Ադրբեջանի զինված ուժերին Հայաստանի Հանրապետության գյուղերի հարեւանությունից եւ համայնքների միջեւ ճանապարհներից անհապաղ հեռացնելու եւ անվտանգության գոտի ստեղծելու նպատակով ՀՀ կառավարությունը պետք է հրատապ միջպետական գանգատով դիմի Մարդու իրավունքների եվրոպական դատարան:
Մասնավորապես, ադրբեջանական զինված ծառայողների ներկայությունը ՀՀ Գեղարքունիքի եւ Սյունիքի գյուղերի հարեւանությամբ եւ Սյունիքի համայնքների միջեւ ճանապարհներին, նրանց արարքները խախտում են Հայաստանի Հանրապետության բնակիչների՝ Մարդու իրավունքների եվրոպական կոնվենցիայով երաշխավորված առնվազն հետեւյալ իրավունքները.
1) կյանքի իրավունքը, կոնվենցիայի 2-րդ հոդված,
2) ազատության եւ անձնական անձեռնմխելիության իրավունք, 5-րդ հոդված,
3) մասնավոր եւ ընտանեկան կյանքը հարգելու իրավունք, 8-րդ հոդված,
4) սեփականության իրավունք, 1-ին արձանագրության 1-ին հոդված,
5) տեղաշարժի ազատություն, 4-րդ արձանագրության 2-րդ հոդված եւ այլն: Նույնը վերաբերում է նաեւ ադրբեջանական դրոշներին ու ցուցանակներին, նրանց զինված ուժերի ցանկացած տեխնիկայի: Մենք Հայաստանի Հանրապետության կառավարությանը կդրամադրենք ՀՀ մարդու իրավունքների պաշտպանի փաստահավաք աշխատանքներով հավաքագրված ապացույցները, որոնք հաստատում են նշված խախտումները եւ հիմնավորում անվտանգության գոտու հրատապ անհրաժեշտությունը:
.gif)
