսի ներքո: Սա նշանակում է, որ վիրաբույժը կարող է որոշել, թե երբ ակտիվացնել դեղը, ինչը նվազեցնում է առողջ հյուսվածքի վնասման հավանականությունը և կողմնակի ազդեցությունների հավանականությունը, ինչպիսին է մազաթափությունը:
Գիտնականները դեղամիջոցը համեմատում են «տրոյական ձիու», իսկ դրա ազդեցությունը՝ «նյութափոխանակության մարտագլխիկի» հետ: Միաժամանակ, նրանք հայտարարում են դեղամիջոցի լրացուցիչ փորձարկման անհրաժեշտության մասին:
«SeNBD-ը երբևէ ստեղծված ամենափոքր լուսազգայուն միջոցներից մեկն է, և դրա օգտագործումը՝ որպես «տրոյական ձի», շատ նոր հնարավորություններ է բացում միջամտական բժշկության մեջ՝ չարորակ բջիջները ոչնչացնելու համար՝ առանց շրջապատող առողջ հյուսվածքի վրա ազդելու»,- ասել է առաջատար գիտնական Մարկ Ուենդրելը:
.gif)
