Եթե դուք ցանկանում եք իջեցնել սթրեսի մակարդակը, ապա հավանաբար արդեն գիտեք` ինչ անել: Հիմնական գործողություններն են հանգստի ապահովումը, քնի ռեժիմի կարգավորումը և ֆիզիկական վարժությունները: Բայց արդյո՞ք գիտեք, որ կան որոշ սննդամթերքներ, որոնք նույնպես իջեցնում են սթրեսի մակարդակը:
Կորտիզոլը` սթրեսի հորմոնը, կատարում է մի շարք կարևոր գործառույթներ`
• Քնի ցիկլերի կարգավորում,
• Բորբոքումների նվազեցում,
• Արյան մեջ շաքարի ավելացում,
• Կառավարում է, թե ինչպես է մարմինը օգտագործում ածխաջրերը, ճարպերն ու սպիտակուցները,
• Արյան ճնշման վերահսկում:
Բժիշկները փաստում են, որ կորտիզոլն օգտակար է այն դեպքում, երբ արյան մեջ կարճ ժամանակով է հայտնվում: Այն հանդիսանում է պաշտպանիչ մեխանիզմ և տալիս է էներգիա, որն անհրաժեշտ է կարճաժամկետ սթրեսային իրավիճակներին արձագանքելու համար:
Երկարատև լինելու դեպքում կորտիզոլն առաջացնում է սթրես, ինչը հանգեցնում է ավելի շատ բորբոքումների և արյան ճնշման բարձրացման: Ըստ էության, այս դեպքում կորտիզոլը վնաս է հասցնում` ի տարբերություն կարճատևի:
Սթրեսը նվազեցնելու նպատակով անհրաժեշտ է օգտագործել ձուկ, թռչնամիս, մրգեր, բանջարեղեն, ձավարեղեն և նաև առողջ ճարպեր: Այսինքն, պետք է օգտագործել քիչ մշակված սնունդ, այնպիսի սննդամթերքներ, որոնք հարուստ են վիտամին B-ով (տավարի միս, հավ, ձու, ձավարեղեն), օմեգա-3 ճարպաթթուներով (ավոկադո, չիայի սերմեր, կտավատի սերմեր, ծովատառեխ, սկումբրիա, ձիթապտղի յուղ, ոստրեներ, սաղմոն, սարդինա, թունա ձուկ, ընկուզեղեն), մագնեզիումով (ավոկադո, բանան, բրոկկոլի, դառը շոկոլադ, դդմի սերմեր, սպանախ), սպիտակուցներով (նուշ, հավի կրծքամիս, ձու, ոսպ, գետնանուշ, քինոա, հնդկահավի կրծքամիս, թունա ձուկ, սաղմոն, ծովախեցգետին):
Ի հակադրություն վերոնշյալ մթերքների` կան նաև այնպիսի մթերքներ, որոնք կարող են խթանել կորտիզոլի առաջացումը: Դրանք են`
• ալկոհոլը,
• կոֆեինը,
• շատ շաքար պարունակող մթերքները,
• պարզ ածխաջրերը, ինչպիսիք են տորթերն ու թխվածքաբլիթները:
Այնուամենայնիվ, հարկ է նշել, որ սթրեսից հնարավոր չէ խուսափել միայն ճիշտ սննդամթերք օգտագործելով: Սթրեսը նվազեցնելու համար անհրաժեշտ է ցուցաբերել համալիր մոտեցում, որը ենթադրում է չափավոր ֆիզիկական ծանրաբեռնվածություն և բավականաչափ քուն: Նաև անհրաժեշտ է պայքարել քրոնիկ հիվանդությունների դեմ, ինչպիսիք են շաքարային դիաբետը, արյան բարձր ճնշումը և ճարպակալումը:
Չնայած չենք կարող վերահսկել մեր գեները կամ շրջակա միջավայրը, սակայն կարող ենք նպաստել առողջ օրգանիզմ ունենալուն` խելացի որոշումներ կայացնելով և ընդունելով առողջ սնունդ: Երբ խոսքը վերաբերում է մեր առողջությանը, սնունդն այն է, ինչը մենք իսկապես կարող ենք վերահսկել: Եղեք առողջ:
.gif)
