«Զարթոնք» ազգային քրիստոնեական կուսակցությունը չի ընդունում ընտրությունների արդյունքները:
Կուսակցության հայտարարությունում ասվում է.
«Զարթոնք» ազգային քրիստոնեական կուսակցության գործադիր մարմինը, նկատի ունենալով այն հանգամանքը, որ ընտրությունները կազմակերպվել և անցկացվել են Սահմանադրության, ՀՀ ընտրական օրենսգրքի և «Անկախ պետությունների համագործակցության մասնակից պետություններում ժողովրդավարական ընտրությունների, ընտրական իրավունքների և ազատությունների չափանիշների մասին» կոնվենցիայի պահանջների խախտումներով, մասնավորապես՝
• «Քաղաքացիական պայմանագիր» կուսակցությունը նախընտրական քարոզարշավն անցկացնում էր ատելության, բռնության և հոգեբանական հարկադրանքի կոչերով, որպիսի փաստերը հաստատված են նաև ՀՀ վարչական դատարանի օրինական ուժի մեջ մտած վճռով,
• Ընտրությունների ժամանակ արձանագրվել են մի շարք խախտումներ (թափանցիկ ծրարներ, այլ անձանց քվեարկությունը բացահայտող գործողություններ, տպվող կտրոնների վրա քաղաքացիների լուսանկարների բացակայություն, ձայների հաշվարկի ժամանակ ընտրական տեղամասերի մասայական հոսանքազրկում և այլն),
քաղաքական ճգնաժամը վերացնելու նպատակով նշանակված ԱԺ արտահերթ ընտրությունները չծառայեցին այդ նպատակին,
հայտարարում է՝
Չի ընդունում 2021թ. Ազգային ժողովի ընտրությունների նախնական արդյունքները»:
Հիշեցնենք, որ արդեն իսկ երեք քաղաքական ուժ՝ «Հայաստան» դաշինքը, «5165 Ազգային- պահպանողական շարժում» կուսակցությունը և «Հայոց հայրենքի» կուսակցությունները չեն ընդունում արտահերթ ընտրությունների արդյունքները։ «Հայաստան» դաշինքը և «Հայոց հայրենիքը» հայտարարել են, որ ՍԴ-ում վիճարկելու են ընտրությունների արդյունքները։
.gif)
